Gürcüstandan oğurlanmış jurnalist yenidən həmin ölkəyə niyə qayıdıb? – Əfqan Muxtarlı "Çətin sual" qarşısında -Canlı

Bakı/12.04.21/Turan: Azərbaycanlı jurnalist Əfqan Muxtarlı azadlığa çıxdıqdan sonra ilk dəfə Gürcüstana gedib. O bildirib ki, Tbilisiyə getmə səbəbi oğurlanması ilə bağlı Gürcüstan Baş Prokurorluğunda açılan cinayət işi ilə bağlıdır.

Jurnalistin sözlərinə görə, hadisənin üzərindən 5 il keçsə də, heç bir nəticə yoxdur, istintaq onun istədiyi kimi getmir. Bu səbəbdən bir neçə ay öncə Gürcüstanın Baş Prokurorluğuna yazılı müraciət edib. Jurnalist müraciətində canlı izahat vermək üçün Gürcüstana getmək istədiyini bildirib. Müsbət cavab almasına baxmayaraq, onu Gürcüstana buraxmamışdılar. Həmin vaxt Gürcüstan parlamentinin spikeri  açıqlama verərək bildirmişdi ki, Əfqan Muxtarlının Tbilisiyə gəlməyinin səbəbi seçkiöncəsi ölkədəki siyasi vəziyyəti gərginləşdirmək istəyidir. Bu dəfə isə jurnalist Gürcüstana gələ bilib.

Oturum izni ilə Gürcüstanda yaşayan jurnalist Əfqan Muxtarlı 2017-ci il mayın 29-da “yoxa” çıxıb və səhəri gün Azərbaycanda həbs edilib. Dediyinə görə, Tbilisidə saxlanıb, işgəncə verilib, zorla sərhədə gətirilərək Azərbaycan tərəfinə təhvil verilib. Üstəlik, cibinə 10 min avro pul qoyulub. Azərbaycan hökuməti isə jurnalisti Cinayət Məcəlləsinin hakimiyyət nümayəndəsinə xidməti vəzifələrini yerinə yetirərkən ona qarşı həyat və sağlamlıq üçün təhlükəli olan zor tətbiq etmə maddəsi (315.2) ilə ittiham edirdi.

Bundan başqa, ona dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri ilə ittiham irəli sürülmüşdü və həmin ittihamlarla 6 il azadlıqdan məhrum edilmişdi. Beynəlxalq hüquq müdafiə təşkilatları Əfqan Muxtarlını siyasi məhbus kimi tanıyıb.

2020-ci il martın 17-də jurnalist gözlənilmədən həbsdən azad edilmiş və dərhal Almaniyaya göndərilmişdi.

Əfqan Muxtarlı Gürcüstana səfərinin məqsədi ilə bağlı bu gün saat 15:00-da Kamran Mahmudovun təqdimatında yayımlanan“Çətin sual” verilişində danışacaq.--0--