Hesablama palatasının hesaba aldığı yeyintilər – Rövşən Ağayev "Çətin sual" qarşısında -Canlı

Bakı/08.04.21/Turan: Hesablama Palatası 2020-ci ildə 3 tədbir üzrə aşkar edilmiş hüquqpozmalarda cinayət tərkibinin əlamətləri ehtimal edilməsi, eyni zamanda 1 tədbir üzrə inzibati məsuliyyət yarada biləcəyi səbəbindən aidiyyəti məlumatları Baş Prokurorluğuna göndərib.

Hesablama Palatası tərəfindən 2020-ci ildə başa çatdırılmış 34 audit üzrə nəticələr ümumiləşdirilərək 452 halda nöqsan müəyyən edilib. 

“Azərbaycan Respublikası Hesablama Palatasının 2020-ci ildə fəaliyyəti haqqında” hesabat sənədində bu barədə məlumat verilib. 452 nöqsanın 199-u və yaxud 56,6%-i büdcə qanunvericiliyinin pozulması ilə bağlı olub.

Sənədə əsasən, ən çox nöqsan Kütləvi İnformasiya Vasitələrinin İnkişafına Dövlət Dəstəyi Fondunda (30 hal) qeydə alınıb.İkinci yerdə Aqrar Xidmətlər Agentliyi (29 hal), üçüncü yerdə isə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası (26) yer alır.Ən az nöqsan 2 halla Milli Onkologiya Mərkəzində qeydə alınıb. Sonrakı yerləri isə Azərbaycan Qida Təhlükəsizliyi Agentliyi (AQTA) (3 hal), Milli Məclis (5 hal), Kiçik və Orta Biznesin İnkişafı Agentliyi Dövlət Məşğulluq Xidməti və onun yerli orqanları bölüşür.

Eyni zamanda bir çox  dövlət qurumlarında ayrılan vəsaitlərin mənimsənilməsi və yeyinti hallarının olması kimi məsələlər də Hesablama Palatasının qeydə aldığı nöqsanlar sırasındadır.

Hesablama Palatasının hesabatı haqda iqtisadçı Rövşən Ağayev bu gün saat 15:00-da “Çətin sual” verilişində Kamran Mahmudovun qonağı olacaq. --0--