Media-icmal 05.10.20

“Azərbaycan” qəzeti “ Türkiyə Milli Müdafiə Nazirliyi: Ermənistan dərhal hücumları dayandırmalı, muzdlu əsgərləri və terrorçuları geri göndərməlidir” sərlövhəli məqalədə bu idarənin Ermənistanın hücumlarına münasibətini dəyərləndirir. 

Məqaləyə görə, nazirlik bəyan edir ki, Azərbaycan torpaqlarının iyirmi faizini işğal edən Ermənistan iyulun 12-də və sentyabrın 21-də Tovuz istiqamətindəki hücumlarının ardından bütün dünyanın gözü qarşısında atəşkəsi pozaraq Azərbaycanın mövqelərini və yaşayış məskənlərini ağır silahlarla davamlı atəşə tutub.

Müəllif deyir ki, Türkiyə Müdafiə Nazirliyi beynəlxalq hüququn açıq şəkildə pozulması və mülki əhalinin itkilərinə yol açan erməni hücumlarını şiddətlə qınayır: “Ermənistan dərhal hücumları dayandırmalı, xaricdən gətirdiyi muzdlu əsgərləri və terrorçuları geri göndərməli, işğal etdiyi Azərbaycan torpaqlarını dərhal tərk etməlidir. Günahsız mülki əhalini hədəf alan erməni terrorçuları ilə əməkdaşlıq edən PKK-YPG terroristlər dərhal bölgəni tərk etməlidir. Əks halda hər zaman olduğu kimi yenə də məyusluğa düçar olacaqlar”, - nazirlik bildirir.

Müəllif deyir ki, nazirlik döyüşlərdə Türkiyə aviasiyası, pilotsuz və silahlı pilotsuz aparatlar ilə (İHA/SİHA) hücum edilməsinə dair Ermənistanın iddialarını rədd edir: “Beləliklə, Azərbaycan Silahlı Qüvvələri öz gücü ilə zəfər qazanacaq imkana və qabiliyyətə, işğal altındakı torpaqlarını qurtaracaq əzm və qərarlılığa sahib olduğunu ötən günlər bütün dünyaya göstərib”.

“Müsavatşcom” isə  “Baş Prokuroluq: Mingəçevirdə beş nəfər yaralanıb” sərlövhəli məqalədə Azərbaycan Baş Prokurorluğuna istinadən Mingəçevir şəhərinə atılmış raket zərbəsinin nəticələrini diqqətə çatdırır.

Müəllif bildirir ki, bu gecə radələrində Ermənistan ərazisindən Mingəçevirə raket zərbələri endirilib, bununla da Azərbaycanın dinc əhalisini qəsdən hədəfə almaqla döyüş əməliyyatları gedən bölgədən 100 km.-dən artıq uzaqlıqda yerləşən Azərbaycanın sənaye şəhəri, 100 mindən artıq əhalisi olan Mingəçevir şəhərinin mülki əhalisinin sıx yaşadığı məntəqələri raket zərbələri ilə atəşə tutulub.

Məqalədə rəsmi qurumlara istinadən deyilir ki, atılan 3 raketdən 2-i partlamayıb, partlamayan raketlərdən 1-i Azərbaycan İstilik Elektrik Stansiyası MMC-nin qarşısına, digəri isə dinc sakinlərin yaşadıqları evin yaxınlığına düşüb.

Müəllif vurğulayır ki, 3-cü raketin fərdi yaşayış evinə atılması nəticəsində 5 nəfər müxtəlif dərəcəli bədən xəsarətləri alaraq xəstəxanaya yerləşdirilib, eyni zamanda evə külli miqdarda ziyan dəyib.

Müəllif əlavə edir ki, hadisə yerində olan prokurorluq əməkdaşları zərərçəkmiş şəxslərin və zərər dəymiş mülki infrastruktur obyektlərinin siyahısının dəqiqləşdirilməsi ilə bağlı istintaq-əməliyyat tədbirləri həyata keçirilir.

“Oxu.az” saytı isə  “Ceyhun Bayramov və ATƏT-in Minsk Qrupunun ABŞ-dan olan həmsədri arasında telefon danışığı olub” sərlövhəli məqalədə oktyabrın 4-də Azərbaycan xarici işlər nazirinin təşəbbüsü ilə Ceyhun Bayramov və ATƏT-in Minsk Qrupunun ABŞ-dan olan həmsədri Endryu Şofer arasında telefon danışığı baş tutub.

Müəllif deyir ki, nazir Ceyhun Bayramov amerikalı həmsədrə bölgədəki yüksək gərginlik, xüsusən də Ermənistanın azərbaycanlı mülki şəxsləri və obyektləri məqsədyönlü atəşə tutması barədə məlumat verib. 

Nazir təmas xəttindən uzaqda yerləşən Azərbaycan şəhərlərini, o cümlədən Ermənistan ərazisindən Azərbaycanın ikinci ən böyük şəhəri olan Gəncənin raket atəşinə tutulmasının mülki əhali arasında itki və infrastrukturun məhv olması ilə nəticələndiyini vurğulayıb. 

Nazir həmsədrə bildirib ki, bu günə qədər Ermənistanın açdığı atəş nəticəsində 24 azərbaycanlı mülki şəxs şəhid olub, 111 nəfər isə yaralanıb.

Müəllif əlavə edir ki, Ermənistan bu hərbi təxribatları həyata keçirməklə dinc əhalini terrora məruz qoymaq, hədələmək və çaxnaşma yaratmaq məqsədi güdür.

Müəllif deyir ki, nazir Ermənistanın siyasi-hərbi rəhbərliyinin terror taktikasını açıq şəkildə nümayiş etdirdiyini qeyd edib, həmsədr isə atəşkəsə riayət edilməsinin əhəmiyyətini vurğulayıb.

Nazir Ceyhun Bayramov BMT Təhlükəsizlik Şurasının müvafiq qətnamələrinə uyğun olaraq Ermənistanın bütün silahlı qüvvələrinin Azərbaycanın işğal olunmuş ərazilərindən çıxarılmasının bölgədə sülhün təmin olunması baxımından zəruri olduğunu bildirib.