Media-icmal 13.10.20

Azərbaycanın əks-hücum hərbi əməliyyatına Azərbaycanın rus icmasından baxış, bu hadisələrdə Türkiyənin Azərbaycana dəstək verməsinə müxtəlif səpgili

baxışların səbəbləri, atəşkəsi pozmaqda Ermənistanın məqsədi, ölkədə sanitar-epidemoloji vəziyyət  və s. məsələlər bugünkü medianın aparıcı mövzuları sırasındadır. 

“Azərbaycan” qəzeti ”Mixail Zabelin: “Vətəni sonadək müdafiə etməyə hazırıq” sərlövhəli məqalədə deputat, Azərbaycanda rus icmasının sədri Mixail Zabelin Ermənistan- Azərbaycan münasibətlərini dəyərləndirir.  

M.Zabelin sentyabrın 27-dən Azərbaycanın əks-həmlə döyüş əməliyyatlarına başlamasına səbəb kimi Ermənistanın atəşkəs rejimini pozaraq Azərbaycan ordusunun mövqelərini, mülki əhalini atəşə tutmasını, nəticədə dinc əhali arasında çoxlu sayda ölənlər və yaralananların olmasını göstərir.

İcma rəhbəri Azərbaycanı doğma vətən adlandırır, XX əsrin 90-cı illər müharibəsində də rusların Azərbaycanın ərazi bütövlüyü uğrunda düşmənə qarşı döyüşdüyünü bidirir,  İvan Makeyev və Yuri Kovalyovun Azərbaycanın Milli qəhrəmanları adına layiq görüldüyünü vurğulayır.

İcma sədri qeyd edir ki, ermənilərin növbəti təxribatları ilə əlaqədar rus icması beynəlxalq təşkilatları ikili standartlar siyasətindən əl çəkməyə və işğalçı Ermənistana təzyiq göstərməyə çağırıb.

İcma rəhbəri deyir ki, Ermənistanla 30 ilə yaxın davam etmiş danışıqlar heç bir nəticə vermədi, işğal edilmiş ərazilərdən çıxmadılar, bunu isə Azərbaycan Silahlı Qüvvələri cavabsız qoymadı.

Deputat bəzi Rusiya telekanallarında Azərbaycanda xarici muzdluların döyüşməsi kimi yayımları əsassız sayır, Türkiyənin isə Azərbaycana hərbi yox, mənəvi dəstək verdiyini bildirir: “...vaxtilə beynəlxalq təşkilatlar erməni tərəfini Azərbaycan ərazilərindən çıxmağa məcbur etsəydi, bugünkü vəziyyət yaranmazdı. Əgər ATƏT-in Minsk Qrupu 30 il ərzində bu problemi həll edə bilməyibsə, deməli, Azərbaycan öz ərazisini erməni işğalçılarından azad etmək üçün bütün mümkün vasitələrə əl atmaq hüququna malikdir”.

İcma rəhbəri deyir ki, ötən əsrin 90-cı illərində olduğu kimi yenə də birgə Vətənin bütövlüyünü sonadək müdafiə etməyə hazırdırlıar.

“Yenisabah.az”  saytı “Şoyqunun istəyini yerinə yetirmək tarixdə - 2016-cı ildə qaldı, artıq Türkiyə var” sərlövhəli məqalədə müəllif Qarabağ cəbhəsində vəziyyət barədə politoloq Elxan Şahinoğlu ilə söhbətləşir.

E.Şahinoğlu deyir ki, Rusiyanın müdafiə naziri Sergey Şoyqu Türkiyənin müdafiə naziri Hülusi Akara zəng edib, bir sıra məsələlərlə yanaşı Dağlıq Qarabağdakı döyüşlər də müzakirə edilib.

Politoloqun deməsinə görə, Rusiyanın xarici işlər naziri Sergey Lavrov isə türkiyəli həmkarı Mövlüd Çavuşoğluna zəng etmişdi. Bir gün Rusiya prezidenti Vladimir Putin eyni mövzunu müzakirə etmək məqsədilə Türkiyə cümhurbaşqanı Rəcəb Təyyub Ərdoğana zəng edəcək”.

“Bütün bunlar ondan xəbər verir ki, Kremldə anlayırlar ki, Türkiyənin rəyi nəzərə alınmadan keçinmək mümkün olmayacaq. Türkiyə isə Azərbaycanın tələbini qətiyyətlə təkrarlayır: Ermənistanın hərbi təcavüzünə son qoyulmalı və bu dövlət işğal etdiyi torpaqlardan çıxmalıdır! Rusiyanın “Rossiya” televiziya kanalının ermənipərəst aparıcısı Solovyov dünənki verilişində Azərbaycanı Rusiyanın müdafiə naziri ilə hədələyib: “Bakı Lavrovla razılığa gəlməsə, Şoyqu ilə razılığa gəlmək məcburiyyətində qalacaq”.

Politoloq hesab edir ki, S.Şoyqunun istəyini yerinə yetirmək tarixdə - 2016-cı ildə qaldı, 4 il keçib, bölgədə artıq Türkiyə var və həmin Şoyqu telefonda Hulusi Akarın bu sözlərini dinləmək məcburiyyətindədir: “Azərbaycan münaqişənin həlli üçün daha 30 il gözləməyəcək. Azərbaycan öz torpaqlarını geri almaq üçün başladığı əks-hücum əməliyyatlarında Türkiyə Azərbaycanın yanında olacaq”, - E.Şahinoğlu bildirib.

“Redaktor.az” saytı isə “Atəşkəsi pozan düşmənin üç məqsədi var - Ordumuz əzib keçir...” sərlövhəli məqalədə müəllif oktyabrın 10-da  Moskvada imzalanmış bəyanatın atəşkəs tələbinin yerinə yetirilməməsini politoloq Qabil Hüseynli ilə müzakirə edir. 

Politoloq deyir ki, Ermənistan atəşkəsi Rusiyanın təzyiqi altında əldə etmişdi, amma Moskvada verilən qərara heç 1 saat da əməl etmədilər.

Q.Hüseynli deyir ki, Ermənistan atəşkəs əldə etmək üçün Rusiyaya günlərlə yalvardı..... Nikol Paşinyan təkcə Putinə 5 dəfə zəng etmişdi.  Bir sözlə, günlərlə yalvarışdan sonra istədiyinə nail oldu. Amma elə razılaşmanın ilk saatlarından yalvararaq əldə edikləri razılaşmaya əməl etmədilər”.

Politoloq Ermənistanın atəşkəsə əməl etməməsinin bir neçə səbəbinin olduğunu bildirib.

Onun fikrincə, Ermənistan mülki vətəndaşlara qarşı silah işlətməklə Azərbaycanın diqqətini Ermənistana cəmləmək, sonra isə Azərbaycanı başqa dövlətə hücumda  şərləmək məqsədi güdür, onların birinci məqsədi budur.

İkincisi, erməni tərəf Azərbaycanın atəşkəsə əməl edəcəyini bilir, elə bundan istifadə edərək Azərbaycana bacardıqları qədər ziyan vurmaqdadır.

Üçüncüsü, Ermənistan mülkü əhalini hədəfə almaqla insanlarda qorxu yaratmağa, onları 90-cı illərdəki kimi evlərindən didərgin salmağa çalışır.  Politoloq atəşkəsi pozmaqla Ermənistanın Rusiyanın imicinə zərbə vurduğunu bildiriir.

“Bizimyolinfo.az ” saytı “Tibbi Ərazi Bölmələrini İdarəetmə Birliyi (TƏBİB): Ölkəmizdə də epidemik vəziyyət gərginləşməkdədir” sərlövhəli məqalədə Azərbaycanda koronavirus pandemiyası ilə bağlı vəziyyəti dəyərləndirir.

Müəllif deyir ki, hazırda dünyada, eləcə də Azərbaycanda koronavirus (COVID-19) infeksiyasına yoluxma sayı artır, epidemik vəziyyət gərginləşir. TƏBİB-in  məlumatına görə, payız və qış fəsillərində mövsümi qrip və digər kəskin tənəffüs yolları infeksiyalarının sayının artması müşahidə edilir.

Koronavirus (COVID-19) infeksiyası ilə yanaşı sözügedən xəstəliklərlə epidemik vəziyyətin gərginləşmə ehtimalını minimuma endirmək üçün 2020-ci il oktyabrın 12-dən hamilələr, xroniki tənəffüs sistemi xəstəlikləri olan əhali qrupları arasında könüllü olaraq bir ay davam edəcək qrip  əleyhinə vaksinasiya tədbirləri həyata keçiriləcək.

Niderland Krallığında istehsal olunmuş və Abbott Biologicals şirkəti tərəfindən Azərbaycana gətirilən İnfluVak Tetra peyvənd, dördvalentli, inaktivasiya olunmuş peyvənddir.

ÜST tərəfindən təsdiqlənən və 2020-2021-ci il mövsümünə aid qrip peyvəndinə qoyulmuş tələblərə uyğundur. Peyvənd təknəfərlik doza şəklində şprisə yığılmış haldadır, 6 aydan başlayaraq uşaqlara da vurula bilər.