“Təhsil Tələbə Krediti Fondu” təsis edilib

Bakı/17.06.21/Turan: Dövlət başçısı İlham Əliyev Təhsil Nazirliyi yanında 80 milyon manat nizamnamə fondu ilə “Təhsil Tələbə Krediti Fondu”nun yaradılması barədə fərman verib.

Sənəddə qeyd olunur ki, fond əhalinin aztəminatlı təbəqələrindən olan şəxslərin təhsilə əlçatanlığını təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirmək məqsədilə yaradılıb.

Fond qeyri-kommersiya hüquqi şəxs kimi fəaliyyət göstərəcək.

Fond əhaliyə birbaşa təhsil tələbə kreditlərinin verilməsi ilə məşğul olmur. Bu vəzifəni kredit təşkilatları həyata keçirəcək.

Fondun fəaliyyətinə ümumi rəhbərliyi və nəzarəti həyata keçirmək üçün ictimai əsaslarla fəaliyyət göstərən 7 üzvdən ibarət Himayəçilik Şurası yaradılır. Şura standart və sosial təhsil tələbə krediti üzrə illik faiz dərəcələrini, habelə hər tədris ili üçün təsdiq edilən tələbə qəbulunda nəzərdə tutulmuş ayrı-ayrı ixtisaslar üzrə ödənişli əsaslarla təhsilalana düşən illik təhsil haqlarının məbləği nəzərə alınmaqla, təhsil tələbə kreditinin məbləğinin yuxarı həddini təsdiq edir.

Fondun fəaliyyətinə cari rəhbərliyi 3 üzvdən ibarət İdarə Heyəti həyata keçirir.

Fəaman əsasən, Nazirlər Kabineti bir ay müddətində Fondun vəsaiti hesabına təhsil tələbə kreditlərinin verilməsi qaydasını təsdiq edəcək.

2020/2021-ci təhsil ilində bakalavr və magistrlərin hazırlanmasını həyata keçirən 40 dövlət və 12 qeyri-dövlət ali təhsil müəssisəsində, eləcə də 26 elmi təşkilatda təhsil alanların sayı 198,7 min nəfərdir.

2020-ci ildə ölkənin ali təhsil müəssisələrinə 45 min nəfər tələbə qəbul olunub. 08D