Azərbaycanın şəhid və qazilərinin övladlarının Türkiyədə pulsuz oxuması təklif edilir

Bakı/20.09.18/Turan: Türkiyə Böyük Millət Məclisində 41 millət vəkili ilə təmsil edilən İYİ Partiya sədrinin müavini Ümid Özdağ Azərbaycanınşəhid və qazi övladlarının Türkiyədə pulsuz oxumasını təklif edib. Turan agentliyi bu xəbəri Türkiyə mediasına istinadən bildirib.

Partiyanın "Yaxşılıq karvanı" layihəsi çərçivəsində bir qrup funksioner ilə birlikdə Yozgat vilayətinə gedən Ümid Özdağ şəhərin Yerköy Şəhidlər Xiyabanındakı çıxışında bu təklifi səsləndirib: "Qafqazın məhmətçikləri azərbaycanlı qardaşlarımızın erməni ordusuna, erməni işğalçılarına qarşı müharibədə şəhid olan övladları var. Biz onların uşaqlarının Türkiyədə dövlətin verəcəyi dəstək ilə oxumasının tərəfdarıyıq. Bunun bir an əvvəl həyata keçirilməsi lazımdır".

Ü.Özdağ deyib ki, bugünkü iqtidar bunu etməsə İYİ Partiya iqtidara gəldiyi gün bunu həyata keçirəcək.

Xatırladaq ki, İYİ Partiya 2017-ci ilin payızında qurulub. Bu il iyunun 24-də ilk dəfə parlament seçkisində iştirak edib. Seçkiyə ana müxalifətdəki Cümhuriyyət Xalq Partiyası (CHP), Səadət Partiyası və Demokrat Partiyası ilə ittifaq halında gedən İYİ Partiyanın 43 namizədi mandat alsa da seçkidən bir müddət sonra 2 millət vəkili partiya sıralarından istefa verib.

Partiyanın lideri, keçmiş daxili işlər naziri və parlamentin keçmiş vitse-spikeri Meral Akşener 24 iyundakı seçkidə prezidentliyə namizəd olub. Akşener 10% səs qazana bilib.-05D-