Anar Məmmədovun apellyasiya şikayətinə baxılmasına başlanılıb

Bakı/08.05.19/Turan: Mayın 8-də Bakı Apellyasiya Məhkəməsində Criminal.az saytının baş redaktoru, şərti olaraq mühakimə edilmiş Anar Məmmədovun işi üzrə ilkin iclas keçirilib.

Proses zamanı vəkil Elçin Sadıqov iki şahidin yenidən məhkəməyə çağırılması barədə vəsatət qaldırıb.

Vəkil bunu onunla izah edib ki, saytdakı yazılardan "şoka düşmüş" Məlahət Məmmədova və Samirə Canıyevanın ifadələri birinci instansiya məhkəmə iclaslarının protokollarında təhrif edilib və saxtalaşdırılıb.

Bundan əlavə, vəkil ekspert kimi cəlb edilmiş Bəxtiyar Əliyevin ali təhsil haqda diplomu barədə Təhsil Nazirliyinə sorğu göndərilməsinə dair vəsatət qaldırıb.

Çünki B.Əliyevin müvafiq ali təhsili olmadığı halda politoloji rəy verib. Qanun isə müvafiq ixtisası olmayan şəxsin ekspert rəyini qadağan edir.

Lakin məhkəmə vəsatəti təmin etməyib və mahiyyəti üzrə dinləmələri mayın 22-nə təyin edib.

Bu ilin martında A.Məmmədov iki il sınaq müddəti olmaqla 5,5 il müddətinə azadlıqdan məhrum edilib. O, dövlət əleyhinə çağırışlarda, səlahiyyət həddini aşmaqda və vəzifə saxtakarlığında ittiham olunub. Onun cinayət məsuliyyətinə cəlb edilməsinə Criminal.az saytında Gəncə şəhərinin keçmiş icra başçısı Elmar Vəliyevə sui-qəsd ilə bağlı yazıların dərci səbəb olub.

Bir sıra beynəlxalq jurnalist təşkilatları, həmçinin ATƏT-in KİV azadlığı üzrə nümayəndəsi Arlem Dezir A.Məmmədovun barəsində hökmü pisləyiblər.-06B--