Apellyasiya Məhkəməsi bloger Mehman Hüseynov barəsində hökmü qüvvədə saxlayıb

Bakı/15.12.17/Turan: Bakı Apellyasiya Məhkəməsi (BAM) bu gün bloger Mehman Hüseynov barəsində hökmü yenə qüvvədə saxlayıb.

Xatırladaq ki, blogerin həbsinə bu ilin yanvarında polisdə işgəncəyə məruz qalması haqqında bəyanatları səbəb olub. Buna cavab olaraq Nəsimi rayon Polis İdarəsinin rəisi Musa Musayev böhtan haqqında iddia qaldırıb. Mayın 3-də Suraxanı rayon məhkəməsi Hüseynov böhtanda təqsirli bilərək (CM-in 147-ci maddəsi), iki il müddətinə azadlıqdan məhrum edib.

Sentyabrın 29-da Ali Məhkəmə Hüseynovun kassasiya şikayətini qismən təmin edərək, onun şikayətini Apellyasiya Məhkəməsinə qaytarıb.

Bu gün iclasın əvvəlində vəkil Fuad Ağayev bildirib ki, Mehman Hüseynov bloger və jurnalist fəaliyyətinə görə təqib edilir və o, heç bir cinayət məsuliyyəti törətməyib. Vəkil hüquq nöqteyi-nəzərdən cinayət işini absurd adlandırıb, belə ki, böhtan və təhqir iddiasını hüquqi şəxs deyil, fiziki şəxs aça bilər. Bu halda isə Musayev polis adından iddia qaldırıb.

Qanuna əsasən, o, özü məhkəməyə gəlməli idi, amma gəlməyib.

Bakı Apellyasiya Məhkəməsi faktiki olaraq Ali Məhkəmənin məhkəmə istintaqı aparılması haqqında qərarını yerinə yetirməyib. Bunun üçün Hüseynovun saxlanıldığı Nəsimi rayon polis bölməsinin videomüşahidə kameralarından görüntülər araşdırılmalı idi. Amma polis onları təqdim etməyib.

Digər vəkil Fəxrəddin Mehdiyev qeyd edib ki, Mehman Hüseynov yüksək vəzifəli məmurların və deputatların bahalı daşınmaz əmlakı haqqında videoreportajları yayımladıqdan sonra həbs edilib.

Mehman Hüseynov özü Facebook-da Sancaq Production səhifəsində yayımladığı korrupsiya haqqında süjetlərə görə təqib edildiyini bildirib.

O, həmçinin Reportyorların Azadlıq və Təhlükəsizlik İnstitutunun üzvü olduğuna və həbsindən bir müddət əvvəl təşkilatın sədri seçildiyinə diqqət çəkib.

"RATİ-nin ilk sədri Emin Hüseynov ölkəni tərk etmək məcburiyyətində qalıb. İkinci sədri Rasim Əliyev öldürülüb. Məni - üçüncü sədri həbs ediblər", deyən təqsirləndirilən şəxs bəraət istəyib.

"Mən bəraət və həbsdə keçirdiyim hər gün üçün pul təzminatı istəyirəm. Mütləq sizinlə bölüşəcəyəm", deyə Hüseynov hakimə xitabən bildirib, bu da zalda gülüşə səbəb olub.

Hakim Əflatun Qasımov bundan sonra bir neçə nəfəri qovub və növbəti dəfə gülənləri həbs etməklə hədələyib.

Xüsusi ittihamçının nümayəndəsi Əlirza Əbilov hökmün qüvvədə saxlanmasının tərəfdarı olduğunu deyib və müdafiə tərəfin nümayəndələrinin siyasi bəyanatlarla çıxış etdiyini bildirib.

Sonda hakim hökmü qüvvədə saxlayıb.

Hüseynovun vəkilləri Ali Məhkəməyə kassasiya şikayəti verəcəklərini bildiriblər. -С06-