AŞPA-da Azərbaycan nümayəndə heyətinin başçısı Səməd Seyidov istefa verməlidir

Mayın 16-da Azərbaycanın AŞPA-dakı nümayəndə heyətinin başçısı, deputat Səməd Seyidov Bakıda mətbuat konfransı keçirib. O, Avropa qurumlarını yalanda, ikili standartlarda və anti-Azərbaycan siyasəti həyata keçirməkdə ittiham edib. Seyidov AŞPA-da Avropalı deputatlarla birlikdə rüşvətxorluqda və mütəşəkkil korrupsiyada ittiham olunan Azərbaycan nümayəndə heyətinin başçısına qarşı çıxarılmış sanksiyaları belə izah edib.

Sevinc Osmanqızının Youtube kanalına müsahibəsində keçmiş səfir Arif Məmmədov və AŞPA-nın keçmiş üzvü Gültəkin Hacıbəyli bununla bağlı öz şərhlərini veriblər. Gültəkin Hacıbəyli izah edib ki, AŞPA iki ay davam edən araşdırmadan sonra məruzəni təqdim edib. Məruzə Prosedur Komitəsində müzakirə olunub və Nazirlər Komitəsində tövsiyə şəklində əksəriyyət tərəfindən təsdiq edilib. Məruzədə AŞPA-da korrupsiya ilə bağlı adı keçən Səməd Seyidov və Avropalı siyasətçilər cəzalandırılıblar. Həm də milli hökumətlərin AŞPA sanksiyaları qüvvəyə minənə qədər bu deputatları cəzalandırmalı olduğu qeyd edilib. Məruzədə başqa şəxslərin də adları çəkilib, amma onlar AŞPA-nın keçmiş deputatlarıdır, buna görə AŞ çərçivəsində onları cəzalandırmaq mümkün deyil. "Bu, xatırladığım qədər, AŞPA-nın Azərbaycan üçün biabırçı olan ilk ağır qərarıdır", deyə Hacıbəyli əlavə edib.

A.Məmmədov hesab edir ki, Seyidov Azərbaycan nümayəndə heyətinin başçısı kimi ölkəmizə "qırmızı kart" göstərilməsinin təqsirkarı olub. İtaliyanın polis əməkdaşları A.Məmmədovla görüşüblər və ona suallar veiblər, bu, Avropada AŞPA-nın sözügedən qərarının nəticəsi olan cinayətlərin araşdırıldığını göstərir. Avropadan Rusiya və Azərbaycana qədər korrupsiya şəbəkəsi, o cümlədən Rosoboroneksport-un Azərbaycan məmurlarına rüşvət verməsi faktı tədqiq olunur. Ola bilər ki, araşdırmada İnterpol da iştirak edir və yeni cinayət faktlarının ortaya çıxacağı istisna deyil.

Məmmədov deyib ki, Seyidov təcrübəli insan olaraq əvvəlcə korrupsiya sxemlərində iştirak etmirdi və təhlkəli nəticələrini dərk edərək, onlara qarşı çıxırdı. Bir sıra Azərbaycanlı diplomat da açıq lobbiçiliyi dəstəkləyərək, gizli sövdələşmələrə qarşı çıxırdı. Məmmədovun fikrini davam etdirən Hacıbəyli qeyd edib ki, AŞPA Seyidovu pul məbləğlərini şəxsən verməkdə ittiham etmir və Seyidov və ona etibar etməyən prezident administrasiyası arasında daim gərgin münasibətlər olduğunu bilir. Seyidovun rəhbərlik etdiyi Xarici Dillər Universitetində yoxlama aparılıb və korrupsiya faktları aşkar edilib. Hacıbəyli hesab edir ki, deputat Elxan Süleymanov və Belçikalı biznesmen, Azərbaycanda çox az insanın tanıdığı, amma Milli Məclisin deputatı olan Müslüm Məmmədov rüşvətxorluğun bilavasitə iştirakçılarıdır. Məmmədov Süleymanova Avropada əlaqələr qurmağa kömək edib. Süleymanov və Məmmədov AŞPA-dan çıxarılıb, Bakı onları geri çağırıb və onların adları AŞPA-nın qərarında keçmir. Azərbaycanda başa düşüblər ki, Süleymanovun və Məmmədovun AŞPA-dan kənarlaşdırılması zəruridir, belə ki, Avropada bu insanlar həbs oluna bilər. Səməd Seyidov korrupsiya əməliyyatlarında şəxsən iştirak etməyə bilərdi, pul verməyib və Bakıda cinsi macəralarda barmağı yoxdur, amma baş verənlərdən mütləq xəbəri var idi. Seyidov ittiham olunan və cəzalandırılan Pedro Aqramunt və korrupsiyada ittiham olunan digər Avropalı deputatlarla fəal şəkildə işləyirdi. Seyidov cinayət əməliyyatlarında ittiham oluna bilməz, amma, şübhəsiz, mənəvi məsuliyyət daşıyır.

Ümumilikdə AŞPA-nın qərarı ədalətlidir, Hacıbəyli belə hesab edir. Seyidov şəxsən korrupsiyada ittiham olunmayıb, amma baş verənlərə görə məsuliyyət daşıyır. O, Seyidovu prinsipial olmayan, əvvəlcə etiraz edən, sonra isə Bakının təzyiqi altında Azərbaycan rəhbərliyinin boynuna qoyduğu həqiqətlə barışan zəif insan adlandırıb.

A.Məmmədov Hacıbəylinin fikri ilə razıdır. "AŞPA-da qəbul edilmiş qərar uzun prosesin başlanğıcıdır. Azərbaycan başa düşməlidir ki, hadisə ölkə və hətta AŞPA hüdudlarından kənara çıxıb və bütün Avropada araşdırılır. Müslüm Məmmədova və Elxan Süleymanova avropalılara rüşvət vermək üçün kimin pul vediyi aydınlaşdırılacaq. Bu adlar mənə məlumdur, onlar Bakıda çox yüksək vəzifələr tuturlar, amma nə qədər ki, polis bu barədə məlumat verməyib, mən susmalıyam. Azərbaycanda bir çox hakimiyyət nümayəndələri Avropa sanksiyalarına məruz qala bilər, Məmmədov və Seyidov hansı siyasətçilrəə Bakıya səfərləri zamanı zərflərdə və bank köçürmələri ilə rüşvət verildiyini dəqiq bilirlər. Məmmədov və Süleymanov ifadə vermək üçün AŞPA-ya dəvət ediləcəklər, onlar təmizdirlərsə, könüllü olaraq istintaq qarşısına çıxacaqlar. Amma mən Azərbaycan telekanallarının ekranlarında nə Süleymanovu, nə Məmmədovu görmürəm, onlar toplantılarda iştirak etmirlər, yəqin ki, bu insanların çox şey bildiklərini və Avropalılara yeni korrupsiya məlumatları verə biləcəklərini dərk edərək, onları siyasətdən uzaqlaşdırıblar, Məmmədovun təxmini belədir.

Hacıbəyli Seyidovun Bakıda mətbuat konfransında öz səhvlərini etiraf etmək yerinə, Avropa Şurasının ermənipərəstliyi haqqında səsləndirdiyi ittihamlara istehza edib. Onun Azərbaycanın dünyada Şimali Koreya və Əfqanıstana tay tutulmuş biabırçı reytinqindən xəbəri olan Seyidova yazığı gəlir. Bir halda ki, Ermənistanda bütün dünya tərəfindən dəstəklənən demokratik inqilab baş verib. O, Seyidovun Bakıda Süleymanov və Məmmədovun ardınca onun da AŞPA-dan çıxarılması ehtimalı haqqında sözlərinə diqqət çəkib. AŞPA-da baş verənlər Qarabağ məsələsində Azərbaycanın mövqeyinə zərbə vurub, hətta korrupsionerlərin AŞPA-dan çıxarılması belə ölkəmizi fəlakətdən xilas etməyəcək, Hacıbəyli belə hesab edir.

Səməd Seyidov istefa verməlidir, - deyə politoloq Elxan Şahinoğlu çağırış edib. Bakıda keçirilən mətbuat konfransında Seyidov Azərbaycanın AŞPA-nın işində iştirakının davam etdirilməsinin əhəmiyyətini qeyd edib, baxmayaraq ki, Strasburqdakı nitqində o, şəxsən ona AŞPA-nın lazım olmadığını bəyan etmişdi. Bəlkə də Səmədova AŞPA lazım deyil, amma Azərbaycanın bu Avropa təşkilatına ehtiyacı var, biz orada Ermənistanı cavabsız qoya bilmərik.

Bakıda Seyidov Strasburqdakı çıxışına düzəliş edib, göründüyü kimi, Azərbaycan hakimiyyəti onun başına ağıl qoyub, Seyidovun Azərbaycan olmadığını izah edib. İndi isə Seyidov doğru hərəkət etməli və Avropa Şurası Parlament Assambleyasının üzvlüyündən çıxaraq, istefa verməlidir. Azərbaycan AŞPA-da Ermənistanla müharibə aparır, sanksiyalara məruz qalan Seyidov bu məsələdə bizə ziyan vurur. O, mayın 16-da Bakıda jurnalistlər qarşısında çıxış edərkən istefa versəydi, yaxşı olardı, deyə politoloq bildirib.

"Biabırçılıq, rüsvayçılıq, bütün ölkəyə təhqir. Yalnız Seyidovu Bakının birtərəfli qərarı ilə AŞPA-dan çıxarmaqla, sonra isə onun adından üzr istəyib bütün məsuliyyəti Seyidovun üzərinə atmaqla, rəsmi olaraq bütün baş verənlərin müstəsna olaraq Azərbaycan nümayəndə heyəti başçısının şəxsi təşəbbüsü olduğunu bəyan etməklə bundan təmizlənmək olar. O, bunu qəbul edəcək və susacaq, çünki hələ itərəcəyi şeylər var.

Onda bizi başa düşəcəklər və özlərini elə aparacaqlar ki, guya inanıblar, unudublar. Amma Seyidov AŞPA-da qalsa və orada özündən başqa hamını ittiham etsə, batdığımız bataqlıq daha da dərinləşəcək", deyə Azərbaycanlı bloger "Kavkazskiy Uzel"də yazıb.

"AŞPA-nın Prosedurlar Komitəsi korrupsiyaya qarşı ciddi siqnal verib və Aqramunt, Xuçla, Preda və Seyidov kimi deputatlara qarşı sanksiyalar tətbiq edib. Bu barədə AŞPA-da Sosial-Demokratlar və Yaşıllar deputatlar qrupunun rəhbəri, Almaniyalı deputat Frank Şvab öz akkauntunda yazıb. Parisdə Komitənin xüsusi iclasında sözügedən şəxslərə qarşı sanksiyalar 2 ildən 10 ilə qədər müddətə qəbul edilib.

Xatırladaq ki, aprelin sonlarında AŞPA-da deputatlar arasında korrupsiyaya qarşı mübarizə haqqında xüsusi məruzə geniş müzakirə olunurdu. Bu sənəddə qeyd edilirdi ki, Azərbaycan hakimiyyəti ölkədə insan hüquqlarının və demokratiyanın pozulmasına görə tənqidi minimuma endirmək məqsədilə Avropalı siyasətçiləri ələ almağa milyonlar xərcləyir.

Bunun ən parlaq nümunəsi Almaniyalı deputat Ştrasserin Azərbaycanda siyasi məhbuslar haqqında hesabatını uğursuzluğa düçar etmək üçün İtaliyalı deputat Luka Volonteyə 3 mln. avro ödənilməsidir. Azərbaycan hakimiyyətinin digər lobbiçisi keçmiş AŞPA rəhbəri Pedro Aqramunt idi, o, biabırçı şəkildə vəzifədən məhrum edilib.

Hesabatda Azərbaycan hakimiyyətindən rüşvət alan bir sıra Avropalı deputatların da adları çəkilib. Bu zaman Azərbaycanın AŞPA-dakı nümayəndə heyəti Avropalı deputatları öz tərəflərinə cəlb etməkdə və onlara qanunsuz olaraq pul və hədiyyələr verməkdə ittiham olunub. Rəsmi Bakı bütün bu ittihamlara aydın cavab verməyib, bunun "ermənipərəst qüvvələrin" Azərbaycana qarşı növbəti kampaniyası olduğunu bəyan edib.