AXC-nin 100 illiyi ərəfəsində AXC zirvəsinin baş tutmayan fəthi

Bakı/25.05.18/Turan: 1991-ci il mayın 28-də Azərbaycan Alpinizm Klubunun bir qrup alpinisti Şahdağ massivində fəth həyata keçirərək, bu massivin adsız zirvələrindən birinə (4230 m) "Azərbaycan Xalq Cümhuriyyəti" adını veriblər.

Bu, hələ SSRİ-nin mövcud olduğu dövrdə baş verib və bu tədbirin təşəbbüskarları sonradan DTK-yə bu fikirlərinin səbəbləri haqqında uzun müddət izahat vermək məcburiyyətində qalıblar.

Bununla belə, bu təşəbbüsün təşkilatçıları Nazirlər Kabinetinin elə həmin il dekabrın 16-da müvafiq qərar (№416) qəbul etməsinə, zirvənin adını təsiq etməsinə və müvafiq orqanlara (Elmlər Akademiyası, Geodeziya və Xəritəşünaslıq İdarəsi, İdman üzrə Dövlət Komitəsi) bu adı öz sənədlərinə daxil etmək tapşırığı verməsinə nail olublar.

Eyni zamanda bu əlamətdar hadisəyə həsr edilmiş xatirə nişanı buraxılıb.

"Təəssüf ki, son illər bizim təkcə bu massivdə deyil, ümumiyyətlə ölkəmizin bütün əsas zirvələrinin cəmləşdiyi Şahyaylaq regionunda fəth həyata keçirmək imkanımız olmayıb. Səbəb Ekologiya Nazirliyinin keçmiş rəhbərliyinin bizə mənfi münasibətidir", deyə klubun rəhbəri Saridan Mursakulov Turan agentliyinə bildirib.

Alpinistlər ölkənin AXC-nin 100 illiyini qeyd etdiyi bu günlərdə bu fəthi təkrarlamağı çox istəyirdilər, amma təəssüf ki, yenə müvafiq dövlət orqanlarından icazə ala bilmədilər.

Turan agentliyinin məlumatına görə, bu, 2017-ci ilin dekabrında baş vermiş, qonşu Tfan dağında üç alpinistin həlak olması ilə nəticələnmiş faciə ilə bağlıdır. Bu hadisədən sonra dağa dırmanmağa gizli qadağa tətbiq edilib. -02B-