Azərbaycan uğrunda həlak olan şəhidin qohumları Qazaxıstandan gəliblər

Aprelin 20-də qazax xalqının oğlu Yerbol Turexan oğlu Barımbekovun Birinci Qarabağ Müharibəsi cəbhəsində qəhrəmancasına həlak olmasından 28 il ötür. Bu gün azərbaycanlı hərbçilər və onun Qazaxıstandan gəlmiş doğma qardaşı və qohumu Qazaxıstanın Azərbaycandakı səfirliyinin hərbi attaşesi ilə birlikdə  Bakıda Şəhidlər Xiyabanında qəhrəmanın  məzarını ziyarət edəcəkler.

Turan baş çavuş Barımbekovun döyüş yolu haqqında 11 aprel 2022-ci il tarixində dərc olunmuş “Qazax xalqının naməlum azərbaycanlı qəhrəmanı” məqaləsində məlumat verib. Qarabağın cənubunda 776-cı hərbi hissədə Yerbolla birgə xidmət etmiş zabitlər 1994-cü ildə Azərbaycanı erməni təcavüzkarlardan qorumaq üçün Bakıya gəlmiş və ordumuzda xidmətə qəbul edilmiş qazax gəncdən danışıblar.

Azərbaycan ordusunda kəşfiyyatçı kimi xidmətə başlayan Yerbol Murovdağda və Tərtər-Ağdərə zonasında döyüşüb. 1993-cü il mayın 2-də Bakıya 472-ci kəşfiyyat batalyonunda xidmətə göndərilib, həmin batalyonla birlikdə dövlət əhəmiyyətli bir çox əməliyyatlarda iştirak edib. Kəşfiyyat qrupuna rəhbərlik edib, 8 dəfə düşmənin arxa cəbhəsində tapşırıqları yerinə yetirib.

Bu hərbi hissə ləğv edildikdən sonra Yerbol ayrıca 776 saylı xüsusi təyinatlı əlahiddə batalyona keçiriblər. 1994-cü ilin fevralından hissəTərtər-Ağdərə zonasında döyüşüb və Yerbol kəşfiyyat qrupunun komandiri olub. 1994-cü ilin martında bir qrup kəşfiyyatçı pusquya düşüb, Yerbol qrupu xilas edərkən ağır yaralanıb. O təxliyə edilərək Tərtər xəstəxanasına aparılıb. Lakin dostlarının döyüşə girdiyini öyrəndikdən sonra tam sağalmadan hərbi hissəyə qayıdıb.

1994-cü ilin aprelində təcavüzkar Tərtər rayonunu işğal etmək məqsədilə hücuma keçib. 776 saylı hərbi hissə düşmənin planını puça çıxararaq qəhrəmancasına vuruşub. Aprelin 15-də ali baş komandan Heydər Əliyev bu hissənin xidmətlərini qeyd edib. Aprelin 20-də isə döyüşdə, düşmənin arxa cəbhəsində Yerbol qəhrəmancasına həlak olub.

1992-ci ildə 18 yaşlı Yerbol Karaqanda Universitetinə daxil olmaq istəyib, lakin bacarmayıb və Kokçeqay şəhərində sovet desant briqadasına xidmətə çağırılıb. 1993-cü ildə bu, artıq Qazaxıstan ordusu idi. O, gizirlə münaqişədən sonra qərarını heç kimə demədən oranı tərk edib. Vətəndə Yerbolu ordunu özbaşına tərk etmiş, sonra isə itkin düşmüş hesab ediblər. Ailədə isə onun sağ olduğuna inanmaq istəyiblər.

“Bir gün onların yanına hərbi komissarlıqdan zabit gəlib və Bakıdan daxil olan məlumatı çatdırıb: Azərbaycanın paytaxtında I Qarabağ Müharibəsinin veteranları Yerbol Barımbekovun qohumlarını axtarırlar. Ancaq qəhrəmanın valideynləri o günü görmədilər”, - qəhrəmanın qardaşı Nurbol Barımbekov Turan-a danışıb.

"Ailə sona qədər ümid edirdi ki, qardaşım sağdır. Anam falçıya gedirdi. 1993-cü il mayın 7-də Yerbol evə zəng edərək dedi ki, ayağından yaralanıb, Xanlar şəhərində hərbi hospitaldadır. O xahiş etdi ki, anama deyim ki, narahat olmasın. Onu tapmağa çalışdıq, Müdafiə Nazirliyilə əlaqə saxladıq, amma o vaxt axtarışlar heç bir nəticə vermədi. Azərbaycanla indiki kimi əlaqələr yox idi", - qəhrəmanın qardaşı Nurbol Barımbekov Turan-a danışıb.

Döyüş yoldaşlarının sözlərinə görə, Yerbol qorxmaz döyüşçü olub. Onun xidmət etdiyi hərbi hissənin sayəsində ermənilər Azərbaycanı iki yerə bölmək və kapitulyasiyaya məcbur etmək üçün Kürdəmir yoluna çata bilməyiblər. Yerbolun da daxil olduğu kəşfiyyatçılar qrupu kəşfiyyat tapşırıqlarından birini yerinə yetirərkən 10 gün arxa cəbhədə qalıb, onun meşə ərazisində hərəkət etmək qabiliyyəti sayəsində qrup tapşırığı yerinə yetirərək öz yoldaşlarının yanına qayıdıb, halbuki, yoldaşları onların həlak olduğunu düşünürmüş.

776-cı hərbi hissənin zabitləri - Elçin Məmmədov, Pəsərək Fərzəli, Saleh Əliyev, Rəşid Əliyev və başqalarının qəhrəman Yerbol Barımbekovun adının əbədiləşdirilməsini borc bilirlər.  Qazax gənc 20 illik ömrünün son 2 ilini Azərbaycana verib.

"Bizim borcumuz Bakıda Şəhidlər Xiyabanında dəfn olunmuş Qazaxıstanın qəhtəman oğlu haqda həqiqətləri Azərbaycan və qazax xalqlarının diqqətinə çatdırmaqdır. Azərbaycan uğrunda döyüşlərdə göstərdiyi yardıma görə   hissə komandirinin siyasi bölmə üzrə müavini adından Barımbekovlar ailəsinə və qardaş qazax xalqına təşəkkürümü bildirirəm”, - istefada olan Saleh Əliyev deyib.

Zabitlər qəhrəmanın ölümündən sonra onun orden, medalla təltif edilməsi, adının Azərbaycanda məktəbə və ya küçəyə verilməsi xahişilə Azərbaycan Müdafiə Nazirliyinə və digər dövlət idarələrinə müraciət ediblər. Zabitlərin müraciətinə müxtəlif instansiyalarda baxılır.