Bakı Ağır Cinayətlər Məhkəməsində Turan agentliyinin ünvanına ittihamlar səslənib

Bakı/05.10.22/Turan: Ötən bazar ertəsi Turan-ın müxbiri Bakı Ağır Cinayətlər Məhkəməsinin iclasında iştirak edib. Biznesmen  Əfqan Zeynalovun “Dəmiryol” QSC-nin podrat müqavilələrini yerinə yetirən “Murov” TSK MMC şirkətinin kadrlar şöbəsinin müdiri Nelli Fabriçnayaya qarşı iddiasına baxılıb.

Fabriçnaya özünü tamamilə günahsız hesab edir, bütün ittihamları rədd edir və Zeynalova məxsus mənşəyi məlum olmayan 720 min manatı mənimsəmədiyini iddia edir. İbtidai istintaq zamanı o, müstəntiqin və ittiham tərəfinin təzyiqi  altında etirafedici ifadə verib.

Cinayət ittihamı üzrə prosesin ictimai əhəmiyyəti

Proses ictimai əhəmiyyət kəsb edir, belə ki, şirkətin rəhbəri və onun keçmiş əməkdaşı arasında münaqişənin məhkəmə araşdırılması zamanı (dəmir yolu üçün avtomobil yollarının və qurğuların tikintisi) dövlət idarələri tərəfindən dövlət, mənfəətli müqavilələrin işlərin yerinə yetirilməsi üçün verilməsilə bağlı Azərbaycan praktikasının xüsusiyyətləri  aydınlaşdırılır. Proses Azərbaycan şirkətində işin təşkilinin xüsusiyyətlərini göstərir ki, burada şirkət rəhbəri tabeliyində olan işçinin mənzilinə şəxsi seyf quraşdırır, külli miqdarda pulu bu seyfdə gizlədir, sonra isə onu pulu oğurlamaqda ittiham edir, döyür, əmlakını əlindən alacağı ilə hədələyir.

Üstəlik, məhkəməyə təqdim olunan və hələ  məhkəmədə baxılmayan audioyazılarda şirkət rəhbəri tabeliyində olan işçiyə mənzilini əlindən almaq niyyəti barədə telefonla məlumat verir, onun borcunun məbləğini bir milyon manata çatdırır. Həmçinin audiomesajlarda o da var ki,  Əfqan Zeynalov külli miqdarda pulun müqabilində Nelli Fabriçnayanın üzərindən ittihamı götürülməsini təklif edir və bildirir ki, bununla bağlı Bakı Şəhər Prokurorluğunda razılaşıb. Bundan əlavə, ittiham tərəfi bildirir ki,  Fabriçnaya Zeynalovun ölməsi və pulun ona qalması üçün onu gizli şəkildə zəhərləyib.

Məhkəmə prosesinə hakim Faiq Qəniyev sədrlik edir.

Yazı Əfqan Zeynalovun vəkili, hörmətli İradə Cavadovanın etirazına səbəb olub. Oktyabrın 3-də ikinci iclasda o, Turan agentliyi və yazının müəllifi barədə hakim qarşısında qaldırıb. Onun fikrincə, onlar cəmiyyəti aldadırlar. O, Fabriçnayanın vəkili, prosesə təzyiq etmək üçün mətbuatdan istifadə edən Qəzənfər Rzayevi günahkar hesab edir. Hakim onun Turan agentliyilə bağlı onun fikirlərini dinləməkdən imtina edib, deyib ki, mətbuatın işinə qarışmır, Cavadova isə ərizə ilə məhkəməyə və Vəkillər Kollegiyasına müraciət edə bilər.

Vəkil Rzayev bu iradı şərh edərkən Turan-a deyib ki, o, mətbuat vasitəsilə ictimaiyyəti məlumatlandırır, mətbuatı aldatmır və məlumatların  açıqlanmaması barədə öhdəliyə imza atmayıb.

Sonra məhkəmədə Zeynalovun Fabriçnayaya pul verməsilə bağlı şahidlərin olub-olmamasına (burada tərəflərin fikirləri fərqlidir), Zeynalovun nədənsə ofisdə yox, Fabriçnayanın mənzilində quraşdırdığı seyfindən açarını və şifrəni öz tabeliyində olan işçiyə verməsilə bağlı Zeynalovun  fərqli ifadəsinə baxılıb. Bu bənd  üzrə ittiham tərəfinin bir cavabı var: Zeynalov Fabriçnayaya etibar edib, atası ilə dost olub, pul isə Zeynalovun şəxsi mülkü olub. Bu, vəkil Cavadova tərəfindən onun Turana müraciətinin 19-cu bəndində yazılıb.

Lakin bu cavab şirkət sahibinin 700 min manatı məsələn, bankda və ya əgər həqiqətən evsizdirsə,  yaxın qohumlarının mənzilində yox, özgə mənzildə yerləşdirməsinin səbəbini izah etmir. Üstəlik, daha sonra Zeynalov köhnə dostunun qızına qarşı irəlidə 10 il müddətinə azadlıqdan məhrumetmə ehtimalı ilə cinayət işinin başlanmasına və  onun istintaq təcridxanasına salınmasına nail olub.

Həmçinin vəkil Rzayev şirkət rəhbərindən mübahisəli pulun mənşəyi barədə məlumat ala bilməyib. Qalır ötən  məhkəmə ilcasında şirkət rəhbərinin 700 min manatdan çox pulu (dollar və manatla) zibillikdən tapması barədə verdiyi açıqlama.

Oktyabrın 3-də proses ittiham tərəfinin şahidi, şirkətin əməkdaşı Fazil Hacıyevin uzun nitqi ilə başa çatıb. O, Fabriçnayanın tapşırığı ilə aptekdən necə dərman aldığını danışıb, ancaq  dərmanın adını xatırlamadığını deyib, qablaşdırmasını isə saxlamayıb. Guya Nelli Zeynalovu gizli şəkildə bu dərmanlarla zəhərləyib.

Lakin vəkil Rzayev Turan-a deyib ki, dərmanlar xəstə olan Zeynalova həkimlərin resepti əsasında alınıb. Onun səhhətində krizis və dərmanların zərəri və ya faydası məhkəmənin yox, tibb mütəxəssislərinin müzakirə mövzusu ola bilər. Rzayev deyib ki, Zeynalovun gizli zəhərlənməsi versiyası istintaq mərhələsində prokurorluq tərəfindən rədd edilib. Lakin hakim F.Qəniyev bu ittiham şahidinin çıxışını dinləyib, halbuki, müdafiə tərəfinin bir neçə vəsatətini rədd edib. Vəkil Q.Rzayev israrla onun hüquqlarının təmin edilməsini tələb etdikdə isə hakim müdafiəçiyə iki dəfə xəbərdarlıq edib. Yeni qanuna əsasən, hakimlər vəkilləri məhkəmə prosesini uzatmaq üçün vəsatət qaldırılmasına  görə cərimələyə bilər.

Vəkilin Turan agentliyinə iradları

İttiham tərəfinin vəkili İradə Cavadova Turan-a qarşı dörd səhifəlik irad irəli sürüb. O, giriş hissəsində bildirir ki, məhkəmə istintaqı davam etdiyi üçün iş barədə mətbuata açıqlama vermək niyyətində deyil. Ancaq sonra faktiki olaraq bu işi 26 bənddə ortaya qoyur.

7-16-cı bəndlərdə İ.Cavadova müttəhimin barəsində həbs qətimkan tədbirinin ev dustaqlığından istintaq təcridxanasına dəyişdirilməsinin qanuniliyini və səbəbini izah edir. N.Fabriçnaya şahidlərə təzyiq göstərmək üçün ev dustaqlığı imkanlarından istifadə edib və ev dustaqlığı, bir qayda olaraq, iki ildən az müddətə koloniyada cəza nəzərdə tutan ittiham irəli sürüldükdə tətbiq edilir, vəkil yazır.

18-ci bənddə Cavadova 2015-ci ildə Zeynalovun dövlət vəsaitinin mənimsənilməsi və sənədlərin saxtalaşdırılması ilə bağlı cinayət işi üzrə mühakimə olunması barədə bizim məqalədəki məlumata görə etiraz edir. Vəkil hesab edir ki, Lənkəranda mühakimənin 2022-ci ildəki məhkəməyə aidiyyatı yoxdur.

Bu bənd üzrə Turan-ın öz rəyi var və ondan ibarətdir ki, Lənkəran Ağır Cinayətlər Məhkəməsi (2015-ci il) tərəfindən sübuta yetirilmiş “Avtotransyol” şirkətinin rəhbəri Zeynalovun korrupsiya və sənəd saxtakarlığı faktı 2022-ci ildə “Murov” şirkətinin rəhbərinin, həmin Zeynalovun ittihamlarını şübhə altına alır. Bu prosesdə mətbuat və ictimaiyyət üçün vacib olan ikinci mövzu odur ki, Dəmiryol QSC tərəfindən dövlət vəsaitləri  ölkənin cənubunda avtomobil yollarının çəkilməsi üçün digər  dövlət şirkətinin sifarişinin icrası zamanı artıq bir dəfə korrupsiyada ifşa edilmiş işbazın ixtiyarına verilir.

Vəkilin diqqətinə çatdırırıq ki, mətbuatda yazılan məqalə məhkəmə protokollarından fərqlənir,  jurnalistlər isə məhkəmə iclaslarının stenoqramını yazmırlar, cəmiyyət üçün əhəmiyyəti olan məlumatları çatdırırlar.

Daha az əhəmiyyət kəsb edən, növbəti iclaslarda aydınlıq gətiriləcək məqamları buraxıb, Cavadovanın məktubundakı 24-cü bəndə  toxunacağıq. Bu, 2022-ci il müharibəsində Zeynalovun iştirakı ilə bağlı Azərbaycan cəmiyyəti üçün aktual olan məhkəmə mübahisəsinə aiddir. O, məhkəmənin diqqətini bu işdə həqiqətən də məhkəmə prosesinə aidiyyatı olmayan vəziyyətə cəlb edir.

Guya iki müstəntiqin (!)  yanında sərxoş vəziyyətdə onu təhqir edən Fabriçnayanın müdafiəçisi Qəzənfər Rzayevin barəsində Vəkillər Kollegiyasına göndərilən şikayət ərizəsində Zeynalov ayrıca olaraq göstərir ki, o, qazidir, yəni 2020-ci il 44 günlük müharibənin iştirakçısıdır.

Zeynalov öz veteran statusuna israr etdiyi üçün vəkil Rzayev Əfqan Zeynalovun müharibə iştirakçısı olmaması barədə Müdafiə Nazirliyinin rəsmi məktubunu məhkəməyə təqdim edib. Turan bu barədə yazıda bildirib.

Oktyabrın 3-də Cavadova Müdafiə Nazirliyinin başqa məktubunu məhkəməyə təqdim edib və məktubda deyilir ki, Zeynalov orduya kömək edib, bu isə “döyüş əməliyyatlarında iştirakdan” prinsipial şəkildə fərqlənir. Cavadova Turan-a məktubunda dəqiqləşdirir: onlar mətbuata “zərərçəkən tərəfin müharibədə iştirakına dair istənilən sənədləri” və “dövlət sirri olan bəzi məlumatları” təqdim edə bilər.

22-ci bənddə Cavadova Zeynalovun onu döydüyünü iddia edən müttəhimin ittihamını rədd edir. Lakin Nelli Fabriçnayanın Nəsimi Rayon Prokurorluğuna imzalı məktub var, məktubda o, keçmiş rəhbəri Əfqan Zeynalov tərəfindən döyüldüyünü  faktlarla və şahidlərin adlarını çəkərək bildirir, təkrar ekspertizanın keçirilməsini tələb edir.

P.S. Turan

Məqaləni yekunlaşdırarkən Bakı Ağır Cinayətlər Məhkəməsinə bildirməyi düzgün hesab edirik ki, proseslərdə iştirak edənlərin qarşısında mikrofonlar olsa da onlardan istifadə etmirlər, odur ki, zalda deyilənlərin əksəriyyəti arxada oturan ziyarətçilər və jurnalistlər tərəfindən eşidilmir. Bəzən çıxışçının bütün nitqi anlaşılmaz olur, axı orada proses üçün prinsipial, əsas məlumatlar ola bilər. Yazılardakı qeyri-dəqiqlik buradan qaynaqlana bilər və bu da heç bir halda mətbuatın subyektivliyini göstərmir.

Məhkəmələr  işi elə təşkil etməlidirlər ki, deyilən hər bir söz məhkəmə zalında hamı tərəfindən eşidilsin və başa düşülsün, əks halda mətbuatın və məhkəmə icraatının ictimai əhəmiyyəti şübhə altına düşür.

Turan həmçinin Ədliyyə Nazirliyini, nəhayət, Azərbaycan Respublikası prezidentinin “Elektron məhkəmə” informasiya sisteminin yaradılması haqqında” 2014-cü il 13 fevral tarixli fərmanının, xüsusən də audio, video və digər qeydiyyat aparan  texniki vasitələrdən istifadə olunmaqla məhkəmə proseslərinin qeydiyyatını nəzərdə tutan 2.6-cı bəndin tam həcmdə icrasına və onların onlayn rejimdə  müşahidəsi üçün imkanların yaradılmasına çağırır.

“Elektron məhkəmə” sistemi məhkəmə çəkişməsi zamanı şəffaflığın təmin edilməsinə, insan və vətəndaş hüquq və azadlıqlarının effektiv müdafiəsinin təmin edilməsiə, müasir informasiya texnologiyalarının tətbiqi prosesinin sürətləndirilməsinə yönəlib. Amma praktika göstərir ki, prezidentin sərəncamı sabotaj edilir.--0--