Bank filialının müdir müavini qanunsuz gəlir və sui-istifadələrə görə həbs edilib

Bakı/05.10.21/Turan: Baş Prokurorluq “Günay Bank” ASC-nin 7 saylı filialının müdir müavini Rauf Hüseynov barəsində cinayət işi açıb. O, 780 691 manat ölçüsündə qanunsuz gəlir əldə etməkdə ittiham olunur.

Baş Prokurorluğun məlumatında deyilir ki, 2018-2021-ci illər ərzində yaxın qohum və tanışlarının adına 585 şirkət təsis etməklə həmin şirkətlərin müvafiq dövlət orqanlarında qeydiyyata alınmasına nail olub. 

Onun işlədiyi müəssisənin yaxınlığında icarəyə ofis götürüb qanunsuz olaraq ayrı-ayrı şəxsləri işə cəlb etməklə müxtəlif fiziki və hüquqi şəxslərə məxsus ümumilikdə 53 milyon 933 min manat məbləğində pul vəsaitini özünün faktiki idarə etdiyi şirkətlərin bank hesablarına köçürülərək rəsmi möhür və elektron imzalardan istifadə edib nağdlaşdırmasına və bununla da, qanunsuz olaraq xüsusilə külli miqdar təşkil edən 780 min 691 manat məbləğində gəlir əldə etməsinə əsaslı şübhələr yaranıb.

İş üzrə toplanmış sübutlar əsasında Rauf Hüseynov Cinayət Məcəlləsinin 193.3.2 (xüsusilə külli miqdarda gəlir əldə etməklə yalançı sahibkarlıq) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb edilərək məhkəmə qərarına əsasən barəsində həbs qətimkan tədbiri seçilmişdir. 
Bu məlumat dərc edildikdən sonra “Günay Bank” bəyanat yayaraq, cinayət işinin Hüseynovun bankdakı işi ilə bağlı olmadığını bildirib.

Oktyabrın 5-də Baş Prokurorluq Hüseynovun 2021-ci il sentyabrın 29-na qədər bankın 7 saylı filialında vəzifə tutduğunu bildirib. Sentyabrın 15-də onun xidmət otağında axtarış aparılıb, sentyabrın 16-da isə cinayət işi açılıb. Hüseynov bundan sonra, sentyabrın 29-da vəzifədən azad edilib. -06D-