Bir qrup jurnalist və media eksperti hesab edir ki, Mediya Reyestri KİV azadlığı üçün təhlükədir

Bakı/30.12.23/Turan: Bir qrup Azərbaycanlı jurnalist və media eksperti "Media haqqında" yeni qanundan Media Reyestrinin yaradılması haqqında müddəaları çıxarmağı təklif edib.

Bu mövqe 37 nəfər jurnalist və media eksperti tərəfindən qəbul edilmiş Mövqe Sənədində deyilir.

Xüsusən, qanundan 65.4.4-cü (Çap və onlayn media subyektlərinin fəaliyyətinin dayandırılması və ya onların fəaliyyətinə xitam verilməsi) maddənin çıxarılması təklif edilir.

Mövqe Sənədinin müəllifləri qeyd edirlər ki, yeni qanunun, xüsusən onun Media və Jurnalistlərin Vahid Reyestrinin yaradılması haqqında müddəalarının tətbiqi ifadə və media azadlığını məhdudlaşdırır.

Ümumilikdə media haqqında qanun Azərbaycan Konstitusiyasına və Azərbaycanın imzaladığı beynəlxalq müqavilələrə ziddir, bu, Avropa Şurasının Venesiya Komissiyasının rəyində də əksini tapıb.

Media Reyestri formalaşdırıldıqdan sonra "texniki səbəblər" əsas gətirilərək, 10-dan çox media orqanının reyestrə daxil edilməsindən imtina edilib. Onlarla media subyektinə və jurnalistə xəbərdarlıq edilib.

Növbəti mərhələlərdə yüzlərlə media subyektinin fəaliyyətinə xitam verilməsi təhlükəsi yaranır.

Hazırda qeydiyyatdan keçməmiş media subyektləri və jurnalistlər hətta parlamentin açıq iclaslarına belə buraxılmır, regionlarda isə onların fəaliyyəti üçün maneə yaradılır.

"Belə bir xoş olmayan durum, təkcə yüzlərlə mediada çalışanların fərdi problemlərlə üzləşməsi deyil, ölkəmizin media və ifadə azadlığı ilə bağlı gələcəyinə sağalmaz yaralar vuracaq", deyə sənəddə qeyd edilir.

Sənədi Ələsgər Məmmədli, Xədicə İsmayıl, Şahvələd Çobanoğlu, Alya Yaqublu, Aynur Elgünəş, Xalid Ağaliyev, Kamran Mahmudov, Ülvi Həsənli, Mehman Əliyev, Rövşən Hacıbəyli, Şəmşad Ağa və digərləri imzalayıblar. 03B06