Biznesmenin anasi oğlunun qətlində general Rövşən Əkbərovu ittiham edir

Bakı/24.06.11/Turan: Kiyevdə biznesmen Elçin Əliyevin qətlindən 10 ildən çox keçməsinə baxmayaraq, cinayətin üstü hələ də açılmayıb. Buna səbəb Azərbaycanda qatilin yüksək səviyyədə himayə olunmasıdır. Bu barədə bugünki mətbuat konfransında mərhumun anası Səmayə Əliyeva bildirib.

O, oğlunun qətlində silahlı qüvvələrin generalı, milli ordunun böyük hərbi birləşməsinin komandiri Rövşən Əkbərovu ittiham edir.

“Rövşən Əkbərov qatildir. Onun yeri həbsxanadır”, deyə mərhumun anası bildirib.

E.Əliyev 2001-ci il iyunun 1-nə keçən gecə qətlə yetirilib. Anasının sözlərinə görə, o, fitnə-fəsadın və Ukraynada Azərbaycan səfiri vəzifəsi uğrunda mübarizənin qurbanı olub. Belə ki, səfirlik E.Əliyevə məxsus binada yerləşirdi. Həmin vaxt Diaspora ilə iş üzrə Dövlət Komitəsinin hazırki sədri Nazim İbrahimovun diplomatik missiyası başa çatırdı.

Rövşən Əkbərov həmin vaxt Kiyevdə Hərbi Akademiyada təhsil alırdı və səfir vəzifəsinə öz adamı olan Tələt Əliyevi gətizdirmək istəyirdi. Lakin E.Əliyev onun rəqibi ola bilərdi.

Əkbərov Əliyevi səfirliyin həyətində qonaqlığa dəvət edib. Lakin söhbət baş tutmayıb. Bundan sonra Əkbərov öz adamları ilə birlikdə Əliyevin arxasınca gedib və səfirliyin yaxınlığındakı kafedə şahidlərin gözü qarşısında biznesmen qətlə yetirilib.

Əkbərov səfir İbrahimovun onun toxunulmazlığı haqqında saxta arayış verməsi sayəsində həbsdən qaçmağa müvəffəq olub, deyə mərhumun anası iddia edir.

Bununla əlaqədar olaraq Ukrayna prokurorluğu bütün materialları Azərbaycan Baş Prokurorluğuna göndərib. Lakin 10 il ərzində Baş Prokurorluğa və digər dövlət orqanlarına çoxsaylı müraciətlərə baxmayaraq, cinayətin üstü hələ də açılmayıb.

E.Əliyevin valideynlərinə rəsmi olaraq “istintaqın davam etdiyini” bildirirlər, qeyri-rəsmi söhbətdə isə “generalın yüksək səviyyədə hamiləri olduğunu” etiraf edirlər.

İki il əvvəl Əliyev Qəbələdə prezident İlham Əliyevə yaxınlaşmağa müvəffəq olub və öz ərizəsini və Ukrayna prokurorluğunun Rövşən Əkbərovun qətldə əli olması haqqında dəlillərə dair sənədini prezidentə və xanımı Mehriban Əliyevaya təqdim edib. Prezident məsələni araşdırmağa söz verib.

Bundan sonra baş prokurorun birinci müavini Rüstəm Usubov Səmayə Əliyevanı qəbul edib, amma bunun heç bir nəticəsi olmayıb.

“Mən bir daha Qurana əl basaraq bütün vətəndaşların hüquqlarını müdafiə edəcəyinə dair verdiyi müqəddəs sözü tutmaq çağırışı ilə prezident İlham Əliyevə müraciət edirəm və qatilin layiqincə cəzalandırılmasını xahiş və tələb edirəm”, deyə qətlə yetirilmiş biznesmenin anası bildirib.

O, həmçinin Ukrayna Baş Prokurorluğundan sorğusuna verilmiş rəsmi cavabın surətini təqdim edib. Sənəddə qeyd edilir ki, qətli təhqiq edən müstəntiq “oğlunuz qətlində Əkbərov Rövşən Telman oğlunun əli olduğuna dair dəlillər əldə edib”.

Turan agentliyi bu məlumatda adı çəkilən digər şəxslərə və qurumların rəyini dərc etməyə hazırdır. -06C-