![Açiq mənbələrdən foto.](https://turan.az/resized/media/2023/main/082400065741-750-500-resize.webp)
Açiq mənbələrdən foto.
Bakı/24.08.23/Turan: Bloger Cəmil Məmmədli məhkəmə istintaqı müddətinə həbs edilib. Vəkil Fariz Namazlı Turan-a bildirib ki, belə bir qərarı bu gün Sumqayıt Ağır Cinayətlər Məhkəməsi verib.
Onun sözlərinə görə, Cəmil Məmmədli Cinayət Məcəlləsinin 221.2.2 ((xuliqanlıq, bir qrup şəxs tərəfindən törədildikdə), 182.2.1 (qabaqcadan əlbir olan bir qrup şəxs halında xeyli miqdarda əmlakı hədə-qorxu ilə tələb etmə), 178.2 (dələduzluq, eyni əməllər bir qrup şəxs tərəfindən törədildikdə) maddələri ilə təqsirləndirilir.
"Bu gün hazırlıq iclası idi. Dövlət ittihamçısı və zərər çəkmiş şəxslər vəsatət verib ki, Cəmi Məmmədli proses iştirakçılarına qanunsuz olaraq təsir göstərir. Həmçinin sosial şəbəkələrdə onlar haqqında təhqiredici məzmunda məlumatlar paylaşır.
Onların iddiasıa görə, bununla Cəmil Məmmədli proses işirakçılarına və məhkəmənin qanuni keçirilməsinə təsir gəstərir. Lakin müdafiə tərəfi etirazını bildirdi ki, Məmmədlinin sosial şəbəkələrdə yazdıqlarının məhkəməyə aidiyyatı yoxdur. Həm də məhkəməyə onunla bağlı bir sübut təqdim olunmayıb ki, hansı proses iştirakçısına hansı təsir göstərilib. Buna baxmayaraq, məhkəmə vəsatəti təmin etdi və Cəmil Məmmədli barədə imkan tədbirini həbs qətimkan tədbiri ilə əvəz etdi”, Namazlı bildirib.
Onun sözlərinə görə, Məmmədliyə qarşı iddialar üç epizoddan ibarətdir.
Bunlardan biri xuliqanlıq epizodudur.
Onun 2022-ci ilin dekabrında Xaçmaz rayonunda baş vermiş yol-nəqliyyat hadisəsi nəticəsində iki nəfərə bədən xəsarəti yetirdiyi iddia edilir.
“Hədə-qorxu ilə tələb etmə” və “dələduzluq”a gəlincə, bu, Həbibovlar ailəsinin və digər “zərərçəkmişlərin” şikayəti əsasındadır.
"İddiaçının anası 2010-cu ilədək bazarın müdiri olub və öldürülüb, qətlin üstü hələ də açılmayıb. Onlar iddia edir ki, 2017-ci ildə Cəmil Məmmədli onlara zəng edib ki, qətlin üstünü açacaq və prokuroluğa guya qanunsuz təsir göstərəcək və bu xidmətinə görə onlardan 10 min manat alıb.
Lakin işdə bu məbləğin Məmmədliyə verilməsini təsdiq edən heç bir sübut yoxdur. Bir sıra digər zərərçəkənlər də var, onlar iddia edir ki, Məmmədli həmin şəxsləri gözdən salan məlumatların sosial şəbəkələrdən silinməsi müqabilində onlardan pul tələb edib.
Lakin zərərçəkmişlər özləri də təsdiqləyirlər ki, onlar pulu şəxsən Məmmədliyə verməyib, Dəyanət adlı şəxs vasitəsilə göndərib. O, özü də istintaq zamanı etiraf edib ki, pul alıb, lakin o, təqsirləndirilən şəxs qismində cəlb edilməyib”, - deyə vəkil davam edib.
O qeyd edib ki, Məmmədli barəsində həbs-qətimkan tədbirinin seçilməsini Həbibovlar ailəsi tələb edib.
"Onlar bundan öncə Cəmil Məmmədlini həbs etmək tələbi ilə onu xüsusi ittiham qaydasında məhkəməyə verib. Lakin rayon məhkəməsi onun barəsində islah işləri kəsib. Bundan sonra onlar bu qərardan apellyasiya şikayəti edib. Belə görünür ki, onların məqsədi sadəcə Cəmil Məmmədlini həbs etdirməkdir”, - vəkil qeyd edib.
Vəkil məhkəmənin həbs-qətimkan tədbiri seçməsi qərarını qanunsuz adlandırıb.
"Çünki Cəmil Məmmədli barəsində bir sübut yoxdur. O həm də məhkəmənin çağırışından yayınmır, prosesə vaxtında gəlir, daimi yaşayış yeri var", - vəkil deyib.
Onun fikrincə, Məmmədlinin həbsi onun ifadə azadlığını məhdudlaşdırmaq məqsədi daşıyır.
Öz növbəsində Məmmədliy qarşı iddiaçılardan biri olan Fuad Həbibov Turan-a deyib ki, ilkin istintaq orqanı, yəni Daxili İşlər Nazirliyinin Baş Təhqiqat və İstintaq İdarəsi Cəmil Məmmədli barəsində polisin nəzarətinə verilmə imkan tədbiri təyin etmişdi.
"Yəgin onun jurnalist fəaliyyəti nəzərə alınmışdı. Lakin cinayət işinin istintaqı yekunlaşdırılıb Sumqayıt Ağır Cinayətlər Məhkəməsinə göndərildikdən sonra qanunun tələblərini pozub, şahidlərə təsir edib, onların səsini yazıb ictimailəşdirməklə hədələyib. Əsasən də bizim ailəni hədəf göstərib, hansısa videomaterialları yaymaqla hədələyib", - deyə Həbibov bildirib.
Məmmədli əvvəllər “Azadlıq” radiosunun Azərbaycan xidməti ilə əməkdaşlıq edib.
Son illərdə o, əsasən sosial şəbəkələrdə paylaşımlar edir.
Eyni zamanda ona qarşı bir neçə dəfə, o cümlədən Quba rayonunun keçmiş icra başçısı tərəfindən diffamasiya iddiası qaldırılıb və Məmmədli islah işləri cəzasına məhkum edilib. 06
Rəy yaz