Daha 155 Azərbaycan vətəndaşı quru yolla Rusiyadan vətənə qayıdıb

Bakı/23.11.20/Turan: Dağıstan ərazisindən keçməklə quru yolla Azərbaycan vətəndaşlarının ölkəyə təxliyəsi davam etdirilir.

Bunu Turana Xarici İşlər Nazirliyinin mətbuat xidmətinin rəhbəri Leyla Abdullayeva bildirib. 

XİN sözçüsünün sözlərinə görə, axırıncı dəfə noyabrın 20-də aralarında 35 uşaq, 45 qadın olmaqla 155 nəfərdən ibarət qrup gətirilib. Bu qrupda xüsusilə həssas kateqoriyaya daxil olan şəxslər - qadınlar, uşaqlar, xəstələr, yaşlılar üstənlik təşkil edib".

L.Abdullayeva əlavə edib ki, bundan sonra da vətəndaşların quru yolla ölkəyə təxliyəsi davam etdiriləcək.

XİN rəsmisi bildirib ki, vətəndaşlar müəyyən olunmuş siyahılar üzrə yaşlılar, xəstələr, azyaşlı uşaqlar olan ailələr ilk növbədə ölkəyə gətirilir. "Bu kriteriyalar əsas götürülür. Eyni zamanda sərhədə gəlib həmin gün Azərbaycana keçən Azərbaycan vətəndaşları rəsmi qaydada müraciət edib qayıtması ilə bağlı bildiriş alan adamlardır. Müraciət edən şəxslərə bir müddət sonra bildirilir ki, onlar hansı tarixdə gəlib ölkəyə keçə bilərlər. Sərhəddə gözləyən vətəndaşlar isə çox güman ki, heç bir bildiriş almadan nizamsız şəkildə gələn vətəndaşlardır".

L.Abdullayeva vurğulayıb ki, sərhəddə gözləyən vətəndaşlar üçün hava şəraiti nəzərə alınmaqla daha müvafiq şəraitdə gözlənilməsi təmin edilir. "Bundan sonra da Nazirlər Kabineti yanında Operativ Qərargahın müəyyən etdiyi keçid sayına uyğun olaraq vətəndaşlarımızın quru yolla Dağıstandan ölkəyə gəlməsi istiqamətində tədbirlər davam etdiriləcək". -021В-