Daha bir ağırlıqqaldıran diskvalifikasiya olunub

Bakı/16.04.19/Turan: Beynəlxalq Ağırlıqqaldırma Federasiyası (IWF) dopinqə görə Azərbaycanın daha bir idmançısına sanksiya tətbiq edib. Azərbaycan Ağır Atletika Federasiyasından (AAAF) xəbəri təsdiqləyiblər.

Ağırlıqqaldıran Elmir Alıyev dopinq-testin müsbət nəticəsinə görə, 4 il müddətinə diskvalifikasiya olunub.

"Amma bu hər hansı beynəlxalq yarışla bağlı olmadığı üçün idman nəticəsinə təsiri yoxdur. 56 kq. çəkidə çıxış edən ağırlıqqaldıranın cəzası 12 sentyabr 2018-ci ildən qüvvəyə minib və 12 sentyabr 2022-ci ildə başa çatacaq. Artıq E.Ağayev bu 4 ildə elə bir yaş həddinə çatacaq ki, ağırlıqqaldırmada idmançı olaraq iştirak etməyəcək",- Federasiyadan bildiriblər.

Fedarasiya dopinq-testin təkrar analizlərinin müsbət nəticə verməsi səbəbindən Azərbaycanın 5 atletinin cəzaya məruz qalmasına da münasibət bildirib: "2008-ci ildə Pekin olimpiadasında Sərdar Həsənov (62 kq.), İntiqam Zairov (85 kq.) və Nizami Paşayev (94 kq.), Londonda isə Boyanka Kostova (58 kq.) və İntiqam Zairovun (94 kq.) dopinq-testlərinin təkrar analizləri müsbət nəticə verib. Amma həmin idmançılar da artıq yarışlara idmançı olaraq çıxmaq dövrünü bitirirlər, daha çox məşqçi kimi iştirakçı ola bilərlər. Onların demək olar ki, hamısı veteran statuslu idmançıar sırasındadır".

Federasiya analizlərin nəticəsi ilə razılaşmadığını bildirib: "Əlbəttə, bu nəticələrlə razı deyilik. Səbəb isə budur ki, analizlər götürülən zaman cavablar müsbət çıxmır. Üstündən bir neçə il keçdikdən sonra qanın yeni avadanlıqlarla yoxlanıldığı deyilir və "müsbət nəticələr" üzə çıxır. -05B-