Ekspertiza rəylərinin Gülalıyevin ailəsinə verilməməsi qanunsuzdur - ekspert

Bakı/11.02.21/Turan: YNH-dən sonra koma vəziyyətinə düşmüş hüquq müdafiəçisi Oqtay Gülalıyevin nümayəndələrinə və vəkilinə məhkəmə-tibbi ekspertizanın nəticələri təqdim edilmir.

 Məhz bu rəylər əsasında Nəsimi Rayon Prokurorluğu qəzadan sonra fəalı müalicə edən həkimlərə qarşı cinayət işi açmaqdan imtina etmişdi.

O.Gülalıyevin yaxınları Turan-a bildiriblər ki, ailənin yanvarın əvvəlində Baş prokuror Kamran Əliyevə müraciətindən sonra cinayət işinin dayandırılması haqqında qərar ləğv edilib və Nəsimi rayon Prokurorluğu tərəfindən işin təkrar araşdırılmasına başlanılması barədə göstəriş verilib.

Təkrar araşdırma  yenidən müstəntiq Asiman Hacıyevə tapşırılıb. "Yanvarın 25-də müstəntiq Asiman Hacıyevlə görüşdə cinayət icraatına xitam verilməsi haqda qərarın surəti bizə təqdim edilib. Bununla yanaşı, məhkəmə-tibbi ekspertizanın rəylərinin verilməsi üçün Nəsimi rayon prokurorunun adına ərizə yazmaq təklif olunub. Belə müraciət yerindəcə yazılıb, amma rəy yenə də verilməyib".

Fevralın 3-də vəkil Fuad Ağayev müstəntiq Hacıyevlə görüşdə bir daha ekspertizanın rəyini istəyib.  Ancaq müstəntiq rayon prokurorunun göstərişinə istinad edərək deyib ki, bunu edə bilməz. "Müstəntiq və prokurorluq orqanları məhkəmə-tibbi ekspertizanın rəylərinin surətlərini ailəyə və vəkilə verməkdən imtina etməklə qanunu pozurlar", deyə vəziyyəti Turan-a şərh edən hüquq sahəsində ekspert, Vəkillər Kollegiyasının üzvü Aqil Lahıc bildirib.

Onun sözlərinə görə, istintaq orqanı cinayət işinin başlanmasının rədd edilməsi haqqında qərar verəndən, cinayət işinə xitam verəndən və ya məhkəməyə göndərəndən sonra bütün sənədləri tərəflərə təqdim etməlidir. "Ailəsi zərərçəkən şəxs kimi tanınıbsa, onlara, tanınmayıbsa vəkilə bütün sənədlər göndərilməlidir. Bu, sənədlərə çatımlılıq hüququnun, eyni zamanda şəxsin ədalətli mühakiməsi hüququnun tərkib hissəsidir. Ədalət mühakiməsi hüququ məhkəməyə aid olsa da, o istintaqda da tədbiq olunur. Sənədlər verilmirsə, bu, Cinayət Prosesual Məcəllənin ciddi pozuntusudur", deyə ekspert qeyd edib.

Baş Prokurorluqdan şərh almaq mümkün olmayıb.

Hüquq müdafiəçisi Oqtay Gülalıyevi 2019-cu il oktyabrın 29-da Bakının mərkəzində piyada keçidində avtomobil vurub. O, xəstəxanaya aparılıb, amma yalnız oktyabrın 30-da özəl klinikada Respublika Neyrocərrahiyyə xəstəxanasının cərrahları tərəfindən əməliyyat olunub.

Yanvarın 25-də Nəsimi Rayon Məhkəməsi yol-nəqliyyat hadisəsini törətməkdə ittiham olunan Kənan Abdullayevi Cinayət Məcəlləsinin 263.1.-1 maddəsi (yol hərəkəti və nəqliyyat vasitələrinin istismarı qaydalarının pozulması, ehtiyatsızlıqdan zərər çəkmiş şəxsin sağlamlığına ağır zərər vurulmasına səbəb olduqda) üzrə təqsirli bilib. Ona cəzasını məntəqə tipli cəzaçəkmə müəssisəsində çəkməklə, 2 il 3 ay həbs cəzası verilib. Bundan başqa, Abdullayev 3 il müddətinə avtomobil sürmək hüququndan məhrum edilib. -06B-