Fuad Ağayevin Feysbuk hesabının ələ keçirilməsinə cəhd olunub

Bakı/04.05.21/Turan: Məşhur vəkil Fuad Ağayev çərşənbə axşamı Feysbuk hesabının sınıdırılmasına cəhd olunduğunu bildirib. Onun sözlərinə görə, İlham Hüseynin hesabından naməlum şəxs ona yazıb və iqtisadi böhran mövzusunda müsahibə verməsini istəyib. Razılıq aldıqdan sonra Ağayevə kompüterinə “Zum”a bənzər, amma “daha təhlükəsiz” proqram yükləməyi təklif edib. Rədd cavabı alan naməlum şəxs müxtəlif bəhanələrlə Ağayevin təklif etdiyi proqramı yükləməyə razılaşdırmağa çalışıb və şübhələri artırıb. Bütün dialoq yazışma şəklində gedib.

“Bu məqamda məzhəkəyə son qoymaq üçün messencerə zəng vurdum - zəngdən dərhal imtina etdi! Yazdım: “İndi zəng etdim, cavab olmadı. Bir səsini çıxart, bilim İlham Hüseyndir”. Yazdı: “bəy, yığacağam mən sizi, gözləyin zəhmət olmasa. Narahat olmayın”. Və o gedən getdi. Mən Əsl İlham Hüseynə zəng vuranda o dedi ki, Feysbuk hesabı bir neçə gün əvvəl ələ keçirilib”, deyə Fuad Ağayev yazıb.

Qeyd edək ki, Fuad Ağayev müntəzəm olaraq hakimiyyətin daxili və xarici siyasəti ilə bağlı tənqidi statuslar yazır, həmçinin hakimiyyətin təqib etdiyi siyasi fəalların və jurnalistlərin hüquqlarını müdafiə edir. O, həmçinin Avropa İnsan Hüquqları Məhkəməsində bir çox işdə vəkil qismində çıxış edir. -02B-