Haradasınız, cənab İbrahim Məmmədov?

Bakı/05.05.21/Turan: Nazirlər Kabinetinin mətbuat katibi İbrahim Məmmədov öz birbaşa vəzifəsindən - mətbuatla işdən yayınır.

Cənab Məmmədov telefon zənglərinə cavab vermir, kütləvi informasiya vasitələrinin sorğularını cavabsız qoyur.  “AstraZeneka" peyvəndi və vaksinasiya prosesi ilə bağlı Turan agentliyinin sualları ilə əlaqədar belə olub.

Agentlik İcbari Tibbi Sığorta üzrə Dövlət Agentliyindən uzun müddət cavab ala bilmədikdən sonra mətbuat katibinə suallarla müraciət etməyə çalışıb.

Məmmədova ünvanlanan sorğu təsadüfi deyildi. Koronavirus və onun nəticələri ilə mübarizə üçün 27 fevral 2020-ci ildə Nazirlər Kabineti yanında Operativ Qərargah yaradılıb.

COVİD-19 haqda rəsmi sayt fəaliyyətə başlayır. Sayt Azərbaycanda virusa qarşı mübarizənin vəziyyəti, yoluxma statistikası barədə məlumat verir, əhali üçün tövsiyələr, eləcə də əlavə məlumat üçün operatorla söhbət təqdim edir.

Məmmədov uzun müddət qərargahın brifinqlərini aparıb və informasiya işini təşkil edib. Telefon zənglərinə cavab vermədiyindən agentlik aprelin 1-də ona yazılı müraciət etmək məcburiyyətində qalıb:

Konstitusiyanın 50-ci maddəsi və Azərbaycan Respublikasının “İnformasiya əldə etmək haqqında” və “Kütləvi informasiya vasitələri haqqında” qanunlarına müvafiq olaraq aşağıdakı suallara cavab verilməsini xahiş edirəm:

1.“AstraZeneka” vaksininin tədarükü haqqında sazişi nə vaxt, kim tərəfindən və kiminlə imzalanıb?

2."AstraZeneka" vaksini hansı miqdarda və hansı qiymətə ölkəyə çatdırılacaq?

3. Dünyanın bir sıra ölkələrində bu vaksinin tətbiqinin dayandırılması ilə əlaqədar “AstraZeneka” vaksininin tədarükü haqda sazişin icrası dayandırılacaq, yoxsa davam etdiriləcək?

4. Operativ Qərargahın akkreditə etdiyi və PSR testinin keçirildiyi labaratoriya və klinikaların siyahısı varmı? Vətəndaş istənilən i yerdə test etdirə bilərmi, yoxsa nəticələri təqdir edilən və etibarlı hesab edilən klinikalar var?   

5. AZAL xaricə gedən sərnişinlərin testdən keçməsini tələb edir və test keçmək üçün lazım olan klinikaların siyahısını öz saytında dərc edir. Bu klinikaların çoxu özəldir. AZAL-ın PSR testi üçün klinikanı özü təyin etməsi normaldırmı?

Məsələn, Türk Hava Yolları Türkiyə Səhiyyə Nazirliyi tərəfindən təsdiqlənmiş bütün klinikaların PSR cavablarını qəbul edir.

Qanunvericiliyə əsasən Məmmədov sualları operativ, 24 saatdan gec olmayaraq, dəqiqləşdirməyə zərurət olduğu halda isə 48 saat ərzində cavablandırmalı idi.

İstənilən halda, o, agentliyi məlumatlandırmalıydı ki, cavabı hazırlayır və ya cavab verməkdən imtina edir və bunun səbəbini qanunvericiliyə uyğun olaraq əsaslandırmalıydı (dövlət sirri ağlabatan deyil).

Bəs mətbuat katibi nə edir? Bir həftə sonra (8 aprel) Nazirlər Kabineti agentliyin məktubunu Səhiyyə Nazirliyinə göndərir ki, onlar cavab versinlər. Mayın 3-də Səhiyyə Nazirliyi direktivi İcbari Tibbi Sığorta üzrə Dövlət Agentliyinə göndərir. Mayın 5-də direktivin surəti Turan agentliyinə göndərilib.

Nəticə: Agentlik bir aydan çoxdur ki, Məmmədovun günahı üzündən Nazirlər Kabinetindən qoyulan suallara cavab ala bilmir və öz peşə vəzifəsini yerinə yetirə bilmir, ictimai maraq doğuran vəziyyətə aydınlıq gətirə bilmir.

Görünür, Səhiyyə Nazirliyindən məktub təsadüfən gəlməyib. Belə ki, mayın 4-də Turan agentliyinin direktoru Mehman Əliyev baş nazir Əli Əsədova məktub göndərib və hökumətin  mətbuat katibinin fəaliyyətsizliyini göstərib.

«Mənim baş nazirə necə davranmaq barədə məsləhət verməyə ixtiyarım yoxdur, ancaq informasiya işi dövlət siyasətinin mühüm tərkib hissəsi olduğu üçün hökumətin maraqları baxımından deyə bilərəm ki, mətbuat katibinin fəaliyyətində düzəlişə ehtiyac var",- Mehman Əliyev bildirib.—0—