Bakı/25.11.17/Turan: "Kanal 13" internet televiziyasının həbsdə olan icraçı direktoru Əziz Orucovun işi üzrə Bakı Ağır Cinayətlər Məhkəməsində keçirilən proses yekunlaşır. Artıq məhkəmə istintaqı başa çatıb.
Noyabrın 24-də keçirilən məhkəmədə jurnalistin vəkilləri bir neçə vəsatət qaldırıblar. Məsələn, müdafiəçi Cavad Cavadov hakimlərdən qanunun şərh olunması üçün Konstitusiya Məhkəməsinə müraciət etmələrini istəyib:
"Cinayət Məcəlləsinin 192.1 maddəsində "dövlət qeydiyyatına alınmadan" ifadəsindən sonra mötərizədə "vergi uçotuna alınmadan" ifadəsi yazılıb. Yəni konkretləşdirilib ki, hansı fəaliyyət qanunsuz sahibkarlıq hesab olunur. Amma istintaq orqanı götürüb qrant vəsaitləri üzrə əməliyyatları qanunsuz sahibkarlıq kimi qələmə verib. Xahiş edirik, Konstitusiya Məhkəməsi qanunun bu maddəsini şərh eləsin".
Daha bir vəsatət təqsirləndirilən jurnalistin qardaşı Anar Orucovun dindirilməsi haqda olub. Vəkil deyir ki, istintaq orqanı heç bir sübut-dəlilə istinad etmədən Ə.Orucovu "Qafqaz Media Tədqiqatlar Mərkəzi" İctimai Birliyinin faktiki rəhbəri kimi təqdim edib, həmin təşkilata ayrılan qrantlara görə ona ittiham verib. Əslində isə təşkilatın rəhbəri onun qardaşı A.Orucovdur.
"Cinayət işinin materiallarından da, məhkəmədə dindirilən şahid ifadələrindən də görünür ki, Əziz Orucovun bu təşkilata heç bir aidiyyəti yoxdur. Təşkilatın həm hüquqi, həm də faktiki rəhbəri Anar Orucov olub. O, bir neçə ildir ki, Almaniyada yaşayır. Xahiş edirik, ya internet vasitəsilə videogörüntü ilə dindirilsin, ya da onun dindirilməsi üçün Almaniyanın məhkəmə orqanlarına müraciət olunsun", - vəkil C.Cavadov vəsatətini əsaslandırıb.
O biri vəkil Əlibaba Rzayev isə Ə.Orucovun işi üzrə yoxlama aktını imzalayan şəxslərin və rəy vermiş ekspertin məhkəmədə dindirilməsi haqda vəsatət qaldırıb.
"Prokurorluq iddia edir ki, qrant müqaviləsi qeydə alınmayıbsa, qrant sayılmır. Yaxud həmin qrant vəsaitləri üzrə əməliyyatları qanunsuz sahibkarlıq kimi qələmə verir. Heç nəyə də əsaslanmır, qanuna istinad eləmir. Ekspert yoxlama aktında yazılanları rəyə köçürüb imzalayıb. Ona görə bu adamların dindirilməsi vacibdir", - müdafiəçi bildirib.
Jurnalist vəkillərinin vəsatətlərini müdafiə edib.
Mirzə Xankişiyevin sədrlik etdiyi hakimlər kollegiyası isə onların heç birini təmin etməyib.
Məhkəmə dekabrın 5-də davam edəcək. Həmin gün prokurorun çıxışı gözlənilir.
Ə.Orucov mayın 2-də polisə müqavimət ittihamı ilə saxlanılıb, ona 30 sutka inzibati həbs cəzası verilib. Azadlığa buraxılmalı olduğu gün - iyunun 1-də Baş Prokurorluğun Ağır cinayətlərə dair işlər üzrə İstintaq İdarəsində barəsində cinayət işi başlanıb, ona Cinayət Məcəlləsinin 192-ci (qanunsuz sahibkarlıq) və 308-ci (vəzifə səlahiyyətlərindən sui-istifadə) maddələri ilə ittiham verilib. Elə həmin gün Nəsimi Rayon Məhkəməsinin qərarı ilə onun barəsində 4 aylıq həbs-qətimkan tədbiri seçilib.
Ə.Orucov ittihamları qəbul etmir. "Kanal 13"ün rəhbəri, Almaniyada mühacir olan A.Orucov da bildirib ki, qardaşı onun özünün və rəhbərlik etdiyi media orqanının tənqidçi fəaliyyətinə görə həbs olunub.-0-
Cəmiyyət
-
Son günlər ictimaiyyətin diqqəti 2024-cü il noyabrın 8-də Bakıda açılışı keçirilən Qarabağ Müharibəsinə həsr olunmuş yeni Qələbə Abidəsi ətrafında yaranan vəziyyətə yönəlib. Azərbaycanın tanınmış memarı və tarixi memarlıq artefaktlarının tədqiqatçısı Elçin Əliyev abidənin detalları ilə bağlı fotoşəkillər çəkməyə çalışarkən mülki geyimdə olan şəxslərin gözlənilməz maneəsi ilə üzləşib.
-
Şəmkir rayonunda suyun səviyyəsinin ildən-ilə azaldığı Zəyəmçay məişət tullantıları ilə çirkləndirilir, yerli sakinlər bildiriblər. Çayın təmizlənməsi üçün aidiyyatı qurumlara müraciət etsələr də, tədbir görülməyib.
-
Cümə günü paytaxtda hava dəyişkən olacaq. Gecə bəzi yerlərdə yağış yağa bilər. Mülayim cənub-qərb küləyi əsəcək, axşam şimal-qərb küləyinə geçəcək. Havanın temperaturu gecə müsbət 10 +12, gündüz müsbət 13 + 17 dərəcə, rütubət 70-80 faiz olacaq.
-
Dünyanın 28 ölkəsinin 100 universitetini təmsil edən 159 professor və müəllimdən ibarət koalisiya Azərbaycanın ekologiya və təbii sərvətlər naziri və COP29-un prezidenti Muxtar Babayevi 2023-cü ilin iyulundan qeyri-müəyyən müddətə ev dustaqlığında olan alim iqtisadçı və ekologiya fəalı, doktor Qubad İbadoğlunun azadlığa buraxılmasını müdafiə etməyə çağırıb. Azərbaycanın COP29 iqlim konfransına ev sahibliyi etdiyi bir vaxtda göndərilən məktubda doktor İbadoğlunun kritik səhhətinə və onun korrupsiya ilə mübarizəyə və qalıq yanacaq sənayesində şəffaflığın təşviqinə verdiyi töhfələrə istinad edərək, təcili tədbirlər görülməsinə çağırılır.
Rəy yaz