Hücuma məruz qalan jurnalist Aytən Məmmədova "ağıllanmaq" məsləhətlərini qəbul etmir

Bakı/11.05.22/Turan: Mayın 8-də 23:45 radələrində naməlum şəxsin hücumuna məruz qalan jurnalist Aytən Məmmədova Metada bəyanat yayıb. O, bıçaqdan istifadə ilə zorakılığa və 12 yaşlı qızının ünvanına təhdidlərə məruz qaldıqdan sonra stresdən gecələri 2 saatdan artıq yata bilmir. 

Ötən iki gün ərzində Məmmədova dəfələrlə Binəqədi rayon polis idarəsində olub, orada və digər idarələrdə ifadə verib. Hadisənin ertəsi gün səhər məhkəmə-tibb ekspertizasına gedib, amma məlum olub ki, onlar mayın 9-da, bayram günü işləmirlər. Növbəti gün ekspertlər günorta saat 3-dən sonra işləmədiklərinə görə yenə onu müayinə etməyiblər, saat 3-ə qədər isə Məmmədova polis idarələrində ifadə verib.

Binəqədi rayon polis idarəsində CM-in 134-cü maddəsi ilə (öldürməklə və ya sağlamlığa ağır zərər vurmaqla hədələmə) cinayət işi açılıb.

Jurnalist bildirib ki, heç kimlə özünə və qızına qarşı zorakılığa səbəb olacaq şəxsi ədavəti yoxdur. O, liftdə hücuma məruz qalmasının peşə fəaliyyəti ilə bağlı olduğu düşüncəsində olduğunu təkrar edir. Məmmədova həmçinin "ağıllanmaq" məsləhətlərini qəbul etmədiyini və peşə borcunu yerinə yetirməyə davam edəcəyini bildirir.

Məmmədova hələlik hüquq-mühafizə orqanlarının fəaliyyətinə qiymət verməkdən çəkinir, ccinayətkar saxlanmadığı üçün birmənalı olaraq onlara təşəkkür etmək və ya onları tənqid etmək üçün əsas olmadığını, narazılıq üçün isə konkret fakt olmadığını düşünür. 

"Amma narazı olduğum müəyyən məsələlər var, onu da zamanı gələndə açıqlayacağam", deyə jurnalist xəbərdarlıq edib.

Azərbaycan təşkilatları və beynəlxalq təşkilatlar, digər ölkələrin nümayəndələri Məmmədovaya qarşı zorakılığı tənqid ediblər.

"Bakıda bu hücum dünyanın Ümumdünya Mətbuat Azadlığı gününü qeyd etməsindən və söz azadlığının və dəqiq məlumat əldə etmək imkanının əhəmiyyətini vurğulamasından cəmi bir həftə sonra baş verib. Bu işi diqqətlə izləyirik və hakimiyyəti araşdırma aparmağa və təqsirkarları məsuliyyətə cəlb etməyə çağırırıq", deyə ABŞ Dövlət Departamentinin nümayəndəsi qeyd edib.

Norveç Helsinki Komitəsi (NHK) Azərbaycanda jurnalist Aytən Məmmədovaya hücumu qınayıb, hakimiyyəti bu cinayəti ətraflı araşdırmağa və müstəqil jurnalistləri təqiblərdən qorumağa çağırıb.

Human Rights Watch beynəlxalq hüquq müdafiə təşkilatı da jurnalistə hücumla bağlı narahatlığını ifadə edib.

Mayın 14-də saat 15-də Bakıda Fəvvarələr meydanında hadisənin təcili olaraq araşdırılmasını və Aytən Məmmədovaya hücumda təqsirli olan cinayətkarların aşkar edilməsini tələb edən jurnalistlərin mitinqi keçiriləcək. -0-