İctimaiyyətin Yeni Yasamalda polis əməliyyatı haqqında şərhləri

Bakı/08.06.20/Turan: Yeni Yasamal massivində vətəndaşların polislə qarşıdurması vətəndaşların dövlətə inamının olmadığını göstərib. Bu fikri ictimai fəal Bəxtiyar Hacıyev öz Facebook səhifəsində bildirib.

Xatırladaq ki, iyunun 7-də Dadaş Bünyadzadə küçəsində çoxmənzilli binanın sakinləri karantini pozduğuna görə qonşularını saxlayan polis əməkdaşlarına zibil atıblar. Bu gün polis bina sakinlərini kütləvi şəkildə saxlayıb.

Hacıyevin fikrincə, bu əməllər yalnız polisin imicini korlayır. "Amma bugünki davranış vətəndaşı daha da qəzəbləndirir. Son günlər bu tipdə bəzi videolar yayılıb ki, polisin vətəndaşla adekvat davranmamasını göstərir. Nəticə də ona gətirib çıxarır ki, vətəndaş polisə qarşı inamsız olur. Polisə qarşı uyğun olmayan, qeyri-etik davranışa əl atır. Bu vəziyyətin saktiləşməsinin tək yolu polisin sərt gücdən yox, yumşaq gücdən istifadə etməsidir. Polis sərt gücə əl atdıqca, vəziyyət daha da pisləşəcək", fəal belə hesab edir.

"Vətəndaş sərxoş da, narkotika istifadəçisi də, əsəbi də ola bilər, amma bütün hallarda polis təmkinli olmalı, vətəndaşla mədəni davranmalı, qanun çərçivəsində addım atmalıdır. Vətəndaş polisi söyürsə, bu, heç də o demək deyil ki, polis də onu söyməli, təhqir etməlidir: Belə olduqda bu, artıq dövlət anlayışından çıxır, məhəlləarası iki gəncin hesablaşmasına bənzəyir. Bu gün gördüyümüz mənzərə sanki qisas əməliyyatı idi, vətəndaşları qorxutmaq, onları sındırmaq üçün atılmış addım idi", deyə Bəxtiyar Hacıyev qeyd edir.

Hakimiyyətyönlü "Vətən" partiyasının lideri, parlamentin deputatı Fəzail Ağamalı vətəndaşların hərəkətlərini "cahillik" göstəricisi adlandırıb. O, vətəndaşları koronavirus təhlükəsinə etinasızlıqda ittiham edib.

"Bu insanlar epidemiya olmasına inamsızlığı yaymaqla birgə, digərlərini də buna inandıraraq, virusa yoluxanların sayının artmasına vasitə olurlar", deyə deputat Turan agentliyinə bildirib.

O, həmçinin vətəndaşların polislə münaqişəsi haqqında videomaterialların sosial şəbəkələrdə yayılmasını tənqid edib. O, polisin sərtliyinə bəraət qazandırıb.

"ReAl" partiyasının lideri İlqar Məmmədov buna əks fikir ifadə edərək, polisin yaşayış binasına kütləvi şəkildə daxil olmasını qanunsuzluq adlandırıb.

Hakimiyyət bu əməliyyatın təşkilatçılarını cəzalandırmalıdır, onlara qarşı beynəlxalq sanksiyalar tətbiq edilməlidir, deyə Məmmədov öz Facebook səhifəsində yazıb.

Xalq Cəbhəsi Partiyasının sədr müavini Gözəl Bayramlı hesab edir ki, polisin vətəndaşlara qarşı belə rəftarı əhalinin hakimiyyətə nifrətini artırır.

"Bir insanı qayda pozduğuna görə bu cür zorakı metodla, xüsusi qəddarlıqla maşına basıb aparmaq əvəzinə ona qaydanı pozduğuna görə xəbərdarlıq, yaxud cərimə etmək olardı. Ancaq görünən odur ki, hakimiyyət xalqla qarşıdurmaya meyllidir və bunun son günlərdə yayılan digər videogörüntülərdə də şahidi olduq.

Polisin başına yaşayış binasından atılanlar da insanların polis zorakılığına və həftə sonu tətbiq olunan sərt karantin qaydasına etirazı idi. Bundan nəticə çıxarmaq əvəzinə, bu gün səhərin erkən saatlarında həmin yaşayış binasına çoxlu sayda polis hücumunun təşkili və sakinlərin az qala yarıçılpaq vəziyyətdə, zorakılıqla polis maşınlarına mindirilərək aparılması yolverilməzdir", deyə o bildirib.

Seçkilərin Monitorinqi və Demokratiyanın Tədrisi Mərkəzinin sədri Anar Məmmədli də polisin əməllərinin qanunsuz olduğunu hesab edir. "Sosial mediada yayılan videolarda polis əməkdaşlarının qeyri-adekvat davranışlarına dair görüntülərin şahidi oluruq. Koronavirus epidemiyasına qarşı bu cür mübarizə həm vətəndaş hüquqlarını ciddi şəkildə tapdalayır, həm də polisə qarşı kütləvi nifrəti artırır.

Ümumiyyətlə, karantin qaydalarını pozan şəxslərin məsuliyyətə cəlb olunması polisin deyil, məhkəmələrin işidir. Polisin öz gücündən sui-istifadə halları dayandırılmalıdır", deyə Məmmədli Facebook-da yazıb.  -1606D-