İkili standartlar maskası

Bakı/17.05.21/Turan: Azərbaycanda açıq havada maskaların taxması məcburi olaraq qalır. Bu qərar ötən ilin 21 noyabr tarixindən etibarən qüvvəyə minib. Belə ki, xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.

İnzibati Xətalar Məcəlləsinə görə, karantin rejimində maska taxmaq tələbini pozmağa görə fiziki şəxslər 100 manat məbləğdə cərimə ödəməli olur.

Buna görə, 12-13 may tarixlərində Şuşada keçirilən «Xarıbülbül» festivalında Prezident İlham Əliyevin iştirakçılara maskalarını çıxarmaqla bağlı təklifi sosial şəbəkələr istifadəçiləri tərəfindən birmənalı qarşılanmadı.

Sosial şəbəkələrdə bunu «qanun şah deyil, şah qanundu» deyib qiymətləndirdilər.

Həqiqətənmi Azərbaycanda «qanun şah deyil»? Festivalda maska taxılmırsa, küçələrdə insanlar niyə cərimələnir?

Jurnalist Elçin Əlixan bir neçə gün əvvəl cərimələndiyini deyir və bunun haqsız olduğunu hesab edir. O, AzadlıqRadiosuna bildirib ki, bir ildən çoxdur ölkədə davam edən karantinin ən sərt vaxtlarında belə cərimələnməmişdi. «Sağlamlığa görə həmişə maska taxmışam. Mayın 14-də isə Müşviqabad qəsəbəsində arxa məhəllələrin birində siqaret çəkəndə yanımda polis maşını dayandı».

Onun sözlərinə görə, küçədə özündən başqa heç kəs yox idi, sosial məsafə qaydalarına əməl edirdi. «Maşından 4 serjant, 1 mayor düşüb məni dövrəyə aldılar. Niyə maska taxmadığımı soruşdular. Dedim ki, iki gün əvvəl Prezident Şuşada 100-dən çox adamın olduğu tədbirdə insanlara açıq havada maska taxmayın dedi, naziriniz Vilayət Eyvazov da orada idi. Polislər dedilər biz tədbir bilmirik, cərimə yazacağıq. Yazdılar da».

E.Əlixan hesab edir ki, bu tam absurd bir haldır. «Tədbirdə 100-dən çox adam iştirak edir və demək olar ki, sosial məsafəni da əməl etmir. Mən belə başa düşürəm ki, vəzifəli şəxslər virusa yoluxmur, onlar istədiyi yerdə maskasız gəzə bilərlər, amma biz, sadə vətəndaşlar bu isti havada nəfəsimiz kəsilə-kəsilə maska taxmalıyıq. Taxmırıqsa, cərimə ödəməliyik».

Jurnalist əlavə edib ki, ölkədə virusla mübarizə yoxdur. «Yalnız xalqı soymaq, cərimə yazmaq siyasəti var».

O, cəriməni ödəməyəcəyini bildirdi.

Milli Məclisin Hüquq Siyasəti və Dövlət Quruculuğu komitəsinin üzvü Fəzail Ağamalı Turana bildirib ki, bu çox nihilist yanaşmadır və həqiqəti özündə əks etdirməyən mövqüdir. «Orada iştirak edən jurnalistlər yazıb ki, onlar bir neçə dəfə testdən keçəndən sonra Şuşaya getdilər. Testdən keçmə hər kəs üçün məcburi idi. Testdən keçəndən bir neçə saat sonra virusa yoluxub-yoluxmadığı müəyyənləşir. Orada olanların hamısı testdən keçiblər və sağlam olduğuna görə tədbirdə iştirak ediblər».

Deputat qeyd edib ki, tədbir iştirakçıların hamısı vaksinasiyanın hər iki mərhələsini baş vurmuş şəxslərdir.

Komitə üzvü vurğulayıb ki, «Xarıbülbül» festivalında maskalardan istifadə edənlər də var idi. «Baxmayaraq ki, onlar sağlam idi. Bu baxımından mən təəssüf edirəm ki, vəziyyəti dərindən təhlil edib onun nədən bu cür olmasını arqumentlə ifadə etməyənlər sosial şəbəkələrdə öz baxış bucağına görə münasibət bildirirlər».

F.Ağamalı bir daha xalqa müraciət edərək, bildirdi ki, maskalardan istifadə etmək, sosial məsafəyə və gigiyena qaydalarına əməl etmək vacibdir. «Xüsusi olaraq, vaksinasiyadan da keçmək lazımdır. Çünki dünya miqyasında sübut olundu ki, vaksinasiyanı tədbiq edən ölkələrdə yoluxma aşağı düşüb, bəzi ölkələrdə isə tamamilə yox olub. Bunu deyən peşəkar mütəxəssislərin məsləhətlərinə əməl etmək lazımdır, yoxsa sosial şəbəkələrdə kimsə hansısa görüntünü ümumiləşdirir, bir-iki cümlə ilə fikrini yazır və onun ətrafında başlayırlar bu cür subyektiv fikirləri ifadə etməyə. Hər kəs özünü qorumalıdır».

İctimai fəal Bəxtiyar Hacıyev isə AzadlıqRadiosuna bildirib ki, ilk dəfə deyil ki, Prezident İlham Əliyev maska ilə bağlı həmin ifadəni işlətdi. «Əvvəlki bir neçə çıxışlarında da o demişdi ki, açıq havadayıqsa, maska taxmaq vacib deyil. Amma Prezidentin rəhbərlik etdiyi hökümət və onun Operativ Qərargahının verdiyi qərarı xüsusi həssaslıqla icra edən Daxili İşlər Nazirliyi yayın isti günlərində də hətta sıxlıq olmayan ərazilərdə maskanı taxmamış şəxsləri sərt şəkildə cəzalandırır».

B.Hacıyevin fikrincə, bu ikili standartlardır. «Ya ölkədə açıq havada heç kəs maskasız gəzməməlidir, ya da əgər ölkə başçısı «açıq havada maska taxmaq vacib deyil» deyirsə, bununla bağlı iki addım atılmalıdır. Ya Prezidentin verdiyi o açıqlamaya qarşı Operativ Qərargah bir tədbir görməlidir, ya da ki onu həqiqət kimi qəbul edib artıq öz qərarını dəyişdirməlidir».

Fəal qeyd edib ki, ikili standartlar yalnız maska məsələsində tədbiq olunmur. «Məsələn iri məmurların korrupsiyası ilə bağlı sosial şəbəkələrdə araşdırmaçı jurnalistlərin ortaya qoyduqları çoxsaylı video faktlar, sənədlər var. Onlarla bağlı heç bir addım atılmır. Amma hansısa kənd xəstəxanasında rüşvətlə bağlı şikayət varsa, həkim həbsə atılır. Bütün sahələrdə vəziyyət belədir və qanun yalnız sadə vətəndaşlar üçün tədbiq olunur».

Turan İA-nın direktoru Mehman əliyev də hesab edir ki, polisin hərəkətləri adekvat deyil.

"Mən iki nəfər üçün hər biri üçün 100 manat məbləğində cərimə ödəmişəm, çünki onların burnundan maska sürüşüb. Onlardan biri epilepsik idi", deyə o bildirib.

Əliyev deyir ki, Dünya Səhiyyə Təşkilatı aşağıdakı məsləhətləri verir:

"Sıxlıqlı yerlərdə maska taxmaq vərdişini işləyin. Maskaların tətbiqinin maksimal effektivliyini təmin etmək üçün onlardan düzgün istifadə etmək, saxlamaq, emal etmək və utilizasiya etmək lazımdır.

Maska taxdığınız və ya çıxardığınız və ya toxunduğunuz halda, əllərin Gigiyenik müalicəsini aparın.

Maskanı elə taxın ki, o burunu, ağzını və çənəsini örtsün.

Maskanı çıxartdıqdan sonra onu təmiz polietilen paketə qoyun; toxuma maskaları hər gün yumaq lazımdır, və tibbi maskaları Məişət zibili ilə utilizasiya etmək lazımdır".

"Bəs buna kim nəzarət edir və tövsiyələrin icrasına nəzarət etmək iqtidarındadırmı?”     sual alaraq, ÜST-nin tövsiyələrinin yerinə yetirilməməsi halında maskaların geyilməsinin mənasız   olduğunu bldirib. “Bundan əlavə, bir çox vətəndaşlar günlərlə maskalar taxırlar, onların potensial yoluxma mənbələrinə çevrilirlər. Onların arasında polislər də ola bilər", Əliyev geyd elədi.—0—