İkram Rəhimov aclığı sonuna qədər davam etdirmək niyyətindədir

Bakı/24.09.19/Turan: 1 saylı Bakı İstintaq Təcridxanasında saxlanılan jurnalist İkram Rəhimov keçirdiyi aclıq aksiyası ilə əlaqədar yerli və beynəlxalq ictimaiyyətə müraciət edib.

"Bakı Apellyasiya Məhkəməsi cəzamı üç il azadlıqdan məhrumetməyə endirərək, növbəti dəfə sifarişçilərin istəyini yerinə yetirərək, qanunsuzluğa yol verib.

Sentyabrın 18-də sonuncu məhkəmə iclasında bildirdim ki, ölüm aclığına başlayacağam, bu aclığı bu gün də davam etdirirəm", deyə Rəhimovun ailə üzvləri vasitəsilə KİV-ə təqdim etdiyi bəyanatda bildirilir.

Rəhimov bəyan edir ki, onun ölümünə görə Azərbaycan hakimiyyəti, o cümlədən dövlət başçısının köməkçisi Əli Həsənov məsuliyyət daşıyacaq.

Rəhimov qeyd edir ki, bəyanatı bütün yerli və xarici KİV-lərə, beynəlxalqa, Aİ ölkələrinin səfirliklərinə, ABŞ səfirliyinə, hüquq müdafiə təşkilatlarına ünvanlanıb. "Sizdən baş verənləri diqqətlə izləməyinizi, ədalətsizliyə qarşı səsinizi yüksəltməyinizi xahiş edirəm", deyə o yazır.

Amma Penitensiar Xidmət Rəhimovun aclıq etdiyi haqqında məlumatı təkzib edib. "İkram Rəhimovdan aclıq etməsi haqqında heç bir rəsmi müraciət daxil olmayıb", deyə Penitensiar Xidmətin İctimaiyyətlə Əlaqələr şöbəsinin nümayəndəsi bildirib.

*Realliq.info saytının redaktoru İkram Rəhimov 2018-ci il oktyabrın 26-da saxlanılıb. İyunun 12-də məhkəmə onu 5,5 il müddətinə azadlıqdan məhrum edib. Etiraz əlaməti olaraq Rəhimov avqustda aclığa başlayıb, bu aksiyanı 30-cu gündə - sentyabrın 5-də dayandırıb.

Sentyabrın 18-də Apellyasiya Məhkəməsi Rəhimovun hədələmə yolu ilə pul tələb etmək təqsirini təsdiq edib, CM-in 62-ci (qanunla nəzərdə tutulmuş ən az cəzanın tətbiqi) maddəsini tətbiq edərək, həbs cəzasını 5,5 ildən 3 ilə qədər azaldıb. -D06-