Keçmiş müstəntiqin atası koloniyada oğluna işgəncə verildiyini bildirir

Bakı /04.10.17/Turan: Zərdab Rayon Prokurorluğunun keçmiş müstəntiqi, həbsdə olan Rüfət Səfərov karserə salınıb və işgəncələrə məruz qalıb. Bu barədə onun atası Eldar Sabiroğlu oktyabrın 3-də koloniyada ona baş çəkdikdən sonra bildirib.

Rüfət atasına deyib ki, sentyabrın 22-də aclığa başlamaq niyyətində olduğunu bildirib. Bundan sonra bir qrup nəzarətçi onu döşəməyə yıxaraq əllərini qandallayıb. Bu vəziyyətdə onu əlləri ilə və dəyənəklə vurublar. Koloniya işçilərindən biri ayağını R.Səfərovun başına qoyaraq əzməyə başlayıb.

Sonra R.Səfərovu karserə apararaq orada dəmir çarpayıya bağlayıblar, üç saat belə vəziyyətdə saxlayıblar.

E.Sabiroğlunun sözlərinə görə, bu amansız hərəkət koloniyanın rəis müavini Azər Bağırovun göstərişilə edilib.

"Bu mayor Rüfətə hədə-qorxu gələrək onun başını unitazda batıracağını bildirib", - E.Sabiroğlu deyib.

Onun sözlərinə görə, amansız işgəncələrə baxmayaraq, onun oğlu sınmayıb.

Öz növbəsində Penitensiar Xidmət E.Sabiroğlunun söylədiklərini inkar edib. Mətbuat xidmətinin rəhbəri Mehman Sadıqov "Rüfət Səfərova və ya digər hər hansı şəxsə işgəncə verilməsinin mümkünsüz" olduğunu bildirib.

Karserə salınmasına gəlincə, M.Sadıqovun sözlərinə görə, mühakimə olunmuş şəxs və ya onun vəkili bu qərardan məhkəməyə şikayət verə bilər.

*Rüfət Səfərov Zərdab Rayon Prokurorluğunun müstəntiqi olub. 2015-ci il dekabrın 20-də hüquq-mühafizə orqanlarındakı qanunsuzluğa etiraz edərək istefa verib. Həmin il dekabrın sonunda R.Səfərova qarşı rüşvət almaq ittihamı ilə cinayət işi başlayıb.

2016-cı ilin sentyabrında Lənkəran Ağır Cinayətlər Məhkəməsi R.Səfərovu 9 il azadlıqdan məhrum edib. R.Səfərov YAP-dan keçmiş deputat, Müdafiə Nazirliyinin mətbuat xidmətinin keçmiş rəhbəri Eldar Sabiroğlunun oğludur.-06D--