Kuryer xidməti göstərən şirkətlərdən birinin əməkdaşları narkokuryer "çıxdılar"

Bakı/03.02.23/Turan: Səbail Rayon Polis İdarəsinin 9-cu Polis Bölməsinin əməkdaşları tərəfindən keçirilən əməliyyat nəticəsində paytaxt ərazisində narkotik vasitələrin qanunsuz dövriyyəsi ilə məşğul olan kuryer şirkətlərindən birinin əməkdaşları Sübhan Qəhrəmanov və Elgün Quliyev saxlanılıblar. Bu barədə Daxili İşlər Nazirliyi məlumat yayıb.

Onların üzərində şəxsi axtarış aparılan zaman 6 qrama yaxın marixuana aşkar edilib. Bu şəxslər sorğu zamanı narkotik vasitələri həmkarları Ayxan adlı şəxsdən onlayn yolla aldıqlarını bildiriblər və A.Məmmədov da saxlanılıb. Onun üəzrindən və evindən 7 qrama yaxın marixuana aşkar edilib.

Ayxan Məmmədov isə ifadəsində narkotik vasitələri satmaq məqsədi ilə Məhəmməd Hacıyevdən aldığını bildirib. Məhəmməd Hacıyev də saxlanılıb. Onun idarə etdiyi avtomobildən 5 kiloqramdan artıq marixuana aşkar edilib.

M.Hacıyev isə marixuananı sosial şəbəkələrdə tanış olduğu şəxsiyyəti məlum olmayan İran vətəndaşından aldığını qeyd edib.

Həyata keçirilən sonuncu əməliyyatlar zamanı narkotiklərin qanunsuz dövriyyəsi ilə məşğul olan daha 5 nəfər saxlanılıb.

Bundan əlavə, əməliyyat zamanı üzərində qanunsuz olaraq odlu silah-sursat gəzdirən 1 nəfər saxlanılıb və onun üzərində "Makarov" markalı tapança aşkar olunaraq götürülüb. 05D