Media-icmal 01.04.21

Karantin rejiminin sərtləşdirilməsinin mümkünlüyü,  Türkiyə və Rusiyada milli valyutaların ucuzlaşmasının Azərbaycana təsiri, gözəllik salonları və restoranların bağlanması ehtimalı, Türkiyə prezidenti Ərdoğanın Ramazan bayramı sonrası Şuşaya səfər etmək  istəməsinə dair açıqlamasının şərhi və s. məsələlər medianın aparıcı mövzuları sırasındadır.         

Deputat Fazil Mustafa Azərbaycanda karantin rejiminin sərtləşdirilə bilməsinin mümkünlüyünə münasibət ifadə edir. “Redaktor. az” saytına açıqlama verən deputat “Azərbaycanda karantin hər an sərtləşdirilə bilər -"yoluxma daha da artarsa” sərlövhəli məqalədə vurğulayır ki, indidən proqnoz vermək bir az çətindir: “ Amma müəyyən dərəcədə yoluxmanın sayı azalarsa, indiki templə davam etmək olar”.

Qapanma ehtimalını dəyərləndirən deputata görə, bu halın çətinliklər yaradacağını istisna etmir. Fikrini isə belə əsaslandırır ki, insanların sağlamlığı daha vacib məsələdir.

Qapanma  olduğu halda iş itirməyə görə 190 manat müavinətin ödənişi barədə danışan deputat deyir ki,  indiki şərtlərdə 190 manatın ödənilməsi real görünmür. Onun deməsinə görə, hətta ödənilsə belə insanların xeyli hissəsi üçün əlçatan olmur.

Deputat  vurğulayır ki, qapanmalarla əhalini tam yoxsullaşdırmaqdansa, əhaliyə sərbəstlik vermək lazımdır ki, vəziyyətdən çıxaraq bu prosesi tənzimləsinlər.

“Sfera.az”  saytı isə “Qonşularda milli valyuta ucuzlaşır: Manatı nə gözləyir? - "Mərkəzi Bankın açıqlamasından aydın olur ki..." sərlövhəli məqalədə Rusiya rublunun və Türkiyə lirəsinin dollara nisbətdə dəyər itirməsini deputat Vüqar Bayram ilə dəyərləndirir.

Müəllifin deməsinə görə, Mərkəzi Bank  növəti dövrlərdə manatın məzənnəsində mövqeyinin həlledici olacağını vurğulayıb.     

Deputat hesab edir ki, regionun aparıcı ölkələrində milli valyutaların ucuzlaşmasının Azərbaycanın valyuta bazarına iqtisadi yox, psixoloji təsiri var.

Deputat əlavə edir ki, neftin dünya bazar qiyməti də bu kontekstdə daha vacib indikatordur: “Çünki ölkəyə daxil olan valyutanın 85 faizə yaxınını enerji sektoru formalaşdırır. Hazırda neftin qiyməti məqbul səviyyədədir. Bununla belə neft bazarında volatilliyin yüksək olması diqqətdə saxlanmalıdır, Vüqar Bayramov deyir ki, Azərbaycanın Türkiyə ilə 4,5 milyard dollara yaxın, Rusiya ilə isə 3 milyard dollardan çox ticarəti var və üstüstə bu xarici ticarət dövriyyəsinin 23 faizi deməkdir”.

Deputat hesab edir ki, Azərbaycanın əsas ticarət tərəfdaşlarındakı iqtisadi və maliyyə dəyişikliklərinin xarici ticarət dövriyyəsinə təsirlərini azaltmaq yönündə fəaliyyətlərin genişləndirilməsi də məqsəduyğundur.

“Müsavat.com” saytı “Gözəllik salonları və restoranlar yenidən bağlana bilər –Sərt karantinlə bağlı yeni açaıqlama” sərlövhəli məqalədə isə dosent Ədalət Rüstəm bildirir ki, Azərbaycanda indiki virusa yoluxmanın sürətli artımı narahatedici məqamdır:

Onun deməsinə görə, reanimasiyalarda ağır xəstələrin sayı durmadan artır, sərt tədbirlər görülməsə yoluxanların və ölənlərin sayının artması davam edəcək, 

Ə.Rüstəm hesab edir ki, birinci və ikinci dalğada olduğu kimi yoluxma sayının artmasına səbəb olacaq müəssisələr yenidən qapadıla bilər.

O hesab edir ki, Hətta "evdə qal" karantini və "sms icazə" sisteminin geri qayıtması qaçılmaz olacaq: “Aprelin 5-nə kimi yoluxma bu cür artma dinamikası ilə davam edərsə, gözəllik salonları, restoranlar və xırda ticarət mərkəzləri yenidən bağlana bilər".

Politoloq Elxan Şahinoğlu isə Türkiyə prezidenti Ərdoğanın bu il Ramazan bayramı sonrası Şuşaya səfər etməyi nəzərdə tutmasını dəyərləndirir. “Yenisabah.az” saytı “Ərdoğanın Şuşaya gəlişinə ehtiyacımız var, çünki Kreml sahibinin Qarabağdakı “planlarını”... sərlövhəli məqalədə politoloq bu məsələni şərh edir.

Yada salaq ki, Türkiyə prezidenti Ərdoğan Türk Şurası liderlərinin 2021-ci il martın 31-də onlayn formatda keçirdiyi tədbirdə  Şuşaya bayram etməyə gedəcəyini bildirib. Həm də həmkarlarını Azərbaycanın yanında olmağa çağırıb.

Politoloq bildirir ki, Ərdoğanın Şuşaya gəlişinə ehtiyac var: “Rusiyanın və Kreml sahibinin Qarabağdakı “planlarını” Türkiyə və Ərdoğan poza bilər. Kreml Qarabağda qarşısında Türkiyəni görməlidir, əks halda Azərbaycan torpaqlarında hərbi baza qurmağa çalışacaq. Buna yol vermək olmaz. İnanıram ki, Türkiyə cümhur başqanının Şuşada verəcəyi mesajlar arasında bu da olacaq", - politoloq xüsusi qeyd edib.