Media-icmal 02.03.21

“Bizimyolinfo”  saytında “Yarım addım qalıb... Biz istəyəndə sülhməramlılar çıxıb gedəcək” sərlövhəli məqalədə  politoloq Eldar Namazov Qarabağda postmüharibə dövrünü dəyərləndirir.   

Politoloq prezident İlham Əliyevin fevralın 26-da keçirmiş olduğu mətbuat konfransında vurğuladığı bəzi məqamlara aydınlıq gətirib. Bu sırada politoloq 3 əsas məqama diqqət çəkməyi vacib bilir.

İlkin məqam dövlət başçısının 2020-ci il 10 noyabr bəyannaməsini faktiki sülh sazişi kimi dəyərləndirməsidir. Onun deməsinə görə, prezident bu vaxta qədər bu firki söyləməmişdi, amma indi  bəyan edir ki, bu, faktiki sülh sazişdir.

Politoloq dövlət başçısının açıqlamasında sülhməramlılarla bağlı yeni nüanslara toxunmasını ikinci əsas məqam adlandırır. O deyir ki, dövlət başçısı əvvəl sülhməramlıların yaxşı işlədiyini deyirdi, indi isə fəaliyyətlərini qənaətbəxş sayır, bu isə “yaxşı” demək deyil: “Yaxşı deyilsə, narazıyıqsa, biz sizin hərəkətlərinizə xitam verə bilərik deməkdir. Yarım addım qalıb. O, dərhal öz narazılıqlarını səsləndirməklə yanaşı, bunun Rusiyanın hərbi bazası olmadığını da, onların müvəqqəti struktur olduğunu da vurğuladı. Yəni, biz istəyəndə onlar çıxıb gedəcək”, - mesajını verdi.

Onun fikrincə, üçüncü əsas məqam bu münaqişəni “diri tutmaqla” təxribatar törətmək istəyənlərə verilən mesajlardır: “Və nəhayət, konfliktin davam etməsində maraqlı qüvvələrə dövlət başçısının önəmli mesajı oldu. “Konflikt bitib. Dağlıq Qarabağ ifadəsi işlədilməməlidir”, - politoloq bildirir.

Politoloq vurğulayır ki, Azərbaycanın məsələni tam şəkildə hərbi yolla həll etmək imkanı olsa da bundan imtina edir, bunun əksini deyən Ermənistanın belə bir gücü yoxdur, deməli, münaqişə bitib.

“Yenisabah.az”  saytı isə “Məşhur YAP-çıdan sərt sözlər: “İstəyirlər ki, Azərbaycanda ağıllı adam az olsun” sərlövhəli məqalədə  magistraturaya imtahanların nəticələri Təhsil Nazirliyi yanında İctimai Şuranın üzvü Şahlar Əsgərovla müzakirə olunur.

Müəllif deyir ki, fevralın 28-də Azərbaycanda magistraturaya qəbul imtahanı baş tutub, imtahan bitən vaxtdan bakalavrlar sosial şəbəkələrdə sualların çətinliyindən şikayət etməyə başlayıblar.

Müəllifin deməsinə görə, əksər imtahan iştirakçısının sualların çətinliyi səbəbilə test bankını tam şəkildə oxumağa vaxtı çatmayıb, tələbələr ən çox məntiq və informatika fənnində problemlərlə üzləşdiklərini vurğulayıblar.

Müəllifin iddiasına görə, əksər bakalavrlar hesab edirlər ki, Dövlət İmtahan Mərkəzi tələbələri yay aylarında baş tutacaq ikinci magistratura imtahanına sövq etmək üçün biletləri belə çətin üslubda hazırlayıblar.    

Ş.Əsgərov isə deyir ki, təhsil sahəsindəki bu vəziyyətdən 30 ildir ki, narazıdır: “Mən 30 ildir ki, bu işdən narazıyam. Magistratura təhsili almaq istəyənlər kimlərdir? Azərbaycan gəncliyinin qabaqcıl, dərrakəli, ağıllı hissəsi!  Bunlar Azərbaycanda çoxdurmu ki, onları imtahan edirlər? Elə ixtisaslar var ki, yerlər tamamilə boş qalır. Belə olan halda növbə düzməyə nə ehtiyac var? Bu, mənasız və məntiqsizdir”, - Ş.Əsgərov bildirir.   

“İmtahan o vaxt olar ki, yer bir olar, istəyən isə 100! Bizdə yer birdir, heç istəyən bir nəfər də yoxdur. Nəyə lazımdır bu imtahan? İmtahan götürməyin öz məntiqi var, o məntiqdən çxmaq lazım deyil”, - Ş.Əsgərov bildirir.

“Sfera.az”  saytı isə “Azərbaycanda yenidən qapanma olacaq? - İki həftədən sonra...” sərlövhəli məqalədə ölkədə COVİD-19 pandemiyası ilə bağlı durumu deputat Müşfiq Məmmədovla dəyərləndirir.

Deputat hesab edir ki, vaksinasiya prosesi davam etdikcə, mərhələli olaraq toy-yas mərasimlərinin. ictimai nəqliyyatın açılımına getmək olar, əksinə hansısa tələskənlik yenidən karantin rejiminin sərtləşdirilməsinə gətirə bilər.

Deputata görə, diqqət vaksinasiya prosesinə yönəldilməli, əhali vaksinasiya prosesində fəal iştirak etməlidir.

“Azərbaycanda insanlar qoruma tədbirlərini anlayışla qarşılayırlar, vaksinasiya prosesi də kifayət qədər qaneedici sürətlə gedir. Vətəndaşların həm yaş qrupuna, həm də müəyyən olunmuş vaksinasiya strategiyasına görə müəyyən addımlar atıldıqdan sonra yumşaldılmaların da olması realdır.

“Moderator.az”  saytı isə  “Evlərimiz suyun içində, maraqlanansa yox" - Sakinlər Sabunçunun icra başçısını axtarır...”  sərlövhəli məqalədə Bakıətrafı qəsəbələrin sosial qayğılarından bəhs edilir.

Müəllif iddia edir ki, gözdən uzaq Bakı kəndlərində insanlar qış aylarında çətinliklərlə üzləşirlər, Kürdəxanı qəsəbəsi Yeni yaşayış massivində də sakinlərin yaşadıqları evlər illərdir ki, su içində qalır.

Onun deməsinə görə, buna səbəb isə massivdə kanalizasiya sisteminin olmaması və rayon rəhbərliyinin buna diqqətsizliyidir. 

Sakinlər isə  Sabunçu Rayon İcra Hakimiyyətinin laqeyd münasibətindən gileyləniblər: “İllərdir ki, yolları bərbad olan sakinlərin dadına iki il öncə birinci vitse-prezident Mehriban xanım Əliyeva çatıb, onun göstərişindən sonra qəsəbənin 97 küçəsinə asfalt örtüyü çəkilib və orta məktəb əsaslı təmir edilib. Hətta qəsəbədə Mehriban xanımın göstərişi ilə park da salınıb”, - sakinlər bildirirlər. 

Sakinlərə görə, qəsəbənin problemi yeni yaşayış massivlərindəki kanalizasiya problemi, evlərin su içində olmasıdır. Sakinlərə görə, vəziyyət o yerə çatıb ki, sakinlərin bəziləri evi satıb gəldikləri rayonlara qayıtmaq istəyirlər.