Media-icmal 02.10.20

"Azərbaycan" qəzeti "Qələbəyə Dəstək Hərəkatı yaradıldı" sərlövhəli məqalədə ölkədə iş adamlarının Qələbəyə Dəstək Hərəkatı (QDH) yaratmasından bəhs edilir.

Müəllif deyir ki, Hərəkata hələlik 22 şirkət qoşulub.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin əmri ilə işğal olunmuş Azərbaycan torpaqlarını Ermənistanın işğalçı qoşunlarından təmizləmək üçün başladılan əks-hücum əməliyyatlarını həyata keçirən Azərbaycan Ordusuna dəstək məqsədilə iş adamlarının Qələbəyə Dəstək Hərəkatı ictimai təşəbbüs qrupu yaradılıb. Təşəbbüs qrupuna ilkin olaraq 22 şirkət qoşulub.

Qrupun üzvlərindən "Hədəf" şirkətlər qrupunun təsisçisi Şəmil Sadiq bununla bağlı bildirir: "Qələbəyə Dəstək Hərəkatına qoşulan şirkət rəhbərləri bununla dövlətimizin, Ali Baş Komandanın yanında olduğunu bildirir, istər maddi, istərsə də mənəvi olaraq dövlətin hər bir çağırışına operativ dəstək verməyi, iş adamları arasında vətənpərvərlik ruhunun yüksəldilməsini, maarifləndirici işlərin aparılmasını qarşısına məqsəd qoyub".

Hərəkat iş adamlarının orduya maddi yardım və ianələrinin rahat şəkildə çatması üçün orduya dəstək, yaralı və şəhid ailələrinin, övladları orduya könüllü olaraq qoşulmuş ailələrin maddi təminat məsələsini həll etməyi, xeyriyyəçilik ruhunu formalaşdırmağı, sərhədyanı bölgələrdə geri alınan torpaqların yenidənqurma işlərində yaxından iştirak etməyi nəzərdə tutur.

"Müsavat.com" saytı Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin Ermənistanın yeni hərbi təcavüzü ilə bağlı "Al Arabiya" kanalına müsahibəsindəki fikirlərinə yer veib.

H.Hacıyev deyib ki, yalnız Ermənistan qoşunları Azərbaycan ərazilərindən çıxarıldıqdan sonra sülhdən danışmaq olar.

"Azərbaycan Silahlı Qüvvələri beynəlxalq hüquqa riayət etməklə vətəndaşlarımızın təhlükəsizliyini təmin edir və ölkəmizin ərazilərinin Ermənistan işğalından azad edilməsi məqsədilə özünün suveren ərazisində fəaliyyət göstərir.

O, sentyabrın 27-dən  müharibə başlamasına səbəb kimi Ermənistan silahlı qüvvələrinin Azərbaycan mülki vətəndaşlarına  atəş açmasını, Azərbaycan Ordusunun mülki əhalinin təhlükəsizliyini qoruması və Ermənistanı sülhə vadar etmək üçün əks-hücum tədbirləri həyata keçirməsini göstərib.

"Otuz ildən çoxdur ki, biz danışıqlar prosesi aparırıq, lakin Ermənistan status-kvonu qoruyub saxlamaq üçün əlindən gələni edir. Onlar həmçinin Azərbaycanın işğal edilmiş ərazilərində qeyri-qanuni fəaliyyətlər həyata keçirirlər.

Ermənilər Azərbaycanın işğal edilmiş ərazilərində məscidləri, İslam mədəni irsini dağıdırlar", deyə köməkçi erməniləri barbarlıqda ittiham edir.

H.Hacıyev vurğulayıb ki, yalnız Ermənistan öz qoşunlarını Azərbaycan ərazisindən çıxardıqdan sonra sülhdən danışmaq olar:

"Ermənistanın müdafiə naziri yeni ərazilər üçün yeni müharibələr konsepsiyasını elan edib. Ermənistan nə zaman təxribatlara son qoyacaq? Ermənistan beynəlxalq ictimaiyyəti aldatmağa və çaşdırmağa son qoymalıdır", H.Hacıyev belə söyləyib.

"Yenisabah.az"da isə İranın Ali dini lideri Əli Xameneinin nümayəndələri Qarabağ münaqişəsinə münasibət ifadə ediblər:

"Qarabağ Azərbaycana məxsusdur", Əli Xameneinin Şərqi və Qərbi Azərbaycan, Ərdəbil və Zəncan vilayətlərindəki nümayəndələri birgə bəyanatla çıxış edərək bunu deyiblər.   

Bəyanat müəlliflərinə görə, Azərbaycan hökuməti torpaqlarını geri qaytarmaq üçün qanuni fəaliyyət göstərir.

İran Ali dini liderinin nümayəndələri deyiblər ki, İran Dağlıq Qarabağ məsələsində hər zaman Azərbaycana kömək edib.

Müəlliflər əlavə ediblər ki, hazırda Naxçıvana gedən yeganə quru yolu İran ərazisindən keçir və bu yol Azərbaycanın ixtiyarına verilib.

Bəyanatda Ermənistanla son qarşıdurmanın qurbanları Azərbaycan xalqının şəhidləri olduğu vurğulanır, dörd nümayəndə ümid edir ki, Qarabağ müharibəsi Azərbaycanın qanuni hüquqlarının reallaşması ilə ən qısa müddətdə sona çatacaq.

Xatırladaq ki, Azərbaycan-Ermənistan münaqişəsi dövründə ilk dəfədir ki, İran hakimiyyəti tərəflərdən birini açıq şəkildə dəstəkləyir.

"Redaktor.az" saytı isə "Atəşkəs çağırışına sərt cavab: Öz torpaqları işğal olunsa…" sərlövhəli məqalədə deputat Fazil Mustafanın düşüncələrinə yer verib.

Belə ki, sentyabrın 27-dən Qarabağda hərbi əməliyyatlar başladıqdan sonra Azərbaycana hərbi əməliyyatları dərhal saxlamaq çağırışları edilib.

Deputat bəyan edib ki, Azərbaycan öz ərazisində erməni təxribatlarına qarşı əks-hücum həyata keçirir.

Onun fikrincə, belə çağırış edənlərin əlində rəsmi Bakının haqlı davasına qarşı arqumentləri yoxdur, indiki vəziyyətdə geri çəkilmək gələcəkdə də münaqişənin qalmasına səbəb olacaq, odur ki, ilk növbədə bu məsələ həll olunmalıdır.

"Azərbaycan sülh istədiyini dəfələrlə bildirib. Lakin bu sülh ancaq torpaqların tam şəkildə azad edilməsindən sonra mümkün ola bilər. Bunun başqa yolu yoxdur. Bundan əlavə, sülh çağırışı edən ölkələrə sual vermək lazımdır ki, öz torpaqlarınız işğal altında olsaydı, yenə də belə bəyanatlar verərdinizmi?".

" Oxu.az" saytı "20 min erməni artıq Qarabağı tərk edib" sərlövhəli məqalədə sentyabrın 27-dən hərbi əməliyyatların başlaması ilə Dağlıq Qarabağın erməni əhalisinin müəyyən qisminin Ermənistana köç etdiyi bildirilir. 

Müəllif deyir ki, Azərbaycan Ordusunun üç istiqamətdə apardığı şiddətli döyüşlər Ermənistanda və separatçıların nəzarətində olan ərazilərdə ciddi təşvişə səbəb olub. Ordumuzun həyata keçirdiyi uğurlu əməliyyatlardan sonra bu ərazilərdən kütləvi köç prosesinə başlanılıb. 

Müəllifin iddiasına görə, beş gün ərzində Ermənistana köç edən əhalinin sayı 20 minə çatıb.

Müəllif əlavə edir ki, bundan təşvişə düşən Ermənistan hakimiyyəti qaçqınların yerləşdirilməsi üçün bir sıra beynəlxalq humanitar təşkilatlara, xüsusilə Beynəlxalq Qızıl Xaç və Qızıl Aypara Cəmiyyətləri Federasiyasına yardım üçün müraciət etsə də, gözlənilən cavabı almayıb. Rəsmi İrəvana donor təşkilatlara müraciət etmək tövsiyə olunub. Bütün bunlar cəmi beş gün davam edən döyüşlərin nəticəsidir.