BMT Təhlükəsizlik Şurası 4 qətnaməni unudubmu?

Milli Strateji Düşüncə Mərkəzi (MSDM) son günlərdə Azərbaycan ərazisində gedən hərbi əməliyyatlarla bağlı bir sıra dövlətlərin və beynəlxalq təşkilatların, xüsusən BMT TŞ-nın atəşkəs çağırışlarını müzakirə edib.

Bu barədə Mərkzəin yaydığı məlumatda deyilir.

Məlumatda vurğulanır ki, BMT Təhlükəsizlik Şurası qapalı iclasda Dağlıq Qarabağdakı vəziyyəti müzakirə edərəkAzərbaycan və Ermənistanı Dağlıq Qarabağdakı münaqişəni dərhal dayandırmağa, gərginliyi azaltmağa və gecikmədən danışıqlara geri qayıtmağa çağırıb.

Müəlliflər deyir ki, bu iclasdan sonra BMT TŞ birgə bəyanatda əməliyyatlardan narahatlıq olduğunu bildirib, gərginliyin azaldılması ilə bağlı çağırışlara dəstək verildiyi açıqlanıb. Təhlükəsizlik Şurası problemin həlli üçün Minsk qrupunu dəstəklədiyini də qeyd edib.

Məlumatda vurğulanır ki, BMT TŞ atəşkəsə çağırmaqla yanaşı, hətta bu çağırışdan öncə həmin 4 qətnamənin yerinə yetirilməsinə də çağırış etməlidir.

Məlumatda deyilir ki, Ermənistanın bu il iyul ayında və 27 sentyabrda Azərbaycana qarşı provokasion hücumlarının və hazırda gedən hərbi qarşıdurmanın məsuliyyəti yalnız Ermənistana və onun havadarlarına deyil, həm də 26 illik atəşkəs dövründə konflikti həll etmək əvəzinə konflikti idarə etmək siyasəti yürüdən, təcavüzkar və işğalçı Ermənistanla, təcavüzə məruz qalan, torpaqları işğal edilən Azərbaycana eyni çağırışlar edən beynəlxalq qurumlara və ilk növbədə ATƏT-in Minsk qrupuna aiddir.

“Hərbi əməliyyatların dayanmasının çox sadə yolu var: Ermənistan ordusunun işğal olunmuş bütün Azərbaycan torpaqlarından qeydsiz-şərtsiz çıxması! Sülhün də, əmin-amanlığın da yolu budur!”, deyə məlumatda vurğulanır.