Turan İnformasiya Agentliyinin Bəyanatı

2025-ci il fevralın 15-də və 18-də Day.az saytında Turan İnformasiya Agentliyinin fəaliyyəti ilə bağlı böhtan xarakterli iddialar irəli sürülən məqalələr dərc edilib.

Bu materiallarda müəllif agentliyi Qərb maliyyəsindən asılı və xarici strukturların maraqlarına tabe olan bir qurum kimi təqdim etməyə cəhd edir.

Bəyan edirik ki, bu məqalələr Turanın nüfuzdan salınmasına yönəlmiş dezinformasiyadır.

Turan müstəqil media qurumu kimi yalnız Azərbaycan qanunvericiliyi çərçivəsində və peşəkar, etik jurnalistika prinsiplərinə uyğun fəaliyyət göstərir.

Məqalələrdə təqdim olunan rəqəmlər və ittihamlar həqiqətə uyğun deyil. Xüsusilə:

1. Turan heç vaxt ABŞ-ın Beynəlxalq İnkişaf Agentliyindən (USAID) maliyyə almayıb. Müəlliflərin 2010-2020-ci illər arasında agentliyin hesablarına guya ən azı 2 milyon dollar köçürüldüyü barədə iddiaları tamamilə yalandır.

2. 2015-2023-cü illər arasında agentliyin insan haqları və mətbuat azadlığı ilə bağlı "müstəqil" hesabatlar hazırlamaq üçün Milli Demokratiya Fondundan (NED) iri məbləğdə vəsait aldığı iddiası da əsassızdır. Turan NED-dən heç bir maliyyələ almayıb və göstərilən dövrdə bu qurum tərəfindən maliyyələşdirilməyib.

3. Məqalədə iddia olunur ki, 2024-cü ildə Turan Avropa İttifaqının Azərbaycandakı nümayəndəliyindən 18,771 manat alıb. Bu iddia əsassızdır - Turan belə vəsait almayıb.

4. Müəlliflər həmçinin Turanın Çexiyanın hərbi attaşesindən 68,946 manat aldığı və bu vəsaitin "abunəlik" adı altında gizlədildiyi barədə iddia irəli sürüb. Belə bir ödəniş mövcud deyil. Bu, açıq şəkildə saxtakarlıqdır.

5. Məqalədə iddia edilir ki, 2023-cü ildə Turanın gəliri 600,000 manatdan çox olub və bunun əhəmiyyətli hissəsi Avropa səfirlikləri və fondları, o cümlədən Avropa Demokratiya Fondu (EED), USAID və Qərb kəşfiyyat xidmətləri ilə əlaqəli strukturlardan daxil olub. Bu, böhtandır. Agentliyin gəliri qeyd olunan məbləğdən dəfələrlə az olub və yalnız informasiya məhsullarının satışı nəticəsində formalaşıb. Turan bu strukturlardan heç bir maliyyə almayıb.

6. Avropa Demokratiya Fondunun (EED) guya 2022-ci ildə agentliyə analitik materialların hazırlanması üçün 120 min avro ayırdığı iddiası tamamilə yalandır. EED heç vaxt Turanı maliyyələşdirməyib.

7. Məqalədə bildirilir ki, Fransa strukturları Turanı fəal şəkildə dəstəkləyib, xüsusilə 2021-ci ildə agentlik "Mediazona" fondundan 50,000 avro alıb. Bu da növbəti saxta iddiadır- Turan "Mediazona" və ya oxşar qurumlardan heç vaxt maliyyə almayıb..

İkinci məqalə (Day.az, 18 fevral) agentliyin informasiya xidmətlərinin satışından əldə etdiyi qanuni gəliri "xarici maliyyələşmə" kimi təqdim etməyə çalışır. Məqalədə 2020-2024-cü illər arasında Turanın guya xaricdən 180,596 manat aldığı qeyd edilir və bu, xarici müdaxilənin sübutu kimi təqdim olunur. Lakin, əslində, bu agentliyin xəbər və analitik materiallarının satışından əldə etdiyi qanuni kommersiya gəlirləridir.

Turanın bank hesabına daxil olan bütün vəsaitlər tam şəffafdır və Azərbaycan qanunvericiliyinin tələblərinə tam uyğundur.

Bu hər iki nəşr tərəfindən ölkədə dövlət tərəfindən maliyyələşdirilməyən yeganə müstəqil informasiya agentliyi olan Turana qarşı məqsədyönlü hücumdur.

Day.az agentliyi Turanın mövqeyini öyrənmədən bu cür ciddi ittihamları dərc etməklə "Media haqqında" qanunu və jurnalist etikası prinsiplərini pozub.

“Media haqqında”qanuna uyğun olaraq, Turan Day.az-dan cavab hüququnun təmin edilməsini və bu bəyanatı saytında dərc etməsini tələb edir. Biz agentliyin nüfuzunu qorumaq üçün hüquqi addımlar atmaq hüququmuzu özümüzdə saxlayırıq.

Turan İnformasiya Agentliyi