Media-icmal 11.02.21

"Sfera.az" saytı "Avtomobil bazarı aktivləşir, qiymətlər dəyişə bilər – ekspert" sərlövhəli məqalədə müəllif Azərbaycanın avtomobil bazarındakı vəziyyəti ekspert Ramil Osmanlı ilə dəyərləndirir.

Ekspertin fikrincə, karantin rejiminin yumşalması, il dəyişməsi, manat üzərindəki neqativ təsirlərin tədricən aradan qalxması kimi amillər avtomobil bazarına müsbət təsirlərini göstərib.

Ekspert əlavə edir ki, alıcılıq qabiliyyətinin, müraciətlərin və buna nəzərən, bazarda aktivliyinin artımı müşahidə olunmaqdadır.

R.Osmanlı vurğulayır ki, eyni zamanda, mövsüm olaraq avtomobil bazarı üçün aktiv bir dövr başlayır. Pandemiya dövründə ictimai nəqliyyatın fəaliyyətinin məhdudlaşdırılması da avtomobilə olan marağı artıran amillər sırasındadır.

Ekspertə görə, hazırda qiymətlər barədə bir söz demək çətindir, ancaq aktivlik artdığı halda qiymətlərə də müəyyən təsir göstərəcək.

"Modern.az" saytı isə "Ermənistan rəsmilərinin Qarabağ səfəri: Azərbaycan buna necə "stop" qoya bilər?" sərlövhəli məqalədə qoyulan suala cavab axtarır.

Müəllif Ermənistanın baş prokuroru Artur Davtyanın Xankəndinə səfərini, burada keçirdiyi görüşləri qanunsuz  adlandırır.

Müəllif vurğulayır ki, rəsmi Bakının xəbərdarlıqlarına baxmayaraq, Ermənistan rəsmilərinin regiona səfər intensivliyi davam edir.

Təhlükəsizlik məsələsi üzrə ekspert İlham İsmayıl hesab edir ki, yalnız Qarabağda yaşayan ermənilərin Azərbaycandan gediş-gəlişlərinə icazə verilməlidir.

Ekspert deyir ki, 2020-cildə Azərbaycan, Ermənistan və Rusiya arasında imzalanmış 10 noyabr Bəyanatı Rusiya, Ermənistan vətəndaşlarının Xankəndidən keçmə haqqını tanıyır, amma bu, düzgün deyil. Oradan yalnız əllərində sənəd olan Dağlıq Qarabağ sakinləri keçməlidir: "Bu cür məsələlər Rusiya ilə xüsusi olaraq danışılmalıdır. Ermənistan vətəndaşlarının Xankəndinə, həmçinin digər azad edilmiş ərazilərə girişi qadağan olunmalıdır", deyə İ.İsmayl bildirir.

O, hesab edir ki, Laçın dəhlizində rusiyalı sülhməramlılarla birgə azərbaycanlı sərhədçilər də dayanmalıdır: "Ermənistan vətəndaşlarının ərazilərə girişi beynəlxalq hüquq normalarına uyğun olmalıdır. Məsələn, viza alaraq ərazilərə daxil ola bilərlər".

"Bizimyol.info.az" saytında isə "Bizim "koronavirus"a restoranlara giriş yasaqdır, şadlıq evlərində isə "şellənə" bilər" sərlövhəli məqalədə müəllif koronavirusla bağlı Azərbaycanda bəzi məhdudiyyət və icazələrin məntiqsizliyini  aydınlatmaq istəyir.

Müəllif iddia edir ki, Azərbaycan dünyada yeganə ölkədir ki, burda məntiq qanunların tərsinə işləyir.

Müəllif deyir ki, Azərbaycanda toy şənlikləri keçirilməsinə icazə verilmir, əsas da bu göstərilir ki, 200-300 nəfərin bir yerə yığılması ilə sıxlıq yaranır və infeksiya sürətlə yayılır.

Müəllifə görə, məntiqsizlik budur ki, restoranlar müştəri, avtobuslar sərnişinlərlə sıx şəkildə doludur. Onda belə çıxır ki, infeksiya restoranlara, avtobuslara daxil ola bilmir?: "Bizim "virus"umuz bilir ki, toy və ya yas mərasimi keçirilən zalda, küçədə gəzişəndə yoluxma yarada bilər. Amma içəridə çoxlu adamın maskasız əyləşdiyi, yeyib-içdiyi restoran və kafelərə giriş ona qadağandır, şəriətlə haramdır", deyə faktı ironiya ilə vurğulayır.

"Yenisabah.az" saytı "Paşinyan da Qarabağda silahlı erməni birləşmələrinin ləğvində maraqlıdır, amma Rusiya..." sərlövhəli məqalədə Cənubi Qafqazda siyasi-iqtisadi münasibətləri politoloq Məhəmməd Əsədullazadə ilə şərh edir.

Dağlıq Qarabağ separatçılarının başçısı Araik Arutyunyanın bu günlərdəki Yerevan şəfərini şərh edən politoloq deyir ki, görüşdə infrasrtruktur məsələləri müzakirə edilməli olsa da, əslində Ermənistanın Qarabağa hərbi xidmətə əsgər göndərməyəcəyi, Qarabağda isə "müdafiaə ordusu"nun buraxılması müzakirə obyekti olub.

Politoloqa görə, burada "düyün" ondan ibarətdir ki, rəsmi İrəvan Qarabağda silahlı dəstələrin buraxılmasında maraqlı olsa da separatçılar və Rusiya bunda maraqlı görünmür.

Politoloq iddia edir ki, rəsmi İrəvanı Dağlıq Qarabağın taleyindən çox Ermənistanın blokadadan çıxarılması düşündürür.

M.Əsədullazadə vurğulayır ki, Cənubi Qafqazda Türkiyə amili Rusiyanı güzəştə cəlb edəcək: "Türkiyənin Qarabağda varlığı burada "Artsax Respublikasının olmayacağı deməkdir".