Media-icmal 13.04.19

Bakının "Formula-1" hazırlıqları, "Qanlıgöl" ətrafındakı evlərin qəzalı hala düşməsi, çay basmasının yaratdığı problemlərin davam etməsi və s. məsələlər bugünkü (13 aprel, 2019-cu il ) medianın aparıcı mövzularındandır.

İki həftədən sonrakı "sürət günləri"

"Azərbaycan" qəzeti "Dünya yenə Bakıya toplaşır" sərlövəhli məqalədə iki həftədən sonra Bakıda keçiriləcək "Formula-1" Azərbaycan "Qran-Pri" yarışlarına hazırığı və bu yarışın ölkə həyatı üçün əhəmiyyətini dəyərləndirir.

Müəllif bu yarışların Azərbaycanda artıq dördüncü ildir keçirildiyini vurğulayaraq builki yarışların aprelin 26-28-də baş tutacağını bildirir.

Yazı müəllifi deyir ki, Bakı Şəhər Halqası (BŞH) isə bu yarışlarda özünəməxsusluğu ilə seçilir və 6 kilometr uzunluğu ilə bu trek dünyada ikincidir.

Müəllifin deməsinə görə, Bakı Şəhər Halqası ətrafındakı tribunaların sayının 9 olması nəzərdə tutulur, ümumi tamaşaçı tutumu 30 minə yaxındır, trekin ən geniş yeri 13 metr, ən ensiz hissəsi isə 7,6 metrdir, trekboyu döngələrin sayı 20-dir, start xətti "Azadlıq" meydanında, finiş xətti isə Abşeron tribunasının qarşısında təyin olunub.

Müəllif komandaların aprelin 15-20-də Bakıya gələcəklərini və həmin vaxta qədər bütün işlərin böyük ölçüdə yekunlaşdırılacağını boildirir.

Yazı müəllifi deyir ki, bu il Azərbaycan "Qran-pri"sinin daha maraqlı olacağı gözlənilir, oyunlara daha gənc pilotlar qoşulub, 10 komandanın hər birində iki pilot yarışacaq.

Müəllifin deməsinə görə, BŞH Əməliyyat Şirkəti "Formula-1" Azərbaycan Qran-prisini izləməyə gələn tamaşaçılar üçün də fərqli əyləncə proqramı hazırlayıb, gün ərzində əyləncəli zaman keçirmələri üçün hər şey düşünülüb. "Belə ki, aprelin 25-dən etibarən Dənizkənarı Milli Park ərazisindəki əyləncə zonası açılacaq. Dəniz Vağzalından Azneft meydanına kimi iki kilometrlik ərazini əhatə edən sahə fərqli əyləncə zonalarına bölünəcək. Bundan başqa, şənbə və bazar günlərində "Crystall Hall"da dünyaca tanınmış iki ifaçının konserti təşkil ediləcək".

Müəllif in deməsinə görə, "Formula-1" Şirkətlər Qrupunun baş icraçı direktoru Çeyz Kerri Azərbaycan Qran-prisi özünəməxsusluğu ilə seçildiyini deyir "2018-ci il mövsümü üçün araşdırma apardıq. Bakı ən çox şöhrət qazanmış yarış məkanıdır. "Formula-1" sürətlə bağlı yarışdır. Burada güclü rəqabət təmin edilməlidir. Azərbaycanla tərəfdaşlığımızdan çox razıyıq və buna çox böyük dəyər veririk".

Müəllif xatrladır ki. "Formula-1" üzrə 2019-cu il dünya çempionatına artıq martın 17-də Avstraliyadakı "Albert Park" trasında start verilib, mövsüm isə dekabr ayında Birləşmiş Ərəb Əmirliklərində keçiriləcək Abu-Dabi Qran-prisi ilə yekun vurulacaq.

Sakinlərin etirazı, cavab verən yox

"Yeni Sabah.az"da isə "Qanlıgöl ətrafındakı sakinlər etiraz etdi - Video sərlövhəli məqalə oxumaq olar.

Müəllif Bakının Yasamal rayonuunda " Qanlıgöl" adlanan ərazidə körpü və bina tikintisilə ilə bağlı aparılan işlərin burada yaşayan sakinlərin evlərinin qəzalı vəziyyətə düşdüyünü bildirir, bu barədə sakinlərlə söhbətləşir.

Yazı müəllifi sakinlərə istinadən bildirir ki, burada evlər qəzalı vəziyyətə düşüb, ailələrin həyatı üçün təhlükə yaranıb və sakinlər tərəfindən şikayətlər artmaqda davam edir.

Müəllif burada 1999-cu ildən yaşayan sakinlərdən birinə istinadən ərazidə yaranan təhlükəli mənzərəni belə təsvir edir:

"Qazıntı işləri gedirdi. Texnikaları dayandırmışıq.Körpü- bina tikintisinin texnikalarıdır. Evlərimiz qəzalı vəziyyətə düşüb. Yamalar (oxu-çuxurlar) qazıblar, hər tərəfi açıqdır. Uşaqlarımız ora düşsə, xəsarət ala bilərlər. Təhlükəsizliyi qorumurlar. Evimizin qəzalı vəziyyətdə olması ilə əlaqədar bu gün Fövqəladə Hallar Nazirliyinə müraciət etmişik. Dedilər ki, gəlib baxacağıq, hələ ki, məlumat yoxdur. Sakinlər hamısı etiraza çıxıb".

Müəllif deyir ki, sakinlərə vəziyyətlə əlaqədar Yasamal Rayon İcra Hakimiyyətindən nümayəndə gələcəyini söyləyiblər, amma nə icra hakimiyyətindən gələn var, nə də bu tikintini aparan qurumun məsullarından kimsə çıxıb sakinlərə nə baş verdiyini izah edir.

Müəllif yenə də sakinlərə istinadən bildirir ki, bu ərazidə qazıntı işlərini aparan qurumun texnikalarına nəzarət edən şəxslərdən biri sakinləri sakitləşdirmək üçün və ya daha hansı məqsədlə icraya müraciət etdiklərini, bura nümayəndə gələcəyini bildirib.

Yazı müəllifinin deməsinə görə, Yasamal Rayon İcra Hakimiyyətinə məxsus avtomobillər ərazidə o yandan, bu yandan keçsələr də əhali ilə təmasa çıxmayıblar: "Baxırlar ki, sakinlər yığılıb bura, çıxıb sakinlərlə ünsiyyətdə olmurlar ki, camaat sözünü desin", bunu isə sakinlərdən biri bildirir.

Müəllif isə deyir ki, məsələ ilə əlaqədar Yasamal Rayon İcra Hakimiyyətilə əlaqə saxladıqda Ərazi idarəetmə və yerli özünüidarəetmə orqanları ilə iş şöbəsindən bildiriblər ki, sakinlərin toplanmasından, aksiya haqda xəbəri yoxdur.

Müəllifin deməsinə görə, icra hakimiyyətindən həmin ərazilərin Mənzil İnşaat Dövlət Agentliyinə məxsus olduğunu bildiriblər.

"Bu dövlətin layihəsidir, iş gedir. Ora Mənzil İnşaat Dövlət Agentliyinin (MİDA) ərazisidir, sosial evlər tikilir. İcradan nümayəndə göndərərik, baxaq görək camaatın şikayəti nədir ".

Müəllif isə ərazidə yaranmış bu vəziyyətdə sakinlərin təhlükəsizlik msələlərinin necə təmin ediləcyinin hələ də açıq qalmaqda davam etdiyini diqqətə çatdırır.

Bir çay basmasının "əsiri"nə dönənlər

"Oxu.az"da isə "Lənkəranda torpaq sürüşməsi - FOTO/VİDEO" sərlövhəli məqalə diqqət cəlb edir.

Müəllif Lənkəran rayonunun Veravul kəndində çayın sahilində yaşayanların torpaq sürüşməsindən əziyyət çəkdiklərini gündəmin müzakirəsinə gətirir..

Müəllifin deməsinə görə, bu kənddə 20-yə yaxın evin avtomobil yolu tamamilə bağlanıb və buna səbəb 2016-cı ilin aprel ayında Veravulçayın daşması olub.

Yazı müəllifi deyir ki. bu daşqından sonra sahilboyu gedən yoldan istifadə çətinləşib, üstəlik son günlərdə Cənub bölgəsində yağan intensiv yağışlardan doğan nəticə səbəbilə yol tamamilə yararsız hala düşüb.

"Belə ki, təxminən səkkiz metrlik eni olan yolun indi cüzi hissəsi qalıb. Nəticədə hava şəraiti pisləşəndə nəinki maşınla, hətta piyada yolu keçmək mümkünsüz olur".

Müəllif kənd sakinlərinə isrtinadən bildirir ki, bir az azca yağış yağan kimi eyniadlı Veravulçayın çayın su səviyyəsi qalxır və kəndin yolunu keçilməz edir.

Sakinlərin demələrinə görə, onlar 150 hektara yaxın pay torpaqlarına, əkin sahələrinə, uşaqlar da məktəbə gedə bilmirlər.

Sakinlərin sözlərinə görə, hələ bu da yaşanan çətinliklərin hamısı deyil, belə ki, yoldan istifadənin çətinləşməsi nəticəsində hətta elə olub ki, təcili tibbi yardım maşını xəstənin evinə gedib çıxa bilməyib.

Müəllifinsə deməsinə görə, Veravul sakinləri gələcəkdə hər hansı bir xoşagəlməz hadisə zamanı belə problemlərin yenə də təkrarlanacağından narahatdırlar.

Sakinlər həm də belə problem yaşamalarına baxmayaraq bu məsələ ilə bağlı müraciətlər etsələr də tədir görülməməsindən şikayətçidirlər.

Müəllif deyir ki, sakinləri narahat edən bu məsələ ilə bağlı Lənkəran Yuxarı Xanbulançay Hidroqovşağı İstismar İdarəsilə əlaqə saxlanılıb və qurumun əməkdaşı çay sahilində müəyyən bərkitmə işlərinin aparıldığını bildirib.

Müəllif bildirir ki, alternativ yolun olmaması, bunun buradakı insanlara çətinliklər yaratdığı qarşı tərəfin diqqətinə çatdırıldıqda isə idarədən qısaca olaraq problemin həllni tapacağını söyləyiblər.