Media-icmal 17.05.21

“Yenisabah.az”  saytı  “Qarabağda hər an əməliyyat başlaya bilər – General” sərlövhəli məqalədə ehtiyatda olan general-leytenant Yaşar Aydəmirov Azərbaycan Silahlı Qüvvələrinin hazırda davam edən hərbi təlimlərini dəyərləndirir.  

Generalın fikrincə, hazırda davam edən təlimlər sıradan bir təlim deyil.

Aydəmirova görə, əvvəla Azərbaycan Qarabağ torpaqlarının xeyli hissəsini işğaldan azad edib, bununla bağlı yeni tapşırıqlar meydana gəlib, ordu tərəfindən dövlət sərhəddinin himayəsi həyata keçirilməlidir.

Daha bir cəhət budur ki, yeni texnikalar alınıb, təlimlərdə tətbiq olunmalıdır, əsasən də pilotsuz uçuş aparatlarının və ordu ilə onların qarşılıqlı əlaqələrinin tətbiqi vacibdir, təlimlər keçirməyəndə bu problemlər açıq qalır.

Qarabağda antiterror əməliyyatlarının keçirilə bilməsinə gəlincə, general deyir ki, əgər erməni tərəf kapitulyasiya aktının tələblərini yerinə yetirməsə Qarabağ ərazisində antiterror əməliyyatlarının keçirilməsi hər an mümkündür.

“Modern.az”  saytı isə “Başçı gözləyən rayonlar...” sərlövhəli məqalədə bu və ya digər səbəbdən vəzifələrindən azad olunan rayon icra başçılarının yerinə yeni təyinatların olmaması şərh edilir.

Müəllif deyir ki, hazırda 6 rayonda- Bakının Nizami rayonu, Cəlilabad, Göygöl, Kürdəmir, Lerik, və Şəmkirdə icra başçısı vəzifəsi vakantdır.            Adları çəkilən rayon icra başçılarından kimlərsə sərəncamla, kimlərsə cinayət əməllərinə yol verdiklərinə görə keçirilən əməliyyat nəticəsində ifşa edilərək vəzifədən azd olunublar.

Müəllif deyir ki, keçmiş səlahiyyət sahibləri hüquq-mühafizə orqanları tərəfindən rüşvət və korrupsiyada ittiham olunurlar, onların barəsində həbs qətimkan tədbiri seçilib. Bu icra başçıları 2015-2021-ci illərin ötən dövrü ərzində vəzifələrindən azad olunanlardır. Müəllif bunu da yada salır ki, bu başçılardan əlavə daha 7 icra başçısı hələ həbsdədir.

“Redaktor.az” saytı isə “Açıq havada maska taxmaq qadağası ləğv olunur” sərlövhəli məqalədə açıq havada maska taxmaq məcburiyyətinin aradan qaldırıla bilməsinin mümkünlüyünü  müzakirə edir. 

Tibb elmləri doktoru Adil Qeybulla deyir ki, iaşə müəssisələri kimi qapalı məkanlarda insanlar saatlarla maskasız söhbətləşirlər, amma açıq havada maskasız gəzmələrinə qadağa qoyulur. Onun fikrincə, bu yanaşma məqsədəuyğun deyil.

Qeybulla bildirir ki, COVID-19 infeksiyasına yoluxan insanların dinamikasında eniş var və bu baxımdan açıq havada tibbi maskadan istifadə edilməsi qadağasının ləğvi gözləniləndir.

“Bizimyolinfo.az”  saytı isə ”Satan razı, alan narazı - Qiymətlər artır, maaşlar yox” sərlövhəli məqalədə marketlərdə qiymət bahalaşmasını iqtisadçı-ekspert Toğrul Vəliyevlə müzakirə edir.

Müəllif deyir ki, həmişə alış-veriş etdiyi məhəllə marketindən əvvəllər 2 manat 80 qəpiyə aldığı bitki yağını indi 5 manata alır. Onun fikrincə, ciddi  bahalaşma var, hər şey qalxıb, bir maaşlardan başqa.  

İqtisadi-ekspert Toğrul Vəliyevə görə, Statistika Komitəsinin qiymətlərin, sadəcə, 3,7 faiz, ərzaq məhsullarının isə 5,2 faiz bahalaşması ilə bağlı rəqəmləri inandırıcı görünmür.

O deyir ki, fevral ayının ikinci yarısında apardığı monitorinq zamanı ərzaq mağazasının satıcıları müxtəlif məhsulların qiymətlərinin 10 qəpikdən 40 qəpiyədək bahalaşdığını bildiriblər: “Bizdə məhsuldarlıq aşağı olduğu üçün məhsul baha başa gəlir. Məhsulun istehsalı az, xərci isə çoxdur, elə bu da Azərbaycanda istehsal olunan məhsulun istehlakçıya baha satılmasına, qiymətlərdə isə mütəmadi artımın baş verməsinə gətirir”, - ekspert belə bildirir.