Media-icmal 18.05.21

Gürcüstanın Dmanisi rayonunda mövcud vəziyyət və bunun səbəbləri, Qarabağdakı vəziyyətin Azərbaycanın iqtisadi əlaqələrinə təsirləri və s. məsələlər medianın aparıcı mövzuları sırasındadır...

“Bizimyolinfo.az” saytı “Dmanisidə son vəziyyət: Polis qarşısını ala bilmir, şəhərə giriş-çıxış bağlanıb” sərlövhəli məqalədə Gürcüstanın bu rayonundakı son durumu dəyərləndirir.

Məsələnin mahiyyəti budur ki, Gürcüstanın Dmanisi rayonunda iki gündür ki, svanlarla azərbaycanlılar arasında kütləvi qarşıdurma davam edib. Buna səbəb isə svanların azərbaycanlıların işlətdikləri mağazalardan aldıqları məhsulların pullarını ödəməməsidir. 

Azərbaycanlı əhalinin sözlərinə görə, hüquq-mühafizə orqanlarının məsələyə yetərli münasibət bəsləməməsi gərginliyin daha da artmasına səbəb olub.

Gürcüstan Daxili İşlər Nazirliyi insidentdə iştirak edən 8 nəfərin saxlanıldığını bildirsə də, azərbaycanlılar problemin bununla həllini tapmayacağını deyirlər. Onların sözlərinə görə, bölgədə svanlara münasibətdə cəzasızlıq şəraiti hökm sürür.

Gürcüstan hüquq-mühafizə orqanları baş verənlərlə bağlı istintaq başlandığını bildirir, problemin etnik qarşıdurmaya çevrilməli olmadığı xəbərdarlığı edirlər.

Qarşıdurmanı önləmək üçün 150 polis cəlb edilsə də, bu, mümkün olmayıb, odur ki, Dmanisiyə giriş-çıxış bağlanıb, bura yalnız xüsusi icazə ilə gəlmək mümkündür.

“Modern.az” saytında isə “Ermənistanla gərginlik Azərbaycanın iqtisadi əlaqələrinə necə təsir edəcək? –  şərh” sərlövhəli məqalədə bəhs olunan mövzu araşdırılır.

Məsələni şərh edən deputat Vahid Əhmədov deyir ki, Qarabağ ərtrafında hazırda erməni tərəfin süni gərginlik görüntüsü yaratmaq cəhdi, informasiya savaşı, Rusiya sülhməramlılarının davranış tərzi Azərbaycanın digər dövlətlərlə iqtisadi əlaqələrinə təsir göstərməyəcək.

Onun fikrincə, əksinə, işğaldan azad edilmiş ərazilər hesabına Azərbaycanda iqtisadi artım gözlənilir. Qarabağa investisiya yatırımı, kənd təsərrüfatı sahəsinin genişləndirilməsi əsas hədəflərdəndir, odur ki, ermənilərin hay-küyü Azərbaycan iqtisadiyyatına təsir edəcək məsələ deyil.

Deputat Zəngəzur dəhlizi məsələsinin hökmən həll ediləcəyilə bağlı rəsmi Bakının mövqeyini Azərbaycanın qələbəsini həzm edə bilməyənlərə, erməniləri dəstəkləyənlərə ciddi mesaj adlandırır. Deputat hesab edir ki, Azərbaycan informasiya savaşında daha aktiv olmalıdır.

V.Əhmədov vurğulayır ki, Azərbaycanı dəstəkləyən güclü dövlətlər var, bunlarla digər əlaqələrlə yanaşı, iqtisadi əlaqələr də inkişaf edir. Türkiyə ilə dövriyyənin 20 milyard dollara çatdırılması hədəflənir, odur ki, iqtisadi baxımdan Azərbaycanın çətinliyi yoxdur.

“Sfera.az” saytında isə “İndi Gürcüstanda narahatdırlar ki…  – Natiq Cəfərli Dmanisidəki toqquşmadan danışdı” sərlövhəli məqalədə iqtisadçı-ekspert Natiq Cəfərli Dmanisidəki toqquşmaların səbəblərini şərh edir.

N.Cəfərli deyir ki, Dmanisi (Başkeçid) strateji bölgədir, Ermənistana yaxındır, çox güman ki, Ermənistan xüsusi xidmət otrqanları orada ciddi fəaliyyət göstərirlər.

Onun fikrincə, istənilən halda təxribatlara cavab verilməlidir ki, iki ölkə arasında ədavətə yol açılmasın. Onun sözlərinə görə, Gürcüstanın narahatlığı budur ki, Qarabağ münaqişəsi, demək olar ki, bitib, sərhədlər açılsa, iqtisadi və infrastruktur əlaqələri yaransa, “Zəngəzur dəhlizi” tam açılsa Gürcüstanın bölgədə önəmi azalacaq, iqtisadi fürsətləri daralacaq.

Ekspertə görə, son 30 ildə Azərbaycan-Ermənistan münaqişəsindən ən çox maddi qazanc götürən ölkə Gürcüstan idi, çünki tranzit yolları əsasən bu ölkədən keçirdi.

N.Cəfərli hesab edir ki, Azərbaycan tərəf Gürcüstanın belə narahatlıqlarını aradan qaldırmalıdır, çünki “Gürcüstan dəhlizi” hələ Azərbaycana uzun müddət əhəmiyyətli alternativ kimi lazımdır: “Odur ki, provokasiyalara uymamalı, soyuq başla, hüquq çərçivəsində bütün problemlər çözülməli, bizim hökumət bu məsələni daim diqqətdə saxlamalıdır”, deyə eskpert bildirir.