Media-icmal 19.01.21

“Azərbaycan” qəzeti  “2021-ci ilin hansı sosial hədəfləri açıqlandı” sərlövhəli məqalədə bəhs edilən dövrün sosial hədəflərini diqqətə çatdırır.

Müəllif deyir ki, şəhid ailələrinin, qazilərin, sosial dəstəklə,  yaralanmış hərbçilərin tibbi-sosial reabilitasiya xidmətləri,  müasir protezlərlə təmin olunması sosial hədəflər sırasındadır.

Əmək və əhalinin sosial müdafiəsi nazirinin müavini Anar Kərimov bunu 2020-ci il sosial sahədə görülən işlərə və 2021-ci ilin sosial hədəflərinə dair keçirilən mətbuat konfransında bildirib.

Onun deməsinə görə, postmüharibə dövründə artıq 11 mindən çox şəhid ailəsi üzvü, qazi, müharibədən zərər çəkən şəxs bu dəstəklə əhatə olunub, 2650 şəhidin 6500 ailə üzvünə sosial ödənişlər təyin edilib.

Nazir müavini deyib ki, son bir ildə daha 1500 şəhid ailəsi və müharibə ilə əlaqədar əlilliyi olan şəxs mənzil və fərdi evlə, 400 müharibə əlili avtomobillə təmin edilib, indiyədək bu kateqoriyalardan olanlara 9100-dən çox mənzil və fərdi ev, 7200-dən çox avtomobil verilib.

Müəllif deyir ki, son iki ildə 10-dan çox bölgədə, o cümlədən 2020-ci ildə 6 bölgədə (Lənkəran, Xaçmaz, Şirvan, Şəki, Sumqayıt, Göygöl) müasir reabilitasiya və sosial xidmət müəssisələri açılıb. Son bir ayda onlara 530 reabilitasiya vasitəsi verilib, həmçinin 6 qazi yüksək texnologiyalı 8 protezlə təmin olunub, hazırda da bu sahədə işlər davam edir.

“Mətbuat.az” saytı isə Pandemiya aprel ayında bitəcək? –açıqlama” sərlövhəli məqalədə deputat Vüqar Bayramovla cavab axtarır.

Deputat vurğulayır ki, yanvarın 18-dən sərt karantin rejimi mərhələli şəkildə yumşalacaq. 

Digər tərəfdən deputat yanvarın 18-dən Azərbaycanda həm də vaskinasiya prosesinə də başladığını söyləyir, dünyann əksər ölkələrində bu prosesə start verilir.

V.Bayramova görə, bütün bunlara baxmayaraq, hələlik qlobal pandemiyanın davam etmə müddəti ilə bağlı proqnozlar çox da nikbin deyil.

Onun sözlərinə görə, vaksinasiya uğurlu olarsa, o zaman pandemiya aprel ayınadək lokallaşdırıla bilər.

Deputata görə, bir daha sərt karantin rejiminə qayıtmamaq  qaydalara əməl etməkdən keçir.

Deputat vurğulayır ki, sərt karantinin tətbiq olunmaması iqtisadi baxımdan da vacibdir.

Belə ki, rəsmi statistikaya görə, turistlərin yerləşdirilməsi və ictimai iaşə 78,2 min, istirahət, əyləncə və incəsənət sahəsində fəaliyyət 81.5 min vətəndaş çalışır, sərt karantin rejiminin tətbiqilə 160 minə yaxın insan evinə gəlir gətirə bilmir.

Deputat deyir ki, kafe, restoran və xidmət obyektlərinin çalışdığı sektorda il ərzində 2 milyard manata yaxın dəyər yaradılır və bu, kifayət qədər ciddi rəqəmdir.

“Yenisabah.az”  saytı isə Rusiya azərbaycanlı köçkünlərin Xankəndiyə qayıdışına mane olmağa çalışır - Türkiyə ilə Azərbaycan...” sərlövhəli məqalədə Qarabağda Rusiya sülhməramlılarının fəaliyyətinə politoloq Məhəmməd Əsədullazadə ilə münasibət ifadə edilir.

Müəllif deyir ki, Rusiya hər gün Ermənistandan erməniləri Qarabağa gətirərək Xankəndi, Ağdərə və Xocavəndin bəzi hissələrində yerləşdirir. Onlarin  bütün sosial problemlərini  Moskva həll edir.

Politoloqa görə, Rusiya sülhməramlıları ilk növbədə ermənilərin müdafiəsini təşkil edib: “Rusiya sülhməramlı qüvvələrinin fəaliyyəti, yalnız bundan ibarətdir. İlk növbədə burada ermənilərin müdafiəsini təşkil edir”.

Atəşkəsin qorunmasına gəlincə, politoloq deyir ki, silahlı erməni birləşmələri Qarabağdan çıxarılarsa, atəşkəsin qorunmasına ehtiyac qalmayacaq. Onun iddiasına görə, buradakı silahlı erməni terrorçuları sülhməramlıların birbaşa nəzarətindədir. “Rusiya silahlıların çıxarılması şərtinə əməl etmir. Bu da Azərbaycan, Türkiyə ilə Rusiya arasında siyasi münasibətlərdə ciddi problemə gətirəcək”, -M.Əsədullazadə bəyan edir.

M.Əsədullazadə iddia edir ki, Rusiya azəbaycanlı köçükünlərin Xankəndi, Ağrədəyə qayıdışına mane olmağa çalışır, Rusiya həmçinin demoqrafik quruluşu dəyişməklə azəbaycanlı köçkünlərin Xankəndi, Ağrədəyə qayıdışına mane olmaqdadır.

Politoloqa görə, Türkiyənin Azərbaycanda hərbi hava bazalarını açması və Qarabağda öz hərbi kontingentini yerləşdirməsi, siyasi danışıqlarda vəziyyəti Azərbaycanın lehinə dəyişə bilər.

“Yeniavaz.com”  saytı isə ”Koronavirus yoluxduruculuq qabiliyyətini nə zaman itirəcək? - Azərbaycanlı alim açıqladı” sərlövhəli məqalədə verilən suala tibb elmləri doktoru Nuran Abdullayev ilə cavab axtarılır.

N.Abdullayev deyir ki, koronavirusa yoluxmamaq peyvəndlərin istifadəsindən sonra mümkün olacaq.       Onun deməsinə görə, peyvəndlərdən sonra COVID-19 pnevmoniyası yaradan bu virus orqanizmə düşərsə, həmin immunitet nəticəsində virus məhv ediləcək və artıq insan xəstələnməyəcək.

N.Abdullayev vurğulayıb ki, mutasiya olunmuş virusa yoluxma halı hər həftə, iki dəfəyə yaxın artır, bütün ölkələrdə, o cümlədən Azərbaycanda qabaqlayıcı tədbirlər görmək mütləqdir.

N.Abdullayevin deməsinə görə, virusun mutasiyası tətbiq olunacaq peyvəndlərə, xüsusi ilə gen texnologiyası ilə hazırlanan peyvəndlərin effektivliyinə ciddi neqativ təsir etmir, sadəcə, yoluxma əmsalı böyük olduğuna görə dünyada sərtləşdirilmiş karantin rejiminin uzadılmasına səbəb ola və normal həyata qayıdışı gecikdirə bilər.