Media-icmal 22.04.21

Rusiyanın Xocalıda keçirmək istədiyi paradın qarşısını necə almalı, yayda maskalardan istifadənin nə dərəcədə məntiqli olması, Ukrayna-Rusiya münasibətlərində Azərbaycan kimin yanında yer almalıdır, Azərbaycanda cinayət şəbəkəsi iddiası və s. məsələlər medianın aparıcı mövzuları sırasındadır... 

“Yenisabah.az” saytında “Xocalıdakı hərbi paradın qarşısı alınmalıdır! – deputat” sərlövhəli məqalədə deputat Elman Məmmədov Rusiyanın Qarabağda keçirməyi nəzərdə tutduğu hərbi parada mane olmaq zərurətindən bəhs edir.

Deputat deyir ki, Qarabağda yerləşən Rusiya sülhməramlıları 9 May faşizm üzərindəki Qələbə gününü Xocalı aeroportunda hərbi parad keçirməklə qeyd etməyə hazırlaşırlar.

Məqalədə vurğulanır ki, Rusiya hərbiçilərinin Xocalı aeroportunda hazırlıq məşqinə başlaması Azərbaycan cəmiyyətində etirazla qarşılanıb: “Rusiyanın 366-cı motoatıcı alayının 1992-ci ildə erməni separatçıları ilə birgə Xocalıda azərbaycanlılara qarşı soyqırımı törətdiyi unudulmayıb. Rusiya sülhməramlılarının Azərbaycan ərazisində hərbi parad keçirməsi özbaşınalıqdır”, deyə Xocalıdan deputat seçilmiş Elman Məmmədov vurğulayıb.

Deputata görə, paradın keçirilməsi sülhməramlı missiyasına aid olmayan bir hərəkətdir və Azərbaycan qanunlarına hörmətsizlikdir, çünki Xocalını işğal edəndə ermənilər tək olmayıblar.

O bildirib ki, 1992-ci ilin fevralında Xocalını Rusiyaya məxsus 366-cı motoatıcı alayın bütün canlı qüvvəsi və hərbi texnikası ilə işğal ediblər.

Deputat deyir ki, əgər Rusiya sülhməramlıları parad keçirmək istəyirsə, bunu gedib öz ölkələrində təşkil etsinlər, Xocalıda parad ola bilməz, bu, Azərbaycanı qıcıqlandırmaq və ona hörmətsizlikdir.

“Yeniavaz.com” saytı isə “Yayda maskalardan imtina etmək olarmı? - TƏBİB açıqladı” sərlövhəli məqalədə qarşıdakı isti aylarda maska taxılması ilə bağlı məsələni dəyərləndirir.

Müəllifin sözlərinə görə, son günlər cəmiyyətin müxtəlif təbəqələrində koronavirusla əlaqədar tibbi maskalardan istifadəyə dair birmənalı fikir  yoxdur, müxtəlif istiqamətli fikirlər səsləndirilir.

Müəllifə görə, bəzi insanlar açıq havada maska taxmağa ehtiyac duyulmadığını iddia etsələr də, həkimlər və digər rəsmilər bunun əksini düşünürlər.

Tibbi Ərazi Bölmələrini İdarəetmə Birliyinin (TƏBİB) infeksion xəstəliklər üzrə işçi qrupunun rəhbəri, həkim-infeksionist Vasif Əliyev isə deyir ki, maskadan istifadə mütləqdir.            

“Moderator.az” saytında “Moskva “İsgəndər-M”lə bağlı məsələdə dövlətimizə dürüst və ətraflı cavab verməlidir” sərlövhəli məqalədə deputat Vahid Əhmədov rəsmi Kremlin məsuliyyətini yada salır.

V.Əhmədova görə, Rusiyanın Qarabağda parad keçirmək niyyəti Azərbaycan dövlətinə mesajdır, həm də Azərbaycan və Türkiyə Rusiya ilə gərginlik yaşayan Ukraynanın yanında yer almalıdır.

Deputat deyir ki, bu mənada Azərbaycan həm Ermənistan, həm də Rusiyadan baş verənlərlə bağlı rəsmi cavab gözləyir.

“…Vətən müharibəsində ölkəmizə qarşı “İsgəndər-M” raketlərindən istifadə ilə bağlı xalqımız da, dövlətimiz də həm Ermənistandan, həm də Rusiyadan izahat gözləyir. O raketlərin necə əldə edilməsi, hardan atılması və s. kimi məsələlər açıq qalır, Azərbaycan tərəf suallarına tam cavab gözləyir”, deyə deputat bildirir.

V.Əhmədov deyir ki, söhbət “İsgəndər-M” raketlərindən gedir. Bu raketlər ixrac üçün nəzərdə tutulmayıb və onların satışı yoxdur. Deputat hesab edir ki, Azərbycan dövləti bundan sonra da qətiyyətli şəkildə lazımi cavabı almaq üçün öz tələblərini səsləndirməli, Rusiyadan dürüst cavabın alınmasına nail olmalıdır.

V.Əhəmədov hesab edir ki, hərbi Qənimətlər Parkında nümayiş etdirilən “İsgəndər-M” qalıqlarını Azərbaycanın Türkiyə vasitəsi ilə Suriyadan gətirməsi ilə bağlı fikirlər bu cinayəti işlədənlərin cavab verməkdən yayınmaq cəhdidir, həm də Azərbaycan-Türkiyə münasibətlərinə xələl gətirməkdir.

V.Əhmədova görə, mayın 9-da Rusiyanın Qarabağda parad keçirmək niyyəti Moskvanın güc tətbiqinə daha çox üstünlük verdiyini göstərir. Onun fikrincə, bu, Azərbaycan dövlətinə verilən mesajdır.

Ukrayna-Rusiya münasibətlərinə gəlincə, deputat deyir ki, Azərbaycan və Türkiyə  Ukraynanın yanında yer almalıdır.

“Müsavat.com” saytında isə “Azərbaycanda xəstəxanalarda yerləri, koronavirusa aid dərmanları pulla satan həkimlərin cinayət şəbəkəsi var” sərlövhəli məqalədə bəhs olunan məsələ müzakirə edilir.

Amma müəllif iddia edir ki, Azərbaycan dövlətinin bunca əməyinin qarşılığında ortada olan xoşagəlməz fakt var: “Bir sıra səhiyyə ocaqlarında çalışan tibb personalı və həkimlər bir cinayətkar şəbəkə yaradıblar! Bu şəbəkə koronavirus pandemiyasından istifadə edərək, cinayət xarakterli əməllərlə məşğuldur”.

İddiaya görə, səhiyyə sistemində gizli bir şəbəkə xəstəxanalardakı məhdud yerləri rüşvət müqabilində ağır xəstələrin yaxınlarına satır, hətta yerin 4 min manata satıldığını bildirirlər.

Müəllifin sözlərinə görə, bu möhtəkirliyə xəstəxana həkimlərindən başqa, təcili yardım personalının bəzi üzvləri də daxildirlər.

Bundan əlavə, koronavirus müalicəsində istifadə olunan bahalı dərmanlar da möhtəkirliyə alət edilir: “Cinayətkar şəbəkənin üzvləri həmin dərmanları ixtisaslaşmış xəstəxanalardan oğurlayaraq, istifadəsinə “qənaət” edərək, əl altından satışa çıxarırlar”, deyə məqalədə vurğulanır.