Media-icmal 29.05.20

Dövlət başçısının "Qobu-3" qaçıqnlar qəsəbəsinin açılışındakı çıxışı, Azərbaycanda rusdilli məktəblərin müstləqilliyə təhlükə olması ehtimalı, tikinti şirkətinin öhdəliklərini pozması, M.Ə.Rəsulzadənin nəvəsinin babasının xidmətləri barədə danışdıqları v. s. məsələlər medianın aparıcı mövzularıdır...

Dövlət baçısı: Bu evlər müvəqqəti verilir...

Rəsmi "Azəbaycan" qəzeti  "Prezident İlham Əliyev məcburi köçkünlər üçün salınmış "Qobu Park-3" yaşayış kompleksinin açılışında iştirak edib" sərlövhəli məqalədə dövlət başçısı İlham Əliyevin mayın 28-də yaşayış kompleksinin açılışında etdiyi çıxışn mətnini dərc edib.

Dövlət başçısı deyib ki, "Qobu Park-3" kompleksində 1336 məcburi köçkün ailəsi yerləşəcək. 960 şagirdlik məktəb, uşaq bağçası artıq tikilib, istifadəyə hazırdır, bütövlükdə bu qəsəbədə 3700-ə yaxın məcburi köçkün ailəsi yerləşdiriləcək.

Onun sözlərinə görə, ümumiyyətlə Azərbaycanda 300 mindən çox məcburi köçkün bu günə qədər mənzillərlə, fərdi evlərlə təmin olunub və onlardan təqribən 20 mini bir şirkət tərəfindən görülmüş işlər nəticəsində evlərlə təmin edilir.

"Ancaq onu da bilməliyik və bütün Azərbaycan xalqı bilməlidir ki, bu, sizin üçün müvəqqəti yaşayış yeridir. Torpaqlarımız işğaldan azad ediləndən sonra biz bu gün hələ də işğal altında olan torpaqlarda buna oxşar gözəl binalar, şəhərciklər tikəcəyik, ermənilər tərəfindən dağılmış şəhərlərimizi yenidən quracağıq", deyə Prezident əsas hədəfin torpaqların işğaldan azad edilməsi olduğunu vurğulayıb.

Dövlət başçısı yenə də torpaqların işğal altında qalmasına toxunaraq, buna görə Azərbaycan Xalq Cəbhəsini əsas günahkar kimi göstərib.

Onun fikrincə, əgər o vaxt Azərbaycanın başında Heydər Əliyev olsaydı, heç vaxt bir qarış torpaq da düşmən tərəfindən işğal edilə bilməzdi.

Müstəqilliyə təhlükə mənbəyi?

"Moderator.az" saytında yer alan "Azərbaycanda rusdilli məktəblərin sayının artırılması müstəqilliyimizə təhlükə yaradır" sərlövhəli məqalədə müəllif Azərbaycanda Rusiyaya sevgi və heyranlığın artırılmasının təhlükələri barədə deputat Sabir Rüstəmxanlı ilə söhbətləşir.  

"Azərbaycan Xalq Cümhuriyyətinin (AXC) varisi kimi bugünki müstəqil Azərbaycanın da başının üstündə qara buludlar daim qalır. Xüsusilə son dövrlərdə Rusiya amilinin bəzi qüvvələr tərəfindən qabardılması diqqət çəkir. Burada Rusiyada çalışan üç milyona yaxın insanın da təsiri var. Eləcə də, Azərbaycanda rusdilli məktəblərin sayının artırılması və sair amillər, əslində bunların hamısı müstəqilliyimizə təhlükə yaradır. İran da daxilindəki Azərbaycan türklərini bu müstəqillik ideyalarından uzaqlaşdırmaq məqsədilə daim Azərbaycanın zəifləməsinə çalışır", deyə deputat bildirir.

Onun fikrincə, bütün bu sadalanan qüvvələrin Ermənistanı müdafiə etməkdə məqsədləri Azərbaycan türklərinin qüvvətlənməsinə imkan verməməkdir. Bütün bu qüvvələr Ermənistanı məhz o maqsədlə müdafiə edirlər ki, Azərbaycan türkləri güclənə bilməsin.

Deputat ölkə daxilində milli birliyin olmaması, partiyalararası təfriqələr,  hakimiyyətlə xalq və siyasi partiyalar arasında ziddiyyətlər kimi amilləri dövlətçiliyiə  təhlükə sayıb.

Deputat əlavə edib ki, hakimiyyətlə müxalifət partiyaları arasında müəyyən dialoqlar gedir, amma bu, genişləndirilməlidir: "Ölkədə vətəndaş cəmiyyəti gücləndirilməlidir, milli birlik istiqamətində təbliğat aparılmalıdır, bundan başqa, tarixə, keçmişimizə hörmət gücləndirilməlidir. O iki illik dövr (1918-20-ci illər) elə təbliğ olunmalıdır ki, bu tarix xalqın gözündə bir ideal kimi yaşasın. Təəssüf ki, bunların hamısı yetərincə nəzərə alınmır".

Tikinti şirkəti öhdəliklərini icra etmir...

"Sfera.az"da ""Sipark" İnşaat Şirkətinin Təbriz küçəsindəki sərgüzəştləri" sərlövhəli məqalədə müəllif haqqında bəhs olunan tikinti şirkətin fəaliyyətini dəyərləndirir.

Müəllifin sözlərinə görə, şirkət Təbriz küçəsindəki pilot layihəsini icra etmir və sakinlərlə bağladığı müqavilə öhdəliyinin 2.2.5-ci (red. 20 ay ərzində binanın tikilib sakinlərə təhvil verilməsinə dair öhdəlik) maddəsini pozub: "6 bloklu, 16 mərtəbəli binanın 2017-ci ildən yalnız 3 blokunda 14-cü mərtəbəyə qədər tikinti aparılıb. Yerdə qalan 3 blokun tikintisi isə hələ də başlamayıb".

Müəllifin sözlərinə görə, dəfələrlə aidiyyatı qurumlara şikayət olunmasına baxmayaraq, tikinti aparılmır.

Müəllif deyir ki, sözügedən pilot layihədə mənzil gözləyən şikayətçi vətəndaşlar şirkətə müraciət ünvanlayıblar: "Tikintini icra edə bilmirsinizsə, layihəni başqa bir şirkətə təhvil verin, inşaatı onlar davam etdirsinlər. Sizə görə biz ömrümüzü kirayələrdə keçirib, kirayələrdə ölməliyik?! Karantin bitdikdən sonra Prezident Aparatı qarşısında etirazlara başlayacağıq. Dünən qonşularımızdan biri stress və əsəbdən dünyasını dəyişdi. Bundan əvvəl də neçə qonşumuz eyni səbəbdən vəfat edib", deyə müraciətdə vurğulanır.

Xalqa azadlıq hissi yaşadanlar

"Oxu.az" saytında yer alan "Cümhuriyyət qurucusunun nəvəsi: Azadlıq ideologiyasının banisi kimi Rəsulzadə sovetlərə ciddi təhlükə idi") sərlövhəli məqalədə müəllif tanınmış sənət adamı Rais Rəsulzadə ilə babası, 1918-20-ci illər Xalq Cümhuriyyətinin banisi  Məhəmməd Əmin Rəsulzadənin fəaliyyəti haqqında söhbətləşir.

"Məhəmməd Əmin Rəsulzadə Azərbaycan xalqına azadlıq hissini yaşatdı.

O, bu yolda özünü deyil, xalqının məqsəd və məramını düşünən şəxsiyyətlərdən biridir. M.Ə. Rəsulzadə Cümhuriyyətin qurucularından biridir, Azərbaycan xalqının oğludur. Xalq onun Azərbaycan və azərbaycançılıq ideyası üçün əlindən gələni etdiyini bilir", deyə R.Rəsulzadə bildirib.

Amma nəvə Rəsulzadə hesab edir ki, bəzi hallarda babası haqqında təhriflərə yol verilir, əsassız ittihamlar irəli sürülür.

O, xüsusi olaraq vurğulayır ki, bu məsələdə 70 il davam etmiş sovet dönəmində sovet ideologiyası M.Ə.Rəsulzadəni xalqına düşmən kimi tanıdıb: "Sovet hakimiyyəti bərpa olunduqdan sonra xalqın vətənpərvər oğulları, görkəmli şəxsiyyətlər, sayılıb-seçilən ziyalılar təqib olundu, güllələndi. Ən çox təqiblərə məruz qalanlardan biri isə Məhəmməd Əmin Rəsulzadə olub. O, öz xalqının maraqlarını, milli birlik, azərbaycançılıq nəzəriyyəsini öndə tutub".

R.Rəsulzadə deyir ki, babası Azərbaycan xalqına azadlıq hissini yaşatdı və bunun nəticəsidir ki, ideologiyası, fikirləri bu gün də xatırlanır.

“O, xalqımızın milli istiqlal hərəkatını təkcə türk ellərində deyil, bütün islam aləmində ilk respublika üsul-idarəsi olan Azərbaycan Demokratik Cümhuriyyətinin təməl daşını qurdu. Milli məsələləri, xalqın rifahını öndə tutan Rəsulzadə bizə bu gün yaşadığımız, yaşatdığımız müstəqil Azərbaycanı bəxş etdi. Əbəs yerə onun məzarı üzərində "İnsanlara hürriyyət, millətlərə istiqlal!" fikirləri yazılmayıb".