Media-icmal 30.03.21

İstanbul-Bakı və Ankara-Bakı təyyarə biletlərinin bahalığının səbəbləri, koronavirusa yoluxanlar arasında ölüm hallarnın artması, aprelin 5-dən məktəblərin bağlana bilməsi barədə xəbərdarlıq, satılıq kirayə mənzil layihəsinin mənfi tərəfləri və s. məsələlər medianın aparıcı mövzuları sırasındadır.

“Yeniavaz.com”  saytında dərc olunan Türkiyə Hava Yolları  aviabileti Kiyevə 40, Tbilisiyə 59, Bakıya 241 dollara satır – səbəb AZAL-dır sərlövhəli məqalədə məxsusi olaraq İstanbul-Bakı və Ankara-Bakı aviareysləri üçün təyyarə qiymətlərinin baha olmasının səbəbləri araşdırılır.

Müəllif deyir ki, Türkiyə Hava Yollarına məxsus aşağıbüdcəli “Anadolu Jet” aviaşirkəti 11 aprel – 31 may 2021-ci il tarixlərində Türkiyədən xarici ölkələrə səfər etmək istəyən şəxslər üçün ucuz bilet satışı elan edib. “Anadolu Jet” aviaşirkəti 40 dollardan başlayan ucuz biletləri əldə etmək üçün yalnız 3 gün (28-30 mart 2021) vaxt ayırıb. Bu siyahıda ən bahalı bilet İstanbul-Bakı və Ankara –Bakı reysi üzrə olan biletlərdir və bu reyslə gəlmək istəyənlər aviabilet üçün 241 dollar ödəməlidirlər”   

Müəllif yada salır ki, İstanbul-Tbilisi reysi 59 dollar, Ankara Moskva bileti 104, Ankara-Kiyev reysi siə 40 dollar təşkil edir. “Anadolu JET” dən açıqlama verilərək deyilib ki, qiymətin bahalığı ölkələrin buna görə tətbiq etdiyi vergidən qaynaqlanır, bəzi ölkələrin vergiləri yüksəkdir. Bilet qiymətlərinə bilet qiymətlərilə bağlı dövlətlərarası və AZAL ilə bağlanmış müqavilələr də təsir göstərir. 

“Sfera.az” saytında yer alan “Azərbaycanda koronavirusa yoluxanlar arasında ölüm niyə çoxalıb? – “İndi tamam fərqli mənzərə ilə qarşı-qarşıdayıq” sərlövhəli məqalədə yoluxmanın artmasının səbəbləri barədə danışılır.

Müəllif deyir ki, son zamanlar virusa yoluxanların da, bu virusdan ölənlərin də sayı artıb. 

Tanınmış tibb professoru Adil Qeybullaya görə, virusun letallıq qabiliyyətinin artması xəstəliyin ağır keçməsinə səbəb olur: “Virus mutasiyası davam edir, hər bir mutagen farma yeni xassə alır...xüsusilə Britaniya ştammı böyük yoluxduruculuq funksiyasına malikdir.Bu səbəbdən virusun yoluxduruculuq qabiliyyəti artıb və indi tamam fərqli mənzərə yaranıb. 

Adil Qeybullaya görə, sərt karantin rejiminin tətbiqi zərurətə dönüb və insanları qorumaq üçün sərt tədbirlər görülə bilər.

“Son xəbər.az” saytı 2021-ci il aprelin 5-dən Azərbaycanda məktəblərin  bağlana biləcəyi barədə xəbərdarlıq edir. Saytda yer alan “Aprelin 5-dən Azərbaycanda məktəblər bağlana bilər” sərlövhəli məqalədə bu məsələ müzakirə edilir.

Müəllifə görə, bu, Azərbaycanda son günlər koronavirusa yoluxanların və ölənlərin sayının kəskin artması ilə bağlı ola bilər. O vurğulayır ki, ölənlər arasında məktəb müəllimləri ilə yanaşı  direktor da var: “Bundan əlavə, bir çox təhsil müəssisələrində əyani tədris koronavirusa görə dayandırılıb. Bu gün səsləndirilən məsələlərdən biri aprelin ilk həftəsindən əyani tədrisin dayandırılması ilə bağlıdır”, - müəllif  qeyd edir.

Təhsil sahəsi üzrə ekspert Kamran Əsədov deyir ki, fevralın 1-də tədris qismən bərpa ediləndə yoluxma hallarının artması gözlənilirdi. Amma rəqəmlərin bu qədər çoxalması gözlənilmirdi.

O, təəssüflə artımın çox yüksək olduğunu, son günlər Azərbaycanda  yoluxanların sayının təhlükəli həddə çatdığını iddia edir: “Apardığımız araşdırmaları və məktəblərdəki yoluxma sayını nəzərə alsaq düşünürəm ki, aprelin 5-dən sonra yenidən məktəblər bağlana bilər".

Satın almaq öhdəliyi ilə kirayə mənzil layihəsi çox baha başa gəlir və “Bizimyolinfo” “Satmaq öhdəliyi ilə kirayə mənzil oyunu: İt də gedir, ip də..” sərlövhəli məqalədə məhz bu problemlə bağlı iqtisadçı-ekspert Rəşad Həsənovla söhbətləşir.

Ekspet adi ipoteka ilə satın almaq öhdəliyi ilə kirayə mənzil almaq arasında paralel aparır. Onun deməsinə görə, satmaq öhdəliyi ilə 110 kvadretmetr mənzil 25 illik ödənişlə 260 min manata, adi ipoteka kreditilə ilkin ödəniş də daxil olmaqla    cəmi 207 min manata, güzəştli ipoteka krediti ilə isə 180 min manata başa gələcək.  

Ekspert iddia edir ki, hər il ipoteka ilə ev alanların sayındakı artım ipotekaya daha çox tələbin olduğunu deməyə əsas verir, Fondun satmaq öhdəliyi ilə verdiyi kirayə mənzil layihəsi isə hədəfindən uzaqlaşıb.

O deyir ki, mənzillər baha, ödənişlərin yüksək olması və aylıq ödəmə edilmədiyi halda ödədiyi vəsaitin fondun xərci kimi hesablanması riskləri artırır.

Ekspertə görə, satmaq öhdəliyi ilə kirayə mənzil sahibi olmaq isə məhz borclanacağın təqdirdə bütün vəsaitini itirəcəyinə görə kreditdən çox cinayətə bənzəyir, bir-iki ay ödəmə edə bilməyəndə it də gedir, ip də.