Media-icmal 31.10.20

“Redaktor.az” saytı “Müharibə bütün torpaqlarımız azad olunana qədər davam edəcək” sərlövhəli məqalədə hərbi əməliyyatların gedişini  ekspertlərlə dəyərləndirlir. 

Politoloqlar bəzi Avropa ölkələrinin erməni işğalında qalan Azərbaycan torpaqlarının azad edilməsilə bağlı aparılan əməliyyatların dayandırılması çağırışlarını əsassız sayırlar. Bu mənada politoloqlar Fransanın adını xüsusi qeyd edirlər.

Onların fikrincə, Ermənistanın mövqeyini dəstəkləyənlər birbaşa terroru dəstəkləmiş olurlar: “Avropa İttifaqı və birbaşa olaraq Fransa dəyərlərdən, sülhdən danışır, xunta rejiminin hökm sürdüyü barbar ölkəni müdafiə edir. Belə sülh sevərdirlərsə, niyə Bərdəyə, Gəncəyə və digər şəhərlərimizə atılan raketlərə səssiz qalırlar?!”, - mövqe ifadə edirlər.

Politoloqlar vurğulayırlar ki, Azərbaycan bu əks- hücum əməliyyatları ilə BMT-nin 4 qətnaməsinin tələblərini yerinə yetirir və işğalda qalan torpaqlar tam azad edilənə kimi bu savaş davam edəcək”.

“Mətbuat.az” saytı “Ənənəvi təhsilə keçid nə zaman mümkün olacaq? – açıqlama” sərlövhəli məqalədə distant təhsilin tətbiqini təhsil eksperti Elçin Əfəndi ilə  dəyərləndirir.

Ekspert Azərbaycanda noyabrın 2-dən dekabrın 1-nə kimi davam etməsi nəzərdə tutulan distant təhsilə keçidə səbəb kimi son vaxtlar koronavirusa yoluxmann kəskin artmasını və hərbi vəziyyətlə bağlı amilləri göstərir.        

E.Əfəndi isə deyir ki, ənənəvi təhsilə keçid ancaq haqqında bəhs olunan amillər aradan qalxdıqdan sonra mümkün ola bilər. 

Ekspert bunu da qeyd edib ki, İnternetin bərpası ancaq hərbi əmliyyatlar başa çatdıqdan sonra mümkün olacaq. 

Bundan irəli gələrək E.Əfəndi deyir ki, hələlik vəziyyət düzələnə qədər alternativ vasitə kimi televiziya kanalları vasitəsilə keçirilən dərslər şagirdlərin bu mərhələdə biliklərinin inkişafında kömək olacaq.

Ekspertə görə, onlayn təhsil ilin sonuna kimi davam edəcək, yenidən ənənəvi təhsilə keçid prosesi isə mart ayında reallaşa bilər.

E.Əfəndi deyir ki, İnternetin keyfiyyəti və s. çətinliklər var, həm də təəssüf ki, cəbhə bölgəsinə yaxın rayonlarda şagirdlərin İnternetə qoşulması hazırki  vəziyyət ilə əlaqədar mümkün olmayacaq”.   

“Moderator.az” saytı isə “Əgər bunu etməsəydik, təyyarə və PUA-larımız belə rahatlıqla hərəkət edə bilməzdi” sərlövhəli məqalədə hazırda davam edən hərbi əməliyyatlar ekspert Ədalət Verdiyevlə müzakirə edilir.

Müəllif deyir ki, Azərbaycan ordusu bu əməliyytlarda erməni tərəfin zenit-raket komplekslərini intensiv şəkildə məhv edir, amma məhv edilən çoxsaylı düşmən texnikası fonunda yeni raket kompleksləri peyda olur, bunun səbəbi nədir.

Hərbi ekspert Ədalət Verdiyev də deyir ki, Azərbaycan ordusu Qarabağda erməni tərəfin raket sistemlərinin önəmli hissəsini məhv edib. “Ermənilər hərbi qarşıdurmaya uzun illər ərzində hazırlaşıblar. Özlərinə silah-sursat tədarükü görüblər. Hansı ki, Azərbaycan ordusu bu cür sistemləri aşkar etdikcə məhv edir.

Ekspert deyir ki, Azərbaycan ordusu Qarabağda aşkarladığı zenit-raket komplekslərini müvəffəqiyyətlə məhv edir, Ermənistan ərazisində isə hələ də bu cür komplekslər mövcuddur.

Ekspertə görə, Qarabağ ərazisində düşmənin raket kompleksləri sürətlə məhv edilir, onlar məhv edilməsə idi, o zaman Azərbaycan aviasiyası, PUA-ları bu qədər rahatlıqla hərəkət edə bilməzdi.