Medianın İnkişafı Agentliyi Turan-a mahiyyəti üzrə cavab verməyib

Bakı/05.10.22/Turan: Medianın İnkişafı Agentliyi Turan-a məktub göndərib və jurnalist Aydın Məmmədovun narazılığının səbəbləri barədə sorğuya özləri hesab etdikləri kimi cavab veriblər.

Şəkidə yaşayan və işləyən, iki saytın (Şəki Ensiklopediyası və İpəkçi) sahibi və redaktoru Aydın Məmmədov dörd aydır ki, Medianın İnkişafı Agentliyinin Azərbaycanda özəl saytların və digər KİV-lərin dövlət tərəfindən seçici olaraq maliyyələşdirilməsinin səbəblərinə aydınlıq gətirməsini tələb edir.

Məmmədovun yaratdığı regional saytlar dövlət yardımından kənarda qalıb, üstəlik o, Turan-a bildirib ki, az ictimai əhəmiyyəti olan və abunəçi sayı az olan KİV-lər dövlət vəsaiti hesabına fəaliyyət göstərirlər. Məmmədovun dəfələrlə Medianın İnkişafı Agentliyinə göndərdiyi sorğularda Agentliyin fəaliyyətini xarakterizə edən və cəmiyyət üçün vacib olan digər aspektlər də var.

Aydın Məmmədovun sualları böyük ictimai əhəmiyyət kəsb etdiyi üçün Turan Medianın İnkişafı Agentliyindən açıqlama əldə edəcəyinə ümid edirdi.  Lakin qurumun cavabında deyilir ki, Məmmədov müxtəlif vaxtlarda dəfələrlə Medianın İnkişafı Agentliyinə müraciət edib, oradan şifahi və yazılı izahatlar alıb. Hətta onu Agentlikdə qəbul ediblər və orada hərtərəfli cavablar alıb, - bizə məktubla bildiriblər.

Amma rəsmi sənəddə onların jurnalist Məmmədova verildiyini iddia etdikləri cavabların mahiyyəti barədə heç nə deyilmir. Bu arada Turan agentliyi 2021-ci il yanvarın 12-də Medianın İnkişafı Agentliyinin yaradılması sayəsində Azərbaycanın elektron və çap mətbuatının hansı uğurlara imza atdığını bilmək istərdi. Həmin gündən 22 ay keçir və bu müddətdə Azərbaycan jurnalistləri peşə fəaliyyətinə əvvəlki əngəllərlə yanaşı, yeni maneələri ehtiva edən “Media haqqında” qanun əldə ediblər.

Bəs uğurlar? Azərbaycanda Medianın İnkişafı Agentliyinin fəaliyyəti dövründə peşəkarlığa və obyektivliyə görə nüfuzlu beynəlxalq mükafatlara layiq görülən KİV varmı?

2021-ci ilin yanvarından ölkədə jurnalistlərin cinayət təqib olunması davam edir və Aydın Məmmədovun Medianın İnkişafı Agentliyinə müraciətində yazdığı kimi, dövlət maliyyə dəstəyi iqtidaryönlü KİV-lərə verilir. O hesab edir ki, dövlət maliyyəsinin bölüşdürülməsi  müstəqil KİV-in kənarlaşdırılması üçün düşünülmüş  meyarlar əsasında həyata keçirilir.

Turan agentliyi Medianın İnkişafı Agentliyindən daxil olan məktubu Aydın Məmmədovun qarşıya qoyduğu aktual suallara cavab hesab etmir və ətraflı, dolğun rəsmi cavab istəyir.

Aydın Məmmədovun internet saytları:  Şəki Ensiklopediyası (https://shaki.info/) və газета “İpəkçi” qəzeti (https://ipekchi.info/)