Mehman Hüseynovun işi ilə bağlı beynəlxalq birliyə dezinformasiya ötürülməsinə cəhdlər edilir

Bakı/14.01.19/Turan: Bloger Mehman Hüseynov 1 saylı Bakı İstintaq Təcridxanasında aclığı davam etdirir. O, ancaq maye süd məhsulları qəbul edir. Bu barədə Turan-a onun qardaşı, Reportyorların Azadlıq və Təhlükəsizlik İnstitutunun (RATİ) direktoru Emin Hüseynov bildirib.

Digər siyasi məhbusların blogerlə həmrəylik nümayiş etdirərək aclığa başlamaları barədə məlumatların fonunda onu daha çox təcrid ediblər, təzyiqləri artırıblar.

Vəkillər ancaq çərşənbə günü Mehmana baş çəkə bilər, telefonla danışmağa imkan verilmir, qardaşı deyib.

Son günlər hakimiyyət Mehmana qarşı yeni cinayət işi ilə bağlı beynəlxalq birliyə dezinformasiya verməyə çalışır. Belə ki, Bakıdan Vaşinqtona, Brüsselə və digər paytaxtlara Mehmana qarşı yeni cinayət işinin olmaması və onun aclıq etməməsi ilə bağlı məlumatlar gedir.

"Anlaşılmazlıq olub və aradan qaldırılır", - hakimiyyət bildirir. Bununla da Avropa Parlamenti, AŞPA və ATƏT PA-nın qarşıdakı sessiyalarında qərar qəbulunun qarşısını almağa çalışırlar. Məhz buna görə Aİ ölkələri nümayəndələrinin Mehmana baş çəkməsi təşkil olunmuşdu", - E.Hüseynov bildirib.

O deyib ki dekabrın 28-dən Mehman yeni cinayət işi üzrə müttəhim statusundadır. "Əgər, cinayət işi yoxdursa, niyə onu təcridxanaya köçürüblər?", - o qeyd edib.

O, təəssüflə bildirib ki, blogerə baş çəkən Aİ və Qırmızı Xaç nümayəndələri indiyədək görüşün yekunları barədə onun ailəsinə məlumat verməyiblər. "O zaman bu başçəkmənin mənası nə idi?", - E.Hüseynov sual edib.

O qeyd edib ki, RATİ tərəfdaş beynəlxalq hüquq-müdafiə təşkilatları ilə birlikdə təkcə blogerin yox, bütün siyasi məhbusların azadlığa buraxılması tələbilə kampaniya keçirir.-06B--