Moskvada azərbaycanlı jurnalist 7 il müddətinə azadlıqdan məhrum edilə bilər

Bakı/17.02.21/Turan: Moskvalı jurnalist, Rusiya azərbaycanlılarının vahid informasiya portalı olan AzRu internet nəşrinin baş redaktoru Roman Ağayevin həyat yoldaşı kömək xahişi ilə Azərbaycana müraciət edib.

Leyla Məmmədova bildirir ki, ötən il oktyabrın 19-da həyat yoldaşı Roman Ağayev sifarişli, saxta, onunla heç bir əlaqəsi olmayan cinayət işi ilə əlaqədar saxlanılıb. Səhər saat 6-da maskalı silahlı şəxslər onların evinin qapısını sındırıblar, mənzildə axtarış aparıblar, kompüterləri müsadirə ediblər və Romanı aparıblar. 48 saat sonra məhkəmə keçirilib. Həmin vaxtdan etibarən Ağayev 16 mart 2021-ci ilə qədər xarici dünya ilə istənilən əlaqədən məhrum edilməklə, ev dustaqlığındadır. Ağayevə qarşı 7 ilədək azadlıqdan məhrumetmə cəzası nəzərdə tutan RF CM-in 213-cü maddəsinin 2-ci hissəsi ilə tamamilə uydurma ittiham irəli sürülüb.

2020-ci il oktyabrın 28-də Rusiyanın erməniyönlü EADaily nəşri “Moskvada iki azərbaycanlı milliyyətçinin – Rahib Bayramov və Roman Ağayevin xuliqanlığa görə həbs edildiyi” barədə məlumat yayıb. Bayramovun “Ümumxalq rifahı naminə” (ÜRN) birliyinin rəhbəri olduğu ehtimal olunur, Moskva azərbaycanlılarının milli-mədəni muxtariyyətinin fəal üzvü olub.

Jurnalist Roman Ağayev Ximka şəhər vilayətinin deputatlar şurasının deputatı (“Ədalətli Rusiya” partiyasından) Xanoğlan Saleh oğlu Əliyevin köməkçisidir. İnformasiyanı “Dvuqlavıy orel” (“İkibaşlı qartal”) cəmiyyətinin paytaxt şöbəsinin rəhbəri Andrey Afanasyev verib. Onun sözlərinə görə, ÜRN “Rusiya ərazisində Azərbaycan vətəndaşlarının dəyərlərinin və maraqlarının müdafiəsi” ilə bağlı insidentlərdən sonra məşhurluq qazanıb. İnsanlar sosial şəbəkələrdə ÜRN-ün xoşuna gəlməyən şəxsi fikirlərini söylədiklərinə görə döyülürdülər, deyə Afanasyev bildirib.

Hüquq-mühafizə orqanları “Dvuqlavıy orel” cəmiyyətinin və Dövlət Dumasının deputatı Vasili Vlasovun birgə bəyanatı əsasında bu təşkilatla bağlı yoxlama aparıblar. Moskva polisi ÜRN təşkilatı üzvlərinin fəaliyyətində ekstremizm əlamətləri aşkar etməyib, zərərçəkmişlərin ərizələri olmadığına görə isə cinayət işi açmaqdan imtina ediblər. Amma Roman Ağayev barəsində Rusiyanın cəza maşını işləyib, jurnalist istintaqın və məhkəmənin başa çatmasını gözləyir.

“Dvuqlavıy orel” və ya “Tsarıqrad” cəmiyyəti məqsədinin Rusiya imperiyasının bərpası olduğunu bildirir, “Orel” (“Qartal”) saytındakı nəşrlərində Rusiya milliyyətçiliyinin təbliği sezilir. Məqsədlərdən biri daxili əmək bazarının Orta Asiya və Zaqafqaziya respublikalarından az təcrübəli işçi qüvvəsinin axınından qorunmasıdır.

L.Məmmədova Romanın Rusiya KİV-lərində Azərbaycanın işğal edilmiş ərazilərinin azad edilməsi uğrunda ədalətli mübarizəsini müdafiə edən həqiqəti deməsinin kimisə çox qorxutduğunu yazır. O, ailəsinə üz verən bəladan özünü kənara çəkmiş “Azərbaycan icmasının bəzi ləyaqəstsiz nümayəndələrini” ittiham edir.

Romanın peşə fəaliyyəti ilə əlaqədar milli ayrı-seçkilik təzahürü ilə təqibi onun həyat yoldaşına və qızına qarşı total təzyiqlə davam edib. Ailə pulsuz qalıb, köməyə ehtiyacı var.

İşləmək və pul qazanmaq imkanının olmadığı bir şəraitdə vəkil xərcləri, habelə ailənin, yetkinlik yaşına çatmamış uşaqların gündəlik tələbatı ağır yükdür, deyə həbs edilmiş jurnalistin həyta yoldaşı yazır. O, Sberbank kartının nömrəsini paylaşaraq, yardım istəyir: 4276400060109791 / Məmmədova Leyla Məmməd qızı.

2019-cu ildə Rusiyada internetdə və telekanallarda Azərbaycanı müdafiə edən 49 yaşlı azərbaycanlı jurnalist Fuad Abbasov da həbs edilib, daha sonra isə ölkədən çıxarılıb. -0-