Prokuror FHN generalı ilə polis zabiti arasındakı silahlı insidenti araşdırır

Binəqədi rayonu ərazisində baş vermis silahlı  insidentlə bağlı hazırda Binəqədi Rayon Prokurorluğunda araşdırma aparılır. Bu barədə Turan-a Binəqədi Rayon Prokurorluğundan bildiriblər.

Mayın 1-də  gecə Bakının Binəqədi rayonunda Fövqəladə Hallar Nazirliyinin generalı bərk sərxoş vəziyyətdə Baş Xüsusi Dövlət Mühafizə İdarəsinin zabitini tapança ilə  hədələyib.

Belə ki, Füzuli rayon polis şöbəsinin ictimai təhlükəsizlk şöbəsinin sahə müvəkkili Rafael Xudiyevə Bakının 6-cı mikrorayon ərazisində “Lexus” avtomobilinin sürücüsü (dövlət nömrə nişanı 90 SH 900) ona tapança çəkib. Gecə saat 02.00 radələrində S.Məmmədov küçəsində Baş Xüsusi Dövlət Mühafizə İdarəsinin zabiti Famil Quliyevlə FHN-nin xidmət rəisi general-mayor Ramil Cəfərov arasında münaqişə yaranıb. Quliyev “Mercedes” markalı avtomobilin, Cəfərov isə “Lexus”un sükanı arxasında olub.

Münaqişənin səbəbi sürücülərin bir-birlərinə yol verməməsi olub. Bu zəmində generalla zabit arasında mübahisə yaranıb. General Cəfərov F.Quliyevi təhqir edərək hadisə yerindən uzaqlaşıb. Bu zaman F.Quliyevin arxasınca “Opel” markalı avtomobili ilə hərəkət edən tanışı-sahə müvəkkili Rafael Xudiyev generalın avtomobilinin arxasınca düşüb, onu ötüb və qarşısını kəsib.

Bundan bərk qəzəblənən general maşından çıxaraq “Jeriko” markalı tabel silahını çıxarıb və polisə tərəf tuşlayıb. Lakin polis generala yumruq zərbəsi endirib və onun silahını əlindən alıb. Daha sonra hadisə yerinə Binəqədi polisinin əməkdaşları gəlib. Tərəflər polisdə izahat yazdıqdan sonra sərbəst buraxılıb.-03B-