"Qarabağ" Klubu inamlı qələbə qazanaraq Avropa Liqasının qrup mərhələsinə çıxıb

Bakı/02.10.20/Turan: Azərbaycan Ordusunun Dağlıq Qarabağın və onun ətrafındakı yeddi rayonun işğaldan azad edilməsi üzrə uğurlu əməliyyatları haqqında xəbərlər fonunda Azərbaycanın "Qarabağ" futbol klubu Varşavada möhtəşəm qələbəsi ilə insanları sevindirib.

Avropa Liqasının pley-off mərhələsində Polşanın "Legiya" klubuna qarşı oynayan Azərbaycan çempionları 3:0 hesabı ilə qalib gələrək, Avropa Liqasının qrup mərhələsinə çıxıb.

Oyuna fəal başlayan "Qarabağ" futbolçuları ilk dəqiqələrdən meydan sahiblərinin qapısında təhlükəli vəziyyətlər yaradıb. Amma, əsasən rəqibin qapıçısı Artur Boruts birbaşa üzərinə vurulan topları rahat tutduğuna görə Azərbaycan çempionları birinci hissədə hesabı aça bilməyib.

Qələbə topları oyunun ikinci yarısından vurulmağa başlayıb. İkinci hissə başlayan kimi, daha dəqiq isə 50-ci dəqiqədə Ovusu Kvabena rəqibim sol cinahından məharətlə keçərək, topu cərimə meydançasına atıb, orada Patrik Andrade topu dəqiq zərbə ilə qapıya göndərib. Yeri gəlmişkən, bu, "Qarabağ"ın heyətində onun ilk qolu idi.

62-ci dəqiqədə Abdulla Zubir öz sözünü deyib. O, sol tərəfdə "Legiya"nın qapıçısı ilə təkbətək qalıb və topu onun ayaqlarının arasından qapıya göndərib. 

Oyuna xorvatiyalı Ozobiç nöqtəni qoyub. O, qapıçı meydanı yaxınlığında Patrik Andradedən pas alıb və topu qapıçıdan sol tərəfə göndərib.

Xüsusilə qeyd etmək lazımdır ki, "Legiya"ya qarşı matçda "Qarabağ" futbolçuları son vaxtlardakı ən yaxşı oyunlarından birini nümayiş etdirib və hansısa oyunçunu ayrılıqda qeyd etmək çətindir. Azərbaycan çempionları əsl komanda oyunu nümayiş etdirib. Hər kəs öz rolunu yaxşı bilib və ümumi qələbə üçün əlindən gələni əsirgəməyib. Onlar üçün əlavə motivasiya düşünməyə isə ehtiyac yoxdur. Qarabağda müharibə meydanından qələbə xəbərləri gözləyən Azərbaycan xalqının bütün baxışları bu gün Varşavaya yönəlmişdi. "Qarabağ"ın orada uduzmağa haqqı yox idi. Bu vəziyyət futbolçular üçün əlavə motivasiya və böyük mənəvi təzyiq idi. Amma "Qarabağ"ın futbolçuları vəzifələrinin öhdəsindən şərəflə gəlib və ardıcıl olaraq yeddinci dəfədir Avropa kuboklarının qrup mərhələsində oynayacaq. Xatırladaq ki, buna qədər "Qarabağ" beş dəfə Avropa Liqasının, bir dəfə isə Çempionlar Liqasının qrup mərhələsində oynayıb.

Qeyd edək ki, Ermənistan da futbol meydanlarından yaxşı xəbərlər gözləyirdi. Yerevanın "Ararat" klubu pley-off mərhələsində Serbiyanın "Srvena zvezda" klubuna qarşı oynayırdı. Amma Qarabağ cəbhəsindən ermənilər üçün gələn pis xəbərlərlərlə birlikdə serbiyalılar da 2:1 hesabı ilə qalib gələrək onları məyus edib. –71D-