Qaradırnaq kəndində aksiya

Bakı/16.05.20/Turan:  Bu gün Bərdə rayonunun Qaradırnaq kəndinin bir qrup sakini heyvanlarını otarmaq üçün onlara örüş sahəsinin ayrılması tələb ilə aksiya keçirib. Kənd camaatı icarəyə verilmiş bələdiyyə torpaqlarının ümumi istifadəyə qaytarılmasını tələb edib.

DİN mətbuat xidmətinin məlumatına görə, kəndə gələn rayon polis şöbəsinin əməkdaşları izahedici söhbətlər aparsalar da sakinlər aksiyanın davam etdiriblər, hətta kəndin digər sakinlərinə məxsus pay torpaqlarının onlara örüş sahəsi kimi verilməsini də tələb ediblər.

“Onların bu hüquqazidd əməllərinin qarşısının alınması üçün hadisə yerinə polis əməkdaşları cəlb edilib. Asayiş keşikçilərinin dəfələrlə etdiyi xəbərdarlığa məhəl qoymayan qrup üzvləri polisə qarşı müqavimət göstəriblər”, - məlumatda deyilir.

“Bu hərəkətlərin qarşısı alınıb, ictimai asayiş tam bərpa edilib. Polisin qanuni tələblərinə riayət etməyən və müqavimət göstərən 14 nəfər saxlanılaraq polis şöbəsinə aparılıb”, - DİN mətbuat xidməti bildirib.

Öz növbəsində yerli sakinlər Turan-a bildiriblər ki, neçə illərdir kəndin örüş torpaqları qanunsuz olaraq müxtəlif şəxslərə icarəyə verilir, kənd camaatı həmin torpaqlardan yararlana bilmir. Kənd camaatının məsələni dəfələrlə yerli rəhbərlik qarşısında qaldırmasına baxmayaraq, hər hansı tədbir görülməyib.

Dünən onlar Azərbaycan prezidentinə müraciət ediblər. Bundan sonra şikayət edənlərdən üç nəfəri polisə aparıblar. Bugünkü etiraz aksiyası saxlanılan şəxslərin azad edilməsi tələbi ilə olub, sakinlər bildiriblər. Onlar vurğulayılar ki, hakimiyyətə qarşı çıxmırlar, sadəcə, Azərbaycan prezidentindən onların hüquqlarının bərpasına kömək göstərməyi xahiş edirlər.

Lakin polis yenidən həbslər həyata keçirib.

Bərdə Rayon İcra Hakimiyyəti başçısının Hüseynalılar kənd inzibati ərazi dairəsi (Qaradırnaq kəndi bu ərazi dairəsinə daxilidr-red.) üzrə nümayəndəsi Ərşad Abdullayev bildirib ki, camaat örüş yeri almaqla bağlı artıq 10-15 gündür şikayət edir. Camaat iddia qaldırır ki, icarəyə verilən torpaqlar qaytarılmalı və onlar həmin torpaqlardan örüş sahəsi kimi istifadə etməlidir.

“Biz onlara izah etdik ki, ümumi istifadəyə verilən torpaqlar örüş kimi camaatın istifadəsindədir. Qalan bələdiyyə torpaqları var ki, onlar müxtəlif adamlara icarəyə verilib. Həmin topraqlarda taxıl, pambıq, yonca əkilib. Kənd camaatı da israrla tələb edir ki, həmin torpaqları alıb örüş kimi istiafadə etsin.

 Bu gün də yığışdılar, bələdiyyə sədrini dəvət etdim. İzah etdik ki, qanuni yolu budur. Sonra razılaşmadılar. Polis rəisini dəvət etdik, müavini gəldi. Onlar da izah etdilər. Dedilər məhkəməyə müraciət edin, qanuni tədbir görülsün. Camaat razılaşmadı və dedilər mal-qaranı aparılb icarəyə verilmiş torpaqlarda otaracaqlar. Bundan sonra polis bir neçə nəfəri saxladı ki, kütləvi ixtişaş yaradırsınız, qanunsuz hərəkət edirsiniz”, - Ə.Abdullayev bildirib.

Onun sözlərinə görə, icarəyə verilən torpaqlar bələdiyyənin fond torpaqlarıdır.

“128 hektar bələdiyyə torpağından 70 hektarı ümumi istifadədədir. Qalan 58 hektarı icarəyə verilib”, - məmur bildirib. 03B06—