QHT sahəsində liberallaşdırma haqqında yalnız danışıllar

Bakı/18.08.21/Turan: Avqustun 4-də Prezidentin köməkçisi Hikmət Hacıyev bir sıra hüquq müdafiəçilərlə görüşüb. Hüquq müdafiəçilər görüşdə ölkədə qeyri-hökümət təşkilatları (QHT) sektorunda problemləri də müzakirə edildiyini bildirdi. Onlar QHT-lər məsələsində yumşalma olacağının anonsunu verdilər.

Daha sonra isə QHT-lərə Dövlət Dəstəyi Agentliyinin təmsilçiləri QHT-lərin qanunvericilik bazasının təkmilləşdirilməsi üzrə təklif paketini hazırladığını və aidiyyatlı qurumlara təqdim etdiyini bildirdilər.

Bəzi hüquq müdafiəçilər isə düşünür ki, dəyişikliklər sadəcə kosmetik xarakterli olacaq.

Qeyri-hökümət sektorunda hansı dəyişikliklər gözlənilir? 2014-cü ildə sərtləşdirilmiş qanunvericiliyinin yumşaldılması olacaqmı?

QHT-lərə Dövlət Dəstəyi Agentliyinin Müşahidə Şurasının üzvü Günel Səfərova Turana bildirib ki, ötən il müharibədən əvvəl hökümət qeyri-hökümət təşkilatları ilə bir neçə görüş təşkil edib. «O vaxt da ehtimal var idi ki, hər hansısa dəyişikliklər nəzərdə tutulur, amma müharibə zamanı məlum səbəblərə görə bu məsələ dayandı. Daha sonra isə QHT-lərə Dövlət Dəstəyi Agentliyi yaradıldı. Qurumun Müşahidə Şurasında kifayət qədər rəngarəng və fərqli mövqeləri olan insanlar var, sadəcə eyni mövqedə bizi birləşdirən amillərdəm biri odur ki, qeyri-hökumət təşkilatları ilə bağlı mühit yaxşılaşmalı və qanunvericilikdə məzmun əsaslı dəyişikliklər olmalıdır».

Qurumun təmsilçisi məsələ ilə bağlı öz təklifləri verdiklərini qeyd etdi. «Sözsüz ki, təkliflər 2014-cü ildə olan qadağaların aradan qaldırılması ilə bağlı olan təkliflərdir. QHT-lərin qeydiyyat məsələsini asanlaşması da təklif kimi var. Çünki qanunda QHT-lərin qeydiyyat problemi yoxdur, sadəcə mühit elədir ki, qeyri-hökumət təşkilatlarının qeydiyyat məsələsi gecikdirilir, yaxud da qeydiyyata alınmır».

Səfərovanın sözlərinə görə, beynəlxalq təşkilatların, fondların maliyyələşməsinin asanlaşması ilə bağlı da təkliflər hazırlanaraq təqdim olunub.

Onun fikrincə, bu sahədə yumşalmalar olacaq. «Bunun üçün də siyasi iradə var. Bu siyasi iradə olmasaydı bu qədər görüşlər, fəaliyyətlər, təkliflər paketinin hazırlanması olmazdı. Yumşalmalar nəzərdə tutulur. Əlbəttə ki, QHT təmsilçisi prizmasından baxanda istəyirəm ki, bütün qadağalar aradan götürülsün, sadəcə bəzi məsələlər var ki, hələ də müzakirə tələb edir, xüsusilə xaricdəki maliyyənin Azərbaycana gəlməsi məsələsi».

Vətəndaş Hüquqları İnstitutunun rəhbəri Bəşir Süleymanlı da düşünür ki, hökümət müəyyən dəyişikliklərə gedəcək.

O bildirib ki, hökümət bunu etməyə məcburdur. «Çünki hazırkı şərtlər belə etməyə diktə edir. Vətəndaş cəmiyyətinin vaxtilə fəaliyyətinin məhdudlaşdırılması dövlətin də nüfuzunu zədələyir. Yəqin ki, hökümətin yeni komandası yeni siyasi dizayn etməyə planlayır, o cümlədən də vətəndaş cəmiyyəti ilə bağlı».

Onun sözlərinə görə, dəyişikliklərlə bağlı proses 1 il əvvəl başlamışdı. «Prezidentinin köməkçisi vətəndaş cəmiyyətinin nümayəndələri ilə görüşmüşdü, biz müəyyən təkliflərimizi təqdim etmişik. Amma bu proses konkret bir müstəvidə aparılmır. Müəyyən adamlarla görüşürlər, mesajlar verilir, amma yekun nəticələri biz hələ ki, görmürük».

B.Süleymanlı qeyd edib ki, hələ ki, nəyinki pozitiv dəyişikliklər edilir, əvvəlki problemlər belə qalmaqdadır. «Vətəndaş cəmiyyətinin fəallarının, vəkillərin ölkəyə giriş-çıxış zamanı qanunsuz yoxlanışlara hələ də məruz qalırlar».

Ekspert qeyd edib ki, məsələ ilə bağlı ictimai müzakirələr getmir. «Dəyişikliklər paketi hazırlanıb. Bu dəyişikliklər pametində nələr öz əksini tapıb bununla bağlı açıqlama verilmir. Yaxşı olar ki, hazırlanan qanun layihəsinin, təkliflərin ictimai müzakirəsi təşkil olunsun və buna uyğun vətəndaş cəmiyyətinin nümayəndələri öz təkliflərini da versinlər».

Hüquq müdafiəçisi ehtimal edir ki, dəyişikliklər QHT-lərin qrant alınması, beynəlxalq təşkilatlarının Azərbaycanda fəaliyyət göstərməsi ilə bağlı ediləcək.—0--