Qubad İbadoğlu: “Dövləti korrupsiyaya uğramış məmurlar idarə edirlər”

Bakı/20.04.22/Turan: İqtisadi Tədqiqatlar Mərkəzinin rəhbəri, iqtisadiyyat professoru Qubad İbadoğlu Azərbaycanın dövlət qurumlarını - Maliyyə Nazirliyini və Rəqəmsal İnkişaf və Nəqliyyat Nazirliyini Qarabağın işğaldan azad edilmiş ərazilərinin bərpasının maliyyələşdirilməsi haqda informasiyanın qanuna zidd olaraq gizlədilməsində ittiham edib.

İbadoğlu Turan ilə söhbətində deyib ki, Qarabağda bərpa işlərinin maliyyələşdirilməsinin vəziyyəti barədə ona məlumat verilməsi xahişilə həmin nazirliklərə yazılı müraciət edib: "Bu məlumat iqtisadiyyat üçün, tədqiqat işi üçün vacibdir".

Nazirliklərdən ona məlumat verməkdən imtina barədə məktublar göndərilib. Maliyyə Nazirliyi tələb olunan məlumatları büdcə sənədlərində dərc etmək niyyətində olduğunu bildirir, Rəqəmsal İnkişaf və Nəqliyyat Nazirliyi isə iqtisadçıya bildirib ki, mövcud məlumatı Prezident Administrasiyası yanında Koordinasiya Qərargahına ötürür.

"Hər iki qurum işğaldan azad edilmiş ərazilərdə aparılan bərpa işlərinin maliyyələşdirilməsi barədə məlumatları gizlədir. Niyə? Əgər bu sahədə korrupsiya yoxdursa, o zaman məlumat niyə gizlədilir?", - Qubad İbadoğlu sual edir.

“Korrupsiya haqqında” qanuna görə, ictimaiyyət üçün açıq olmalı məlumatların məmurlar tərəfindən gizlədilməsi korrupsiya əməlidir.

Alim diqqəti ona yönəldir ki, Maliyyə Nazirliyinə əvvəlki “çağırış” məmur (maliyyə naziri Samir Şərifov 2006-cı ildə təyin olunub), Rəqəmsal İnkişaf və Nəqliyyat Nazirliyinə isə gənc nazir (Rəşad Nuriyev, 2021-ci il 26 yanvardan) rəhbərlik edir. Bu nazirlərin məmur stajları arasındakı fərqə baxmayaraq, onlar eyni ciddi-cəhdlə ictimai əhəmiyyətli məlumatları müstəqil iqtisadçılardan gizlədirlər.

İşğaldan azad edilmiş regionların maliyyələşdirilməsilə bağlı məlumatların sahibləri adları çəkilən nazirliklərdir. “İnformasiya əldə etmək haqqında” qanunun 9-cu maddəsində bələdiyyələr və dövlət orqanları informasiya sahibləri kimi müəyyən edilir.

Həmin qanunun 10-cu maddəsində deyilir ki, informasiya sahibi sərbəst, maneəsiz və bərabər şərtlərlə informasiya əldə etmək hüququnu bu qanunla müəyyənləşdirilmiş qaydada təmin etməyə borcludur. 24-cü maddə müraciət edən tərəfə yeddi iş günündən gec olmayaraq məlumatın təqdim olunmasını tələb edir.

Qanunda hətta tələb olunan məlumatın verilməsindən imtinaya və ya gecikdirməyə görə dövlət orqanının məsuliyyəti də göstərilib. Ancaq hər yerdə qanun pozulur. Bunu Turan-ın jurnalistləri və digər KİV-dəki həmkarlarımız da təsdiqləyə bilər. Onlar hər gün dövlət instansiyalarına müxtəlif sorğularla müraciət edirlər və çox vaxt müxtəlif formalarda imtina cavabları alırlar.

Bizə deyirlər: gözləyin, öyrənəcəyik və cavab verəcəyik; sabah zəng edin; sualları yazılı göndərin; informasiya mənbəyi məzuniyyətdədir (ezamiyyətdədir, xəstədir, işə çıxmayıb). Yaxud, sadəcə, nazirliyin saytında qeyd olunan telefonlara cavab verilmir.

İbadoğlu hesab edir ki, Azərbaycan hüquqi dövlət metodları ilə yox, korrupsiyaya uğramış məmurların şəxsi maraqları və istəklərilə idarə olunur. Dövlət qurumları korrupsiya hallarını ört-basdır etmək üçün bütün qanunsuz əməllərə əl atırlar.

İbad Qubadoğlunun dediklərinə işğaldan azad edilmiş Zəngilan rayonunda “Ağıllı kənd” inşa edən fəhlələrin aldadılması ilə bağlı Turan-ın aşkar etdiyi faktları da əlavə edək. Əməkhaqqı almayan işçilər işi buraxıb ərazini tərk etməyə məcbur olublar. Turan bu barədə “Zəngilanda “Ağıllı kənd”in inşaatçıları ödənişdən və məişət şəraitindən narazıdırlar” məqaləsində məlumat verib.

Azərbaycan Maliyyə Nazirliyi bildirib ki, 2021-ci ilin yanvar-iyun aylarında Azərbaycan hökuməti işğaldan azad edilmiş ərazilərin, o cümlədən Zəngilan rayonunun bərpası proqramı çərçivəsində 372,1 milyon manat vəsait xərcləyib. 2021-ci ilin 6 ayı ərzində Zəngilan rayonu Ağalı-2 kəndi ərazisində “Ağıllı kənd” layihəsinin həyata keçirilməsi üçün Kənd Təsərrüfatı Nazirliyinə 10,8 milyon manat ayrılıb. 2021-ci ilin oktyabrında bildirilib ki, bu obyekt tezliklə təhvil veriləcək. Amma beş ay keçib - “Ağıllı kənd” hələ də tikilir, işlərin baş podratçısı AS Group Investment özəl şirkəti isə gecikmənin səbəbi və yubanan tikintinin maliyyə tərəfi barədə Turan-a məlumat verməkdən imtina edib.